ରାୟଗଡ଼ା: ରାୟଗଡ଼ା ଜିଲ୍ଲା ଚାନ୍ଦିଲି ଥାନା ଅନ୍ତର୍ଗତ ଗେଟିପଡ଼ା ବ୍ରିଜ ନିକଟରେ ପିକଅପ୍ ଓ ବାଇକ ଧକ୍କା ଫଳରେ ଦୁଇ ଜଣଙ୍କ ମୃତ୍ୟୁ ଘଟିଛି । ମୃତକ ଦୁଇଜଣ ହେଲେ ବୁଲୁ ବେନିଆ(୩୭) ଓ ମନୋଜ ବେନିଆ(୨୫) । ଦୁର୍ଘଟଣା ଯୋଗୁଁ ସ୍ଥାନୀୟ ଅଂଚଳରେ ଉତ୍ତେଜନା ପ୍ରକାଶ ପାଇଛି । ଲୋକେ ଗେଟିପଡ଼ା ଛକ ନିକଟରେ ରାସ୍ତାରୋକ କରିଛନ୍ତି ।
ଘଟଣା ଅନୁସାରେ, କୋଲନରା ବ୍ଲକ ଅନ୍ତର୍ଗତ ରାମପୁର ଗ୍ରାମର ବୁଲୁ ଓ ମନୋଜ ନିଜ ବାଇକ ନଂ ଓଡ଼ି୧୮କେ୫୫୭୨ରେ ରାୟଗଡ଼ାରୁ ଘରକୁ ଫେରୁଥିବା ସମୟରେ ଗେଟିପଡ଼ା ବ୍ରିଜ ନିକଟରେ ପଛପଟୁ ଆସୁଥିବା ଏକ ମ୍ୟାକ୍ସ ପିକଅପ୍ ଗାଡ଼ି ନଂ ଓଡି୧୮ଜି୦୭୫୫ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ବୁଲୁ ଓ ମନୋଜ ମୃତ୍ୟୁବରଣ କରିଥିଲେ । ମୃତକ ଦୁଇଜଣ ଭାଇ ବୋଲି ଜଣାପଡ଼ିଛି । ଦୁର୍ଘଟଣା ଘଟିବା ପରେ ଗାଡ଼ି ଚାଳକ କର୍ଲାକଣା ଠାରେ ଗାଡ଼ି ଛାଡ଼ି ଫେରାର ହୋଇଯାଇଛି ।
ତେବେ ଦୁର୍ଘଟଣା ଯୋଗୁଁ ସ୍ଥାନୀୟ ଅଂଚଳରେ ଉତ୍ତେଜନା ପ୍ରକାଶ ପାଇଛି । ଲୋକେ ଗେଟିପଡ଼ା ଛକ ନିକଟରେ ରାସ୍ତାରୋକ କରିଛନ୍ତି । ମୃତକଙ୍କ କ୍ଷତିପୂରଣ ଦାବି ପୂରଣ ନହେବା ଯାଏଁ ରାସ୍ତାରୋକ ଜାରି ରହିବ ବୋଲି ଉତ୍ୟକ୍ତ ଲୋକେ ପ୍ରକାଶ କରିଛନ୍ତି । ତେବେ ଚାନ୍ଦିଲି ପୋଲିସ ଘଟଣାସ୍ଥଳରେ ପହଂଚି ତଦନ୍ତ କରିବା ସହିତ ଉତ୍ୟକ୍ତ ଜନତାଙ୍କୁ ରାସ୍ତାରୋକରୁ ହଟିବା ବୁଝାସୁଝା କରୁଥିବା ସୂଚନା ମିଳିଛି ।
