ପାଟଣା ୧୮।୦୩ : ବିବାହକୁ ନେଇ ପ୍ରତିଦିନ କିଛି ନା କିଛି ଖବର ସାମ୍ନାକୁ ଆସୁଛି । କେତେବେଳେ ବେଦୀରେ କନିଆ ପହଞ୍ଚୁନି ତ, ଆଉ କେତେବେଳେ ବେଦୀରେ ହିଁ ଶୋଇପଡୁଛି କନିଆ । କିନ୍ତୁ ଏବେ ଯେଉଁ ଖବର ସାମ୍ନାକୁ ଆସିଛି ତାହା ବେଶ୍ ଚର୍ଚ୍ଚାରେ ରହିଛି । କଥା କଣ କି ମଦ ନିଶାରେ ନିଜ ବିବାହରେ ହିଁ ପହଞ୍ଚିଲାନି ବର । କଥାଟି ଶୁଣି ଆଶ୍ଚର୍ଯ୍ୟ ଲାଗୁଛି ନା, କିନ୍ତୁ ଏଭଳି ଘଟଣା ଦେଖିବାକୁ ମିଳିଛି ବିହାର ଭାଗଲପୁରର ସୁଲତାନଗଞ୍ଜରେ ।
ଖବର ଅନୁଯାୟୀ, ସୁଲତାନଗଞ୍ଜର ଏକ ଗାଁରେ ସୋମବାର ଧୁମଧାମର ଏକ ବିବାହର ଆୟୋଜନ କରାଯାଇଥିଲା । କହଲଗାଁକୁ ଅତିଚକ ଗାଁରୁ ବରଯାତ୍ରୀ ଆସିଥିଲା । କିନ୍ତୁ ବିବାହ ପୂର୍ବରୁ ବର ହିଁ ନିଶାରେ ଚୁର ହୋଇଗଲା ଏବଂ ଝିଅ ଘରରେ ପହଞ୍ଚିନଥିଲେ ବରଯାତ୍ରୀ । ଏପଟେ ବିବାହ ପାଇଁ ଅପେକ୍ଷା କରି ରହିଥିଲେ କନ୍ୟାପକ୍ଷ । ଏମିତିକି ମଙ୍ଗଳବାର ଯାଏଁ ମଧ୍ୟ ପହଞ୍ଚିନଥିଲା ବରଯାତ୍ରୀ । କିନ୍ତୁ ଯେତେବେଳେ ବରର ହୋସ୍ ଆସିଥିଲା, ସେତେବେଳେ ସେ ପରିବାରର କହିବା ଯୋଗୁଁ ମଙ୍ଗଳବାର ମଧ୍ୟାହ୍ନରେ ସହଯୋଗୀଙ୍କ ସହ ଝିଅ ଘରେ ପହଞ୍ଚିଥିଲା ବର ।
ଏପଟେ ଯୁବକର ଏପରି କାରନାମା ଦେଖି ବିବାହ କରିବାକୁ ମନା କରିଦେଲା ଝିଅ । ଏହାପରେ ଝିଅ ଘର ପରିବାର ଲୋକ ପୁଅ ଘର ଲୋକଙ୍କୁ ବନ୍ଧକ ରଖି ବିବାହରେ ଖର୍ଚ୍ଚ ହୋଇଥିବା ଟଙ୍କା ଫେରସ୍ତ ପାଇଁ ଦାବି କରିଛନ୍ତି । ସ୍ଥିତି ଏପରି ହୋଇଥିଲା ଯେ କିଛି ସହଯୋଗୀ ଟଙ୍କା ଆଣିବାକୁ କହଲଗାଁକୁ ମଧ୍ୟ ଯାଇଥିଲେ । ତେବେ ସ୍ଥିତି ଅଧିକ ଖରାପ ହେବା ପରେ ଏନେଇ ପୋଲିସକୁ ଦିଆଯାଇଥିଲା । ଏହାପରେ ଏକ ଚୁକ୍ତି ହୋଇଥିଲା ଏବଂ ବିବାହ ପାଇଁ ଖର୍ଚ୍ଚ ହୋଇଥିବା ଟଙ୍କା ଦିଆଯିବାକୁ ନିଷ୍ପତ୍ତି ନିଆଯାଇଥିଲା। ଏହା ପରେ ବନ୍ଧକ ବର ଏବଂ ତାଙ୍କ ସହକର୍ମୀଙ୍କୁ ମୁକ୍ତ କରାଯାଇଥିଲା ।