ପଟଣା: ପିପୁଲ୍‌ସ ଫର୍ ଇଣ୍ଡିଆ ସଂଗଠନରେ ଖୁଲମଖୁଲା ପ୍ରଚାର। ବିହାର ମୋତିହାରି ଓ ମୁର୍ଜାଫରପୁରରେ ଯୁବକଙ୍କୁ ଭର୍ତ୍ତି । ପିଏଫଆଇ ସଂଗଠନ ନେପାଳ ସୀମାନ୍ତ ବିହାରରେ ରାଲି ବାହାର କରିବା ସହିତ ଯୁବକଙ୍କୁ ସାମିଲ ପାଇଁ ଖୋଲାଖୋଲି ଆହ୍ବାନ ଦେଉଛି । ଏନେଇ ଜାତୀୟ ଯାଞ୍ଚ ଏଜେନ୍ସି ମୁର୍ଜାଫରପୁର ବରୁରାଜ ଥାନାରେ ଏଫଆଇଆର୍ ଦାଖଲ କରି ବଡ଼ ଖୁଲାସା କରିଛି । ଘଟଣାରେ ପିଏଫଆଇରେ ସାମିଲ ଥିବା ୬ଜଣଙ୍କୁ ଏନଆଇଏ ହେପାଜତକୁ ନେଇ ପଚରାଉଚରା କରିଛି ।

୨୦୨୨ ସେପ୍ଟେମ୍ବର ମାସରେ ଦେଶରେ ପିଏଫଆଇକୁ ସମ୍ପୂର୍ଣ୍ଣ ବ୍ୟାନ କରାଯାଇଛି । ହେଲେ ବିହାରର ସୀମାନ୍ତ ଅଞ୍ଚଳରେ ପିଏଫଆଇର ଗତିବିଧି ଦେଖିବାକୁ ମିଳିଛି । ମୁର୍ଜାଫରପୁର ଜିଲ୍ଲା ବରୁରାଜ ଥାନା ପରସୌନିନାଥ ଅଞ୍ଚଳରେ ସଂଗଠନରେ ଭର୍ତ୍ତି ପାଇଁ ଅକ୍ଟୋବର ମାସରେ ରାଲି ବାହାରିଥିଲା। ଏନେଇ ବରୁରାଜ ଥାନାରେ ମାମଲା ରୁଜୁ ହେବା ପରେ ଏସଏସପି ରାକେଶ କୁମାର ଛାନଭିନ୍ ଆରମ୍ଭ କରିଥିଲେ ।

ପରସୌନିନାଥ ଗାଁରେ ପିଏଫଆଇ ସଂଗଠନରେ ଭର୍ତ୍ତି ପାଇଁ ରାଲି ଆୟୋଜନକୁ ନେଇ ଏନଆଇଏ ଯାଞ୍ଚ ଆଧିକାରୀ ବିକାଶ କୁମାର ଏଫଆଇଆର୍ ଦାଖଲ କରିଥିଲେ । ପୂର୍ବ ଚମ୍ପାରଣର ହରିପୁର କିସୁନି ଗାଁର ମହମ୍ମଦ ବିଲାଲ୍ ଓରଫ ଇରାଶାଦ, କୁଆଁଓ୍ବା ଗାଁର ରିୟାଜ୍ ମାରୁଫ୍, ମୋଗଲପୁର ୟାକୁବ୍ ଖାନ୍,  ମହମ୍ମଦ ଅଫରଜ୍ ଏବଂ ପରସୌନିନାଥ ଗାଁର ମହମ୍ମଦ କାଦିର ଏହି ରାଲି ଆୟୋଜନ କରିଥିବା ନେଇ ଥାନାରେ ଅଭିଯୋଗ ହୋଇଛି ।

ପିଏଫଆଇ ଟ୍ରେନର ବା ମୁଖ୍ୟ ଅଭିଯୁକ୍ତ ମହମ୍ମଦ ୟାକୁବକୁ ଗିରଫ କରିବାକୁ ଏନଆଇଏ ଟିମ୍ ବିଭିନ୍ନ ସ୍ଥାନରେ ଛାପାମାରି କରିଛି । ସ୍ଥାନୀୟ ଅଞ୍ଚଳ ୬ଜଣଙ୍କୁ ଯାଞ୍ଚ ଏଜେନ୍ସି ହେପାଜତକୁ ନେଇ ପଚରାଉଚରା କରୁଛି । ଏହି ଯାଞ୍ଚ ପ୍ରକ୍ରିୟା ଏନଆଇଏ ଟିମ୍ ସହିତ ବିହାର ଏଟିଏସର ବିଶେଷ ଟିମ୍ ସାମିଲ ହୋଇଛି । ମୋତିହାରିରେ ସ୍ବତନ୍ତ୍ର ଟିମ୍ ୩ଜଣଙ୍କୁ ଗିରଫ କରି ଜେଲ୍ ପଠାଇ ଦେଇଥିବା ସୂଚନା ମିଳିଛି । ଅନ୍ୟ ଅଭିଯୁକ୍ତ ମାନଙ୍କୁ ଧରିବାକୁ ଉଦ୍ୟମ ଚଳାଇଛି ଏନଆଇଏ ଟିମ୍ ।