ୱାଶିଂଟନ ୨୦/୦୭: ଶକ୍ତିଶାଳୀ ରାଷ୍ଟ୍ର ଆମେରିବାକ ବଡ ନିଷ୍ପତ୍ତି । ଚୀନ୍‌ର ଉହାନ୍‌ ଲ୍ୟାବ୍‌କୁ ପାଣ୍ଠି ଯୋଗାଣ ଉପରେ ରୋକ୍‌ ଲଗାଇଛି ଆମେରିକା । ଗବେଷଣା ପାଇଁ ଏହି ପାଣ୍ଠି ଦେଉଥିଲା ଆମେରିକା । ରାଷ୍ଟ୍ରପତି ଜୋ ବାଇଡେନ୍‌ ଏ ସଂକ୍ରାନ୍ତ ଏକ ବିଧେୟକକୁ ସଂସଦରେ ପାରିତ କରିଛନ୍ତି । କରୋନା ଭୂତାଣୁ ଲିକ୍‌ ହେବା ସଂକ୍ରାନ୍ତ ଦସ୍ତାବିଜ ସାର୍ବଜନୀନ ନ କରିବା ଏବଂ ସୁରକ୍ଷା ନିୟମକୁ ଅନୁପାଳନ ନ କରିବା ଅଭିଯୋଗରେ ଚୀନ୍‌ ବିରୋଧରେ ଏଭଳି କାର୍ଯ୍ୟାନୁଷ୍ଠାନ ନିଆଯାଇଥିବା କହିଛି ଆମେରିକା ।

ରିପୋର୍ଟରେ ଦାବି କରାଯାଇଛି ଯେ ଚୀନ୍‌ ନିଜ ଦେଶରେ କୋଭିଡ-୧୯ ଯୋଗୁ ପ୍ରାଣ ହରାଇଥିବା ଲୋକଙ୍କ ତଥ୍ୟ ଡିଲିଟ୍‌ କରିଦେଇଛି । ୨୦୧୯ରେ ବ୍ୟାପିଥିବା କରୋନା ଭୂତାଣ ଧୀରେ ଧୀରେ ବିଶ୍ୱକୁ ବ୍ୟାପିଯାଇଥିଲା । ଫଳରେ ବିଶ୍ୱବ୍ୟାପୀ ଭୟଙ୍କର ସ୍ୱାସ୍ଥ୍ୟ ସଂକଟ ଉପୁଜୁଥିଲା । ଚୀନ୍‌ ଜାଣିଶୁଣି କରୋନା ଭୂତାଣୁ ସୃଷ୍ଟି କରିଥିବା ଆମେରିକା, ଅଷ୍ଟ୍ରେଲିଆ ଭଳି ଦେଶ ଦାବି କରିଥିଲେ । ଉହାନ ଲାବ୍‌ରୁ ଏହି ଭୂତାଣୁ ଲିକ୍‌ ହୋଇଥିବା କୁହାଯାଇଥିଲା । ଧୀରେ ଧୀରେ ଏହା ପ୍ରମାଣିତ ହୋଇଥିଲା ।

ବ୍ଲୁମ୍‌ବର୍ଗର ଏକ ରିପୋର୍ଟ ମୁତାବକ, ବାଇଡେନ୍‌ ସରକାର ଉହାନ୍‌ ଲ୍ୟାବ୍‌କୁ ପାଣ୍ଠି ଯୋଗାଣ ବନ୍ଦ ପାଇଁ ନିର୍ଦ୍ଦେଶ ଜାରି କରିଛନ୍ତି । ଏ ନେଇ ଚୀନ୍‌ ସରକାର ଏବଂ ଉହାନ୍‌ ଲ୍ୟାବ୍‌କୁ ଔପଚାରିକ ଭାବେ ସୂଚନା ଦିଆଯାଇଛି । ଗତବର୍ଷ ସେପ୍ଟେମ୍ବରରେ ଆମେରିକାର ସ୍ୱାସ୍ଥ୍ୟ ସେବା ବିଭାଗ ଉହାନ୍‌ ଲାବ୍‌ରୁ କୋଭିଡ-୧୯ ଭୂତାଣୁ ଲିକ୍‌ ହୋଇଥିବା ସନ୍ଦେହରେ ତଦନ୍ତ ଆରମ୍ଭ କରିଥିଲା । ଏଥିରୁ ଜଣାପଡ଼ିଥିଲା ଯେ ଉହାନ ଲ୍ୟାବ୍‌ କର୍ତ୍ତୃପକ୍ଷ ତଦନ୍ତ ପାଇଁ ଜରୁରି ଦସ୍ତାବିଜ ଦେଇ ନ ଥିଲେ ।

ଏହାବ୍ୟତୀତ ଏତେ ସମ୍ବେଦନଶୀଳ ଲ୍ୟାବ୍‌ରେ ଭୂତାଣୁ ଲିକ୍‌ ରୋକିବା ପାଇଁ ସୁରକ୍ଷା ପଦକ୍ଷେପ ଆପଣାଯାଇ ନ ଥିଲା । ଏହି ରିପୋର୍ଟ ପ୍ରକାଶ ପାଇବା ପରେ ଆମେରିକା କାର୍ଯ୍ୟାନୁଷ୍ଠାନ ନେଇଛି । ତେବେ ୨୦୨୦ ଜୁଲାଇ ପରଠାରୁ ଏହି ଲ୍ୟାବ୍‌କୁ ପାଣ୍ଠି ଯୋଗାଣ ବନ୍ଦ ରହିଥିଲା । କିନ୍ତୁ ଏବେ ଔପଚାରିକ ସ୍ତରରେ ଏହି ନିଷ୍ପତ୍ତି ବାବଦରେ ସୂଚନା ଦିଆଯାଇଛି ।

ଗତବର୍ଷ ‘ନ୍ୟୁୟର୍କ ପୋଷ୍ଟ’ରେ କୋଭିଡ-୧୯ ସଂକ୍ରାନ୍ତରେ ସମ୍ବେଦନଶୀଳ ରିପୋର୍ଟ ପ୍ରକାଶ ପାଇଥିଲା । ଏହା ମୁତାବକ ବୈଜ୍ଞାନିକଙ୍କ ଦ୍ୱାରା କୋଭିଡ ସୃଷ୍ଟି କରାଯାଇଥିଲା । ଏହା ଉହାନ ଇନ୍‌ଷ୍ଟିଚ୍ୟୁଟ୍‌ ଅଫ୍‌ ଭାଇରୋଲୋଜିରୁ ଲିକ୍‌ ହୋଇଥିଲା । ଏହି ଲ୍ୟାବ୍‌କୁ ଚୀନ୍‌ ସରକାର ପାଣ୍ଠି ଯୋଗାଉଛନ୍ତି । ସୁରକ୍ଷା ପଦକ୍ଷେପରେ ଅବହେଳା ଯୋଗୁ ଏହା ଲିକ୍‌ ହୋଇ ସାରା ବିଶ୍ୱକୁ ବ୍ୟାପିଯାଇଥିଲା ।

you can also read..