ନୂଆଦିଲ୍ଲୀ: ରୁଷ-ୟୁକ୍ରେନ ଯୁଦ୍ଧକୁ ଗୋଟିଏ ବର୍ଷ ପୂରିବାକୁ ଯାଉଛି । ନିକଟ ଭବିଷ୍ୟତରେ ଦୁଇ ଦେଶ ମଧ୍ୟରେ ସଂଘର୍ଷ ଶେଷ ହେବାର କୌଣସି ସମ୍ଭାବନା ନଜର ଆସୁ ନାହିଁ । ରୁଷ ଲଗାତାର ନିଜ ଆକ୍ରମଣରେ ୟୁକ୍ରେନ ଉପରେ ନିଆଁ ବର୍ଷା କରାଉଛି, ଅନ୍ୟପଟେ ୟୁକ୍ରେନ ମଧ୍ୟ ନିଜର ପୂର୍ଣ୍ଣ ସାମର୍ଥ୍ୟ ସହ ଲଢେଇ କରୁଛି । ଦୁଇ ଦେଶ ମଧ୍ୟର ଯୁଦ୍ଧରେ ୟୁରୋପୀୟ ଦେଶ ଏବଂ ଆମେରିକା ନିଜ ନିଜ ବଳ ଅନୁସାରେ ୟୁକ୍ରେନକୁ ସହଯୋଗ କରୁଛନ୍ତି । ଏହାରି ଭିତରେ ଆମେରିକା ଏକ ବଡ଼ ନିଷ୍ପତ୍ତି ନେଇ ୟୁକ୍ରେନକୁ ଏଫ-୧୬ ଯୁଦ୍ଧ ବିମାନ ଦେବାଠାରୁ ପଛକୁ ହଟିଛି ।

ଆମେରିକା ରାଷ୍ଟ୍ରପତି ଜୋ ବାଇଡେନ କହିଛନ୍ତି ଯେ ରୁଷ ବିରୁଦ୍ଧ ଲଢେଇରେ ୟୁକ୍ରେନ ଯେଉଁ ଏଫ-୧୬ ଯୁଦ୍ଧ ବିମାନର ସହାୟତା ଲୋଡିଛି, ତାହା ଆମେରିକା ଦେବ ନାହିଁ । ଉଲ୍ଲେଖଯୋଗ୍ୟ ଯେ ଗତ ସପ୍ତାହରରେ ଆମେରିକା ଏବଂ ଜର୍ମାନୀ ପକ୍ଷରୁ ରୁଷ ସେନା ବିରୋଧରେ ଲଢେଇ ପାଇଁ ୟୁକ୍ରେନକୁ ଟ୍ୟାଙ୍କ ଉପଲବ୍ଧ କରାଯିବ ବୋଲି ଘୋଷଣା କରାଯାଇଥିଲା ।

ମିଡିଆ ରିପୋର୍ଟ ଅନୁସାରେ, ଗତ କିଛି ସପ୍ତାହ ମଧ୍ୟରେ ପାଶ୍ଚ୍ୟାତ ଦେଶ ଗୁଡିକ ପକ୍ଷରୁ ୟୁକ୍ରେନକୁ ଶତାଧିକ ଆଧୁନିକ ଟ୍ୟାଙ୍କ ଏବଂ ସାମରିକ ବାହାନ ଉପଲବ୍ଧ କରାଯାଇଛି । ଏହି ଟ୍ୟାଙ୍କ ଗୁଡିକ ଅତ୍ୟଧିକ ଥଣ୍ଡାରେ ୟୁକ୍ରେନ ସୈନିକଙ୍କୁ ଯୁଦ୍ଧ ଲଢିବାରେ ସହାୟତା ପ୍ରଦାନ କରିବେ । କିନ୍ତୁ ଏସବୁ ଭିତରେ ଆମେରିକାର ଏହି ପଦକ୍ଷେପ ଏବେ ଅନ୍ତରାଷ୍ଟ୍ରୀୟ ସ୍ତରରେ ଚର୍ଚ୍ଚାର ବିଷୟ ପାଲଟିଛି ।