ଭଡା ଘରେ ରଖୁଛନ୍ତି, ଫୋନ୍ କଲେ ଘରେ ନେଇ ଛାଡୁଛନ୍ତି
20/02/2023 at 2:55 PM
ଭୁବନେଶ୍ୱର ୨୦।୦୨ : କିଛି ଦିନ ପରେ ବ୍ରହ୍ମପୁର ସହରରେ ପୁଣି ଆକ୍ଟିଭ୍ ସେକ୍ସ ରାକେଟ୍ । ଦଲାଲମାନେ ପୁଣି ଆରମ୍ଭ କଲେଣି ଦେହର ସଉଦା । ଏବେ ଆଉ ଜାଗାରେ ହେଉନି ଡିଲ୍ । ଫୋନ୍ରେ ହେଉଛି ବୁକିଂ, ଆଉ ଦେହଜୀବୀଙ୍କୁ ଘରେ ନେଇ ଛାଡିଦେଇଛନ୍ତି କାର୍ପଟଦାର । ସହରର ବିଭିନ୍ନ ଅଞ୍ଚଳରେ ଏପରି କାରବାର ଚାଲିଥିଲେ ବି ପୋଲିସ ପାଖରେ ଖବର ନାହିଁ ।
ଖବର ଅନୁଯାୟୀ, ସହରର ବିଭିନ୍ନ ଥାନା ଅଞ୍ଚଳରେ ଘର ଭଡ଼ାରେ ନେଇଛନ୍ତି ଦଲାଲ । ସେଠାରେ ଦେହଜୀବୀଙ୍କୁ ଆଣି ରଖୁଛନ୍ତି । ଫୋନ୍ରେ ବୁକିଂ ପରେ ଗ୍ରାହକଙ୍କ ପାଖକୁ ନେଇ ଯାଉଛନ୍ତି ଦଲାଲ । ସେଠାରେ ହିଁ ଦରଦାମ୍ ଛିଡୁଛି । ଏବେ ଦୁଇ ସପ୍ତାହ ହେଲା କାରବାର ଆକ୍ଟିଭ୍ ହୋଇଥିବା ବିଶ୍ୱସ୍ତ ସୂତ୍ରରୁ ଜଣାପଡିଛି । ଏଥିରେ କିଛି ପୁରୁଣା କିଙ୍ଗ୍ପିନ୍ ମଧ୍ୟ କାମ କରୁଛନ୍ତି । ଓଡ଼ିଆ ଓ ଅଣଓଡ଼ିଆ ଝିଅଙ୍କୁ କାରବାରରେ ନିୟୋଜିତ କରୁଛନ୍ତି ଦଲାଲ ।
ଅକ୍ଟୋବର ୩୧ ତାରିଖରେ ସୂଚନା ପାଇ ବ୍ରହ୍ମପୁର ଏସ୍ପି ଏକ ଗେଷ୍ଟ ହାଉସ୍ରେ ଚଢ଼ଉ କରିଥିଲେ । ସେଠାରେ ୩ ଜଣ ଅଣଓଡ଼ିଆ ଝିଅଙ୍କୁ ଉଦ୍ଧାର କରିଥିଲା ପୁଲିସ । କୋଲକାତାରୁ ସେମାନଙ୍କୁ ଅଣାଯାଇଥିବା ପରବର୍ତ୍ତୀ ସମୟରେ ଜଣାପଡିଥିଲା । କୋର୍ଟରେ ସେମାନଙ୍କୁ ହାଜର ପରେ ପରିବାର ଲୋକଙ୍କ ଜିମାରେ ଦିଆଯାଇଥିଲା । ଏହି ରାକେଟ୍ର ମୁଖ୍ୟ ଗୋପୀ ସହ କିଛି ସହଯୋଗୀ ଓ ଗ୍ରାହକଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଥିଲା । ଦୀର୍ଘ ୪ମାସ ସେମାନେ ଜେଲ୍ରେ ଥିଲେ । କେବଳ ଏହି ଗୋଟିଏ ନୁହେଁ, ଅନନ୍ତ ନଗରରେ ମଧ୍ୟ ଚାଲିଥିବା ଏକ ସେକ୍ସ ରାକେଟ୍ରେ ପୁଲିସ ଚଢ଼ଉ କରି ଅଭିଯୁକ୍ତଙ୍କୁ ଗିରଫ କରିଥିଲା । ସବୁଠୁ ଗୁରୁତ୍ୱପୂର୍ଣ୍ଣ ବିଷୟ ହେଲା କମ୍ ବୟସ ଝିଅଙ୍କୁ ଟଙ୍କା ପ୍ରଲୋଭନ ଦେଖାଇ ଦେହ ବେପାରରେ ଲଗାଉଛନ୍ତି କିଙ୍ଗପିନ୍ ।
ସେହିପରି ବୈଦ୍ୟନାଥପୁର ଥାନା ପୁଲିସ ଜଣେ ନିଖୋଜ ନାବାଳିକାଙ୍କୁ ଉଦ୍ଧାର କରିବା ପରେ ଏହି ଘଟଣାର ପର୍ଦ୍ଦାଫାସ ହୋଇଥିଲା । ସଂପୃକ୍ତ ମାମଲାରେ ଜଣେ ମହିଳା ଓ ତାଙ୍କ ସହଯୋଗୀଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ପୁଲିସ । ଛଅ ମାସ ପରେ ଅଭିଯୁକ୍ତମାନେ ଜାମିନ୍ରେ ମୁକୁଳିଥିଲେ ।
ଦେହ କାରବାରରେ ସଂପୃକ୍ତ ରହୁଥିବା ଅଭିଯୁକ୍ତମାନେ ଜେଲ୍ରୁ ଫେରିବା ପରେ ସେମାନଙ୍କ ଉପରେ ନଜର ରଖୁନି ପୁଲିସ । ଫଳରେ ପୁଣି ସକ୍ରିୟ କାରବାରକୁ ଚଳାଉଛନ୍ତି । ଥାନା ସୀମାନ୍ତ ଅଞ୍ଚଳରେ ଏହି କାରବାର ଚାଲୁଛି । ଗୋଳନ୍ଥରା-ଗୋସାଇଁନୂଆଗାଁ, ବୈଦ୍ୟନାଥପୁର-ଟାଉନ୍ ଥାନା, ସଦର- ନିମଖଣ୍ଡି ଥାନା ସୀମାନ୍ତ ଅଞ୍ଚଳରେ ଏବେ ଦେହ କାରବାର ଚାଲୁଥିବା ସୂଚନା ମିଳିଛି । ଅଣ ଓଡ଼ିଆ ଝିଅଙ୍କୁ ଆଣି ଏଠାରେ ଦେହ ବେପାରରେ ଲଗାଯାଉଥିବା ବେଳେ ସନ୍ଧ୍ୟାରୁ ଆରମ୍ଭ ହେଉଛି କାରବାର । ଚିହ୍ନା ଲୋକ ହିଁ ଫୋନ୍ରେ ବୁକିଂ କରୁଛନ୍ତି ।
