ଭଦ୍ରକ ୧୯।୦୩ :  ପିଡିଏସ ଚାଉଳରୁ ବାହାରୁଛି ପ୍ଲାଷ୍ଟିକ ଚାଉଳ।  ଖାଦ୍ୟ ଉପଯୋଗୀ ହୋଇପାରୁନି ଚାଉଳ । ଏହି ନିମ୍ନମାନର ଚାଉଳ ନେଇ ହତାଶ ଗରିବ ହିତାଧିକାରୀ  । ଭଦ୍ରକ ଜିଲ୍ଲାର ଭଣ୍ଡାରିପୋଖରୀ ବ୍ଲକ ନିର୍ଗୁଣ୍ଡି ପଞ୍ଚାୟତରୁ ଆସିଛି ଏପରି ଅଭିଯୋଗ ।

ଖବର ଅନୁଯାୟୀ,  ପଞ୍ଚାୟତରୁ ଜନୈକ ଡିଲରଙ୍କ ପାଖରୁ ନିର୍ଗୁଣ୍ଡି ଗାଁର ଲୋକମାନେ ଖାଦ୍ୟ ସୁରକ୍ଷା ଯୋଜନାରେ ପ୍ରତିମାସ ପରି ଚଳିତ ମାସ ଚାଉଳ ନେଇଥିଲେ । ରୋଷେଇ କଲା ବେଳେ ପ୍ଲାଷ୍ଟିକ ଗନ୍ଧ ବାହାରିବା ସହିତ ଚାଉଳ ଫୁଟୁନାହିଁ । ପାଣିରେ  ପ୍ଲାଷ୍ଟିକ ଚାଉଳ ଭାସୁଥିବା କହିଛନ୍ତି ସ୍ଥାନୀୟ ଲୋକେ । ଯଦି କେହି ଖାଇ ଦେଉଛନ୍ତି,  ତେବେ ତାଙ୍କରେ  ଦାନ୍ତରେ ଲାଗି ରହିବା ସହିତ ଝାଡା ମଧ୍ୟ ହେଉଛି ।  ତେଣୁ ଗରିବ ହିତାଧିକାରୀମାନେ ଏହି ଚାଉଳକୁ ନେଇ ହଇରାଣ ହରକତ ହେଉଛନ୍ତି । ଗାଁର ଗରିବ ଲୋକମାନେ ଏହି ପିଡ଼ିଏସ ଚାଉଳ ଉପରେ ନିର୍ଭର କରିଥାନ୍ତି ।

ସେପଟେ ଚାଉଳରେ ପ୍ଲାଷ୍ଟିକ ବାହାରୁ ଥିବାରୁ ସେମାନେ ତାହାକୁ ରୋଷେଇ କରିପାରୁନାହାନ୍ତି । ସମ୍ପୃକ୍ତ ଡିଲରଙ୍କୁ ସେମାନେ ପଚାରିବାରୁ, ସେ କହୁଛନ୍ତି ବସ୍ତାରୁ ଯାହା ଆସିଥିଲା ତାକୁ ଆମେ ଦେଉଛୁ । ମୁଁ କିଛି କରିପାରିବିନାହିଁ । ତେବେ ଏହି ପ୍ଲାଷ୍ଟିକ ଚାଉଳ କିପରି ପିଡ଼ିଏସ ଚାଉଳରେ ଆସିଲା । ତାର ତଦନ୍ତ ହେବା ସହିତ ସମ୍ପୃକ୍ତ ହିତାଧିକାରୀଙ୍କୁ ଭଲ ଚାଉଳ ଦେବାକୁ ସେମାନେ ନିବେଦନ କରିଛନ୍ତି ।