ଭଦ୍ରକ ୨୧।୦୩ : ସ୍ୱାସ୍ଥ୍ୟକେନ୍ଦ୍ରର ଜାଗା ପରିବର୍ତ୍ତନ ନେଇ ବିବାଦ। ଗ୍ରାମବାସୀମାନେ ନୂଆ ପ୍ରସ୍ତାବିତ ସ୍ଥାନକୁ ବିରୋଧ କରିବା ସହ ମେଳି ବାନ୍ଧି ଏକଜୁଟ୍‌ ହୋଇଛନ୍ତି । ପୂର୍ବରୁ ଯେଉଁ ସ୍ଥାନ ଚୟନ ହୋଇଛି । ସେହିଠାରେ ହିଁ ସ୍ୱାସ୍ଥ୍ୟକେନ୍ଦ୍ର ହେବାକୁ ଅଡି ବସିଛନ୍ତି ଗ୍ରାମବାସୀ । ଭଦ୍ରକ ଜିଲ୍ଲା ଭଣ୍ଡାରିପୋଖରୀ ବ୍ଲକ ପାଟୁଳି ପଞ୍ଚାୟତରେ ଏମିତି ସ୍ଥିତି ପାଇଁ ଲଟକି ରହିଛି ସ୍ୱାସ୍ଥ୍ୟକେନ୍ଦ୍ରର ନିର୍ମାଣ ।

ଭଦ୍ରକ ଜିଲ୍ଲା ଭଣ୍ଡାରିପୋଖରୀ ପଞ୍ଚାୟତସମିତି ଅଧିନ ପାଟୁଳି ପଞ୍ଚାୟତରେ ଏବେ ଗ୍ରାମବାସୀମାନେ ମେଳି ବାନ୍ଧିଲେଣି । ପୂର୍ବରୁ ପାଟୁଳି ପଞ୍ଚାୟତ କାର୍ଯ୍ୟାଳୟ ଠାରୁ ଅଳ୍ପ ଦୂରରେ ହେଲଥ ସବ ସେଣ୍ଟର ପାଇଁ ୬ ଡିସିମିଲ ସ୍ଥାନ ଚୟନ ହୋଇଥିଲା । କିନ୍ତୁ ପରେ ପୁଣି ଏହି ସ୍ଥାନ ପରିବର୍ତ୍ତେ ମୋବାରକପୁର ନିକଟରେ ନୂଆ ସ୍ଥାନ ଚୟନ ହୋଇଛି । ଏବେ ପୂର୍ବ ନିର୍ଦ୍ଧାରିତ ସ୍ଥାନ ପରିବର୍ତ୍ତନ ନେଇ ସୂଚନା ପାଇବା ପରେ ସ୍ଥାନୀୟ ଗ୍ରାମବାସୀ ଏକଜୁଟ ହୋଇଛନ୍ତି । ଏହି ସବ ସେଣ୍ଟର ପୂର୍ବ ନିର୍ଦ୍ଧାରିତ ସ୍ଥାନରେ ନିର୍ମାଣ ପାଇଁ ଦାବି କରିବା ସହ ଉପରିସ୍ଥ ଅଧିକାରୀଙ୍କୁ ଭେଟି ଅଭିଯୋଗ ମଧ୍ୟ କରିଛନ୍ତି ।

ସ୍ଥାନୀୟ ଲୋକଙ୍କ ଅନୁସାରେ, ପାଟୁଳି ପଞ୍ଚାୟତ ଅଧିନରେ ପୂର୍ବରୁ ନିର୍ଦ୍ଧାରିତ ସ୍ଥାନ ଭଣ୍ଡାରିପୋଖରୀ ଗୋଷ୍ଠି ସ୍ୱସ୍ଥ୍ୟକେନ୍ଦ୍ର ଠାରୁ ୭ କିଲୋମିଟର ଦୂର । କିନ୍ତୁ ଏବେ ଯେଉଁ ସ୍ଥାନ ନିର୍ଦ୍ଧାରିତ ହୋଇଛି ସେହି ସ୍ଥାନ ପାଟୁଳି ପଞ୍ଚାୟତ ଠାରୁ ୫ କିମି ଓ ଭଣ୍ଡାରିପୋଖରୀ ସ୍ୱସ୍ଥ୍ୟକେନ୍ଦ୍ର ଠାରୁ ମାତ୍ର ଦେଢ଼ କିଲୋମିଟର ଦୂର । ପାଟୁଳି ଠାରେ ସବ ସେଣ୍ଟର ହେଲେ ୧୩ଟି ୱାର୍ଡର ଲୋକେ ଉପକୃତ ହୁଅନ୍ତେ । କିନ୍ତୁ ଭଦ୍ରକ ଜିଲ୍ଲା ଚିକିତ୍ସାଧିକାରୀ ଙ୍କ କହିବା କଥା ଯେ ପୂର୍ବ ରୁ ଚିହ୍ନଟ ସ୍ଥାନ ଉପଯୁକ୍ତ ହେଉ ନାହିଁ, ବିବାଦ ପାଇଁ ସବ ସେଣ୍ଟର ନିର୍ମାଣ ହୋଇପାରିନାହିଁ । ଖୁବ ଶୀଘ୍ର ସମାଧାନ କରି କାର୍ଯ୍ୟ ଆରମ୍ଭ ହେବ ।