ନୂଆଦିଲ୍ଲୀ: ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ ରବିବାର ୨୦୨୨-୨୩ ପାଇଁ ଖେଳାଳିଙ୍କ ସହ ବାର୍ଷିକ ଚୁକ୍ତି ନେଇ ଘୋଷଣା କରିଛି । ରିଟେନରଶିପ ସୂଚୀକୁ ବିସିସିଆଇ ମାର୍ଚ୍ଚ ୨୬ ରାତିରେ ଘୋଷଣା କରିଛି । ଏଥିରେ ମୋଟ ୨୬ ଜଣ ଖେଳାଳିଙ୍କୁ ସ୍ଥାନ ମିଳିଛି । ବିସିସିଆଇ ଚାରୋଟି ବର୍ଗରେ ଏହି ଖେଳାଳିଙ୍କୁ ରଖିଛି । ଶୀର୍ଷରେ ଏ ପ୍ଲସ୍ ବର୍ଗ ରହିଛି, ଏଥିରେ ଚାରି ଖେଳାଳି ସାମିଲ ଅଛନ୍ତି । ତେବେ ଏଥିରେ ଜଣେ ଆହତ ଖେଳାଳି ଅଛନ୍ତି ।

ବିସିସିଆଇ A+, A, B ଏବଂ C କ୍ୟାଟେଗୋରୀରେ ମୋଟ ୨୬ ଖେଳାଳିଙ୍କୁ ରଖିଛି । A+ରେ ୪, A ବର୍ଗରେ ୫, B କ୍ୟାଟଗୋରୀରେ ୬ ଏବଂ C କ୍ୟାଟେଗୋରୀରେ ୧୧ ଖେଳାଳିଙ୍କୁ ରଖିଛି । ୨୦୨୨ ଅକ୍ଟୋବରରୁ ୨୦୨୩ ଯାଏ ଏହି ଖେଳାଳିଙ୍କ ସହ ବର୍ଷିକ ଚୁକ୍ତି କରାଯାଇଛି । ଶୀର୍ଷ ବର୍ଗରେ ଥିବା ଖେଳାଳିଙ୍କୁ ବାର୍ଷିକ ୭ କୋଟି ଟଙ୍କା, A କ୍ୟାଟେଗୋରୀ ପାଇଁ ୫ କୋଟି ଟଙ୍କା, B କ୍ୟାଟେଗୋରୀ ପାଇଁ ୩ କୋଟି ଟଙ୍କା ଏବଂ C କ୍ୟାଟେଗୋରୀ ଖେଳାଳିଙ୍କୁ ୧-୧ କୋଟି ମିଳିବ ।

ବିସିସିଆଇର A+ କ୍ୟାଟେଗୋରୀରେ ରୋହିତ୍ ଶର୍ମା, ବିରାଟ କୋହଲି, ଜଶପ୍ରୀତ ବୁମରାହ ସାମିଲ ଅଛନ୍ତି । A କ୍ୟାଟେଗୋରୀରେ ହାର୍ଦ୍ଦିକ ପାଣ୍ଡ୍ୟା, ଆର, ଅଶ୍ୱିନ, ମହମ୍ମଦ ଶାମି, ଋଷଭ ପନ୍ତ ଏବଂ ଅକ୍ଷର ପଟେଲଙ୍କୁ ସାମିଲ କରାଯାଇଛି । ସେହିପରି B କ୍ୟାଟେଗୋରୀରେ ଚେତେଶ୍ୱର ପୂଜାରା, କେଏଲ ରାହୁଲ, ଶ୍ରେୟସ ଆୟର, ମହମ୍ମଦ ଶାମି,ସୂର୍ଯ୍ୟକୁମାର ଯାଦବ ଏବଂ ଶୁଭମନ ଗିଲଙ୍କୁ ସ୍ଥାନ ଦିଆଯାଇଛି ।

C କ୍ୟାଟେଗୋରୀରେ ୧୧ ଜଣଙ୍କୁ ସାମିଲ କରାଯାଇଛି । ଏଥିରେ ଉମେଶ ଯାଦବ, ଶିଖର ଧାୱନ, ଶାର୍ଦୁଲ ଠାକୁର, ଇଶନ କିଷନ, ଦୀପକ ହୁଡ୍ଡା, ୟୁଜବେନ୍ଦ୍ର ଚହଲ, କୁଲଦୀପ ଯାଦବ, ୱାଶିଂଟନ ସୁନ୍ଦର, ସଞ୍ଜୁ ସାମସନ, ଅର୍ଶଦୀପ ସିଂ ଏବଂ କେଏସ ଭାରତ ସାମିଲ ଅଛନ୍ତି ।