ସୋର ୨୯।୪: ଆତଙ୍କ ଦୁନିଆରୁ ଫେରିଆସିଲେ ୬ ଓଡ଼ିଆ, ବଖାଣିଲେ ଅଙ୍ଗେଲିଭା କଥା । ସୁଦାନରେ ଫସିଥିବା ଭାରତୀୟ ନାଗରିକଙ୍କୁ ଘରକୁ ଫେରାଇ ଆଣିବାକୁ କେନ୍ଦ୍ର ସରକାରଙ୍କ ପକ୍ଷରୁ ଅପରେସନ କାବେରୀ ଜାରି ରହିଛି । ଯାତ୍ରୀଙ୍କୁ ପ୍ରଥମେ ନୌସେନାର INS ସୁମେଧାରେ ପୋର୍ଟ ସୁଦାନରୁ ସାଉଦି ଆରବର ଜେଦାହକୁ ଅଣାଯାଉଛି । ଅଶାନ୍ତ ସୁଦାନରୁ ବାଲେଶ୍ବର ସୋର ବ୍ଲକ ବାଳଙ୍ଗ ପଞ୍ଚାୟତ ମୁକ୍ତେଶ୍ଵର ଗାଁର ବସନ୍ତ ମିଶ୍ର ୧୪ ଦିନର ସଂଘର୍ଷ ପରେ ଜନ୍ମମାଟିରେ ପହଞ୍ଚିଛନ୍ତି । ଗୃହଯୁଦ୍ଧରୁ ବାହାରି କଲେ ଗୃହ ପ୍ରବେଶ । ନିଜେ ଯେତିକି ଖୁସି, ତାଠୁ କାହିଁ କେତେ ଗୁଣରେ ଆଶ୍ବସ୍ତ ପୁରା ପରିବାର । ସୁଦାନରେ ଘନ ଘନ ଗୁଳିବର୍ଷା, ଗୋଳାବାରୁଦ ଓ ରକେଟ୍ ମାଡରୁ ଜୀବନ ବଞ୍ଚାଇ ସୁରକ୍ଷିତ ଘରେ ପହଞ୍ଚିଛନ୍ତି । ମରଣ ମୁହଁରୁ ପୁନର୍ଜନ୍ମ ପାଇଛନ୍ତି । ଘରେ ପହଞ୍ଚିବା ପରେ ସ୍ତ୍ରୀ ବାପା ମା’ଙ୍କ ଆଖିରେ ଆନନ୍ଦ ଅଶ୍ରୁ, ଗାଁରେ ଖୁସିରେ ଲହରୀ ଖେଳିଯାଇଛି l ଧନ୍ୟବାଦ ଦେଉଛନ୍ତି କେନ୍ଦ୍ର ଓ ରାଜ୍ୟ ସରକାରଙ୍କୁ । ବସନ୍ତ ୮ ବର୍ଷ ହେବ ସୁଦାନରେ ରହି ଏକ ଷ୍ଟିଲ ପ୍ଲାଣ୍ଟରେ କାମ କରୁଥିଲେ । ହେଲେ ଗତ ୧୪ ତାରିଖରୁ ସେନା ଓ ଅର୍ଦ୍ଧସାମରିକ ବାହିନୀ ମଧ୍ୟରେ ଘମାଘୋଟ ସଂଘର୍ଷ ପରେ ଅସହ୍ୟ ହୋଇପଡିଥିଲା ସେଠାରେ ରହିବା । ଏଇ ୧୪ ଦିନ ଭିତରେ ତାଙ୍କ ସହ କ’ଣ ଘଟିଛି, ବଖାଣିଛନ୍ତି ଆତଙ୍କର ଭୟାନକ ଘଟଣା ।

ସୂଚନାଯୋଗ୍ୟ ଯେ, ସୁଦାନରୁ ଏବେ ସୁଦ୍ଧା ଫେରିଲେଣି ୧୬ ଶହ ପ୍ରବାସୀ ଭାରତୀୟ । ଭାରତୀୟଙ୍କୁ ସୁଦାନରୁ ଉଦ୍ଧାର ପାଇଁ ଚାଲିଛି ଅପରେସନ୍ କାବେରୀ । ଏନେଇ ବିଦେଶ ମନ୍ତ୍ରାଳୟ ସୂଚନା ଦେଇଛି । ସାଉଦୀ ଆରବରେ ଟ୍ରାନଜିଟ୍ କ୍ୟାମ୍ପ୍ କରାଯାଇଥିବା ବିଦେଶ ମନ୍ତ୍ରୀ ଏସ୍. ଜୟଶଙ୍କର ସୂଚନା ଦେଇଛନ୍ତି । ସୁଦାନରେ ସାଢେ ୩ ହଜାର ଭାରତୀୟଙ୍କ ସହ ୧ ହଜାର ଭାରତୀୟ ବଂଶୋଦ୍ଭବ ଫସିଥିବା ସୂଚନା ଦିଆଯାଇଛି ।

ସେପଟେ ସାଉଦି ଆରବ ଏବଂ ଆମେରିକାର ପ୍ରୟାସ ପରେ ସୁଦାନରେ ମୁହାମୁହିଁ ହୋଇଥିବା ସେନା ଏବଂ ଅର୍ଦ୍ଧସୌନିକ ବଳ, ୭୨ ଘଣ୍ଟା ପାଇଁ ଯୁଦ୍ଧ ବିରତି ଘୋଷଣା କରିଛନ୍ତି । ରବିବାର ରାତି ୧୨ଟା ପର୍ଯ୍ୟନ୍ତ ଯୁଦ୍ଧ ବିରତି ଘୋଷଣା କରାଯାଇଥିବା ବେଳେ ଏହି ସମୟରେ ବିଭିନ୍ନ ଦେଶ ସେମାନଙ୍କ ନାଗରିକଙ୍କୁ ଉଦ୍ଧାର କରୁଛନ୍ତି । ସିଜ୍ ଫାୟାର ପରେ ବି ରାଜଧାନୀ ଖାର୍ଟୁମ୍ ସମେତ ଅନେକ ସ୍ଥାନରେ ହିଂସା ଲାଗି ରହଛି । ସୁଦାନରେ ଚାଲିଥିବା ଭୟଙ୍କର ଗୃହଯୁଦ୍ଧରେ ଏବେ ସୁଦ୍ଧା ୫୧୨ଜଣଙ୍କ ମୃତ୍ୟୁ ହେଲାଣି । ଏବେକାର ସରକାରଙ୍କୁ ଗାଦିଚ୍ୟୁତ କରିବା ଲାଗି ୧୫ ଏପ୍ରିଲରୁ ସେନା ଏବଂ ପାରା ମିଲିଟାରୀ ଫୋର୍ସ ଭିତରେ ଯୁଦ୍ଧ ଚାଲିଛି । ଏହା ଫଳରେ ସୁଦାନର ଲକ୍ଷ ଲକ୍ଷ ଲୋକ ଖାଇବାକୁ ନପାଇ ଭୋକ ଉପାସରେ ରହିଛନ୍ତି ।