ଢ଼େଙ୍କାନାଳ ୨୧/୦୫: ବାର୍ହା ଫାଶରେ ପଡିଲା ବାଘ । ଫାଶରେ ଲାଗି ଏକ କଲରାପତରିଆ ବାଘର ମୃତ୍ୟୁ ହୋଇଛି । ତିନି ଚାରିଦିନ ପରେ ବନବିଭାଗ ବାଘର ଗଳିତ ମୃତଦେହକୁ ଉଦ୍ଧାର ପରେ ବ୍ୟବଚ୍ଛେଦ କରି ପୋତି ଦେଇଥିବା ଜଣାପଡିଛି । ଢେଙ୍କାନାଳ ବନଖଣ୍ଡର ହିନ୍ଦୋଳ ବନାଞ୍ଚଳ ଓ ଅନୁଗୁଳ ବନ୍ତଳା ବନାଞ୍ଚଳ ସୀମାନ୍ତରେ ଏହି ବାଘର ମୃତଦେହକୁ ଠାବ କରାଯାଇଛି ।
ହିନ୍ଦୋଳ ବନାଞ୍ଚଳର କର୍ଣ୍ଣପୁର ବିଟ ଅନ୍ତର୍ଗତ କୋଇ ସଂରକ୍ଷିତ ଜଙ୍ଗଲର ଶରଣା ବେଡା ନିକଟରୁ କଲରାପତରିଆ ବାଘର ମୃତଦେହକୁ ଉଦ୍ଧାର କରିଛି ବନବିଭାଗ । ତେବେ ଶିକାରୀ ମାନେ ବାର୍ହା ଶିକାର ପାଇଁ ବିଛାଇଥିବା ଫାଶରେ ପଡି ବାଘର ମୃତ୍ୟୁ ଘଟିଥିବା ବନବିଭାଗର ପ୍ରାଥମିକ ତଦନ୍ତରୁ ଜଣାପଡିଛି । ପରେ ବାଘର ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପରେ ପୋତି ଦିଆଯାଇଛି ।
ଏ ସମ୍ପର୍କରେ ହିନ୍ଦୋଳ ବନ କର୍ମଚାରୀମାନେ ତଦନ୍ତ ଜାରି ରଖିଥିବାବେଳେ ସନ୍ଦେହରେ ସ୍ଥାନୀୟ କର୍ଣ୍ଣପୁର ଗ୍ରାମର ୩ ଜଣଙ୍କୁ ଅଟକ ରଖିବା ଘଟଣାରେ କର୍ଣ୍ଣପୁର ଗ୍ରାମବାସୀ ବିରୋଧ କରିଛନ୍ତି । ଫଳରେ ଅଟକ ଥିବା ୩ଜଣଙ୍କୁ ବନବିଭାଗ ଛାଡି ଦେଇଥିବା ବେଳେ ଏହି ବାଘ ମୃତ୍ୟୁ ମାମଲାର ତଦନ୍ତ ଜାରି ରଖିଛି।
