କଟକ: ପାଗ ମେଘୁଆ ରହିଲେ  ବାରବାଟୀ ମ୍ୟାଚ ଖୁବ୍ ରୋମାଞ୍ଚକର ହେବ । ଏପରିକି ହାଲକା ବର୍ଷା ହେଲେ ବି ଭାରତ ଦକ୍ଷିଣ ଆଫ୍ରିକା ମ୍ୟାଚ୍ ସେଭଳି ପ୍ରଭାବିତ ହେବନାହିଁ । ଏପ୍ରକାର ପୂର୍ବାନୁମାନ କରିଛନ୍ତି କ୍ରିକେଟ ଏକ୍ସପର୍ଟ।  ବାରବାଟୀ ଷ୍ଟାଡିୟମର ପିଚ୍ ଓ ଆଉଟଫିଲ୍ଡର କଣ୍ଡିସନ୍ ଉପରେ ଏକ୍ସପର୍ଟଙ୍କ ମତ ହେଲା, ଯେ ଟସ୍ ପ୍ରମୁଖ ଭୂମିକା ନେବ ଏବଂ ବାରବାଟୀ ପିଚରୁ ବିଶାଳ ସ୍କୋର ହେବାର ମଧ୍ୟ ଯଥେଷ୍ଟ ସମ୍ଭାବନା ଅଛି ।

ବାରବାଟୀ ଷ୍ଟାଡିୟମର ପିଚ୍‌କୁ ଅନେକ ଦିନ ଧରି ନିରୀକ୍ଷଣ କରିଆସୁଥିବା ଚିଫ କ୍ୟୁରେଟର ଆଜି ଫାଇନାଲ ଟେଷ୍ଟ କରିଛନ୍ତି , ପିଚ୍ ଭଲ ବାଉନ୍ସ କରୁଛି କି ନାହିଁ ତାହା ଜାଣିବାକୁ ଆଜି ପିଚ୍ ଉପରେ ବଲ୍ ପକା ଯାଉଛି । କହିବାକୁ ଗଲେ ଆସନ୍ତା କାଲିର ମ୍ୟାଚ୍ ପାଇଁ ବାରବାଟୀର ପିଚ୍‌କୁ ସମ୍ପୂର୍ଣ୍ଣ ପ୍ରସ୍ତୁତ କରା ଯାଇଛି । ତେଣେ  ଆଉଟଫିଲ୍ଡ ସମ୍ପର୍କିତ ପ୍ରାୟ ସମସ୍ତ କାମ ଆଜି ସରିଛି। ତେବେ ପାଗ ଆଜି ମଧ୍ୟ କୋହଲା ରହିଛି , ଯଦି ଆସନ୍ତା କାଲି ବି ପାଗ ଏପ୍ରକାର ରୁହେ , ତେବେ ମ୍ୟାଚ୍ ଖୁବ୍ ରୋମାଞ୍ଚକର ହେବ ବୋଲି କହିଛନ୍ତି କ୍ରିକେଟ୍ ଏକ୍ସପର୍ଟ ।

ଦିଲ୍ଲୀ ମ୍ୟାଚରେ ଦକ୍ଷିଣ ଆଫ୍ରିକାର ଜବରଦସ୍ତ ପ୍ରଦର୍ଶନ ବାରବାଟୀରେ ପ୍ରତିଫଳିତ ହୋଇପାରେ। ତେଣୁ ଟିମ୍ ଇଣ୍ଡିଆର ବୋଲିଂ ଲାଇନକୁ ସଜାଡ଼ିବା ବିଶେଷ ଆବଶ୍ୟକ ବୋଲି କହିଛନ୍ତି କ୍ରିକେଟ ଏକ୍ସପର୍ଟ । ଭ୍ରମଣକାରୀ ଦଳ ସାଉଥ୍ ଆଫ୍ରିକାକୁ ରୋକିବାକୁ ହେଲେ ଟିମ୍ ଇଣ୍ଡିଆର ସ୍ପିନରମାନଙ୍କୁ ବାରବାଟୀ ପିଚ୍‌ରେ ଅଧିକ ପରିଶ୍ରମ କରିବାକୁ ପଡିବ। ବିଶେଷ କରି କ୍ୟାପଟେନ ରିଷଭ ପନ୍ତ ଚାପ ମୁକ୍ତହୋଇ ସଠିକ୍ ନିଷ୍ପତ୍ତି ନେଇପାରିଲେ , ବାରବାଟୀରେ ଟିମ୍ ଇଣ୍ଡିଆ ଜିତିବାର ସମ୍ଭାବନା ଅଧିକ ବୋଲି ମତ ପ୍ରକାଶ ପାଇଛି ।

ବାରବାଟୀ ପିଚ୍‌ରେ ଏବେ ୪ ମିଲି ମିଟରର ଘାସ ରହିଛି।  ଯାହା ଏକ ସ୍ପୋର୍ଟିଂ ପିଚ୍ ବୋଲି କ୍ରିକେଟ ଏକ୍ସପର୍ଟ ମତଭୋଷଣ କରିଛନ୍ତି। ତେଣୁ ଏଭଳି ପିଚ୍‌ରୁ ୨୦୦ ରନ ହେବାର ସମ୍ଭାବନା ରହିଛି।