ନୂଆଦିଲ୍ଲୀ: ବାଂଲାଦେଶ ଟିମ୍ ଦିନିଆ ଅନ୍ତର୍ଜାତୀୟ କ୍ରିକେଟରେ ଇତିହାସ ରଚିଛି । ୧୯୮୬ରୁ ଦିନିକିଆ ଇଣ୍ଟରନ୍ୟାସନାଲ କ୍ରିକେଟ୍ ଖେଳୁଥିବା ବାଂଲାଦେଶ ଟିମ୍ ପ୍ରଥମ ଥର ଲାଗି ଏହି ଫର୍ମାଟରେ ୧୦ ୱିକେଟରେ ବିଜୟୀ ହୋଇଛି । ଆର୍ୟଲାଣ୍ଡକୁ ୧୦ ୱିକେଟରେ ହରାଇ ତୃତୀୟ ଦିନିକିଆ ସହ ସିରିଜ୍ ଜିତିଛି ବାଂଲାଦେଶ । ଲକ୍ଷ୍ୟ ପିଛା କରି ବିଜୟ ହାସଲ କରିବାରେ ଏହା ବାଂଲାଦେଶର ସବୁଠୁ ବଡ଼ ବିଜୟ ମଧ୍ୟରେ ଗୋଟିଏ । ବାଂଲାଦେଶ ଆଗରେ ମାତ୍ର ୧୦୨ ରନର ବିଜୟ ଲକ୍ଷ୍ୟ ଥିଲା ।

ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ପ୍ରଥମ ମ୍ୟାଚରେ ବାଂଲାଦେଶ ବିଜୟୀ ହୋଇଥିଲା ଏବଂ ଦ୍ୱିତୀୟ ମ୍ୟାଚ୍ ବର୍ଷ ଯୋଗୁଁ ବାତିଲ ହୋଇଥିଲା । ଏପରି ସ୍ଥିତିରେ ତୃତୀୟ ମ୍ୟାଚ୍ ନିର୍ଣ୍ଣାୟକ ଥିଲା । ଏହି ମୁକାବିଲାରେ ଆର୍ୟଲାଣ୍ଡର ଅଧିନାୟକ ଆଣ୍ଡ୍ରୁ ବାଲବର୍ଣ୍ଣି ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲେ । ତେବେ ଆର୍ୟଲାଣ୍ଡର ଟିମ୍ ୨୮.୧ ଓଭରରେ ମାତ୍ର ୧୦୧ ରନରେ ଆଉଟ୍ ହୋଇଥିଲା । ଟିମର ୯ ବ୍ୟାଟର ଦୁଇ ଅଙ୍କ ଛୁଇଁ ପାରି ନଥିଲେ । ଦୁଇ ବ୍ୟାଟର ଶୂନରେ ଆଉଟ୍ ହୋଇଥିଲେ ।

ବାଂଲାଦେଶ ପାଇଁ ହସନ ମହମୁଦ ୫ ୱିକେଟ୍ ନେଇଥିଲେ । ତସ୍କିନ ଅହମ୍ମଦ ୩ ଏବଂ ଏବାଦତ ହୁସେନଙ୍କୁ ୨ ୱିକେଟ୍ ମିଳିଥିଲା । ଏହାପରେ ୧୦୨ ରନର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ବାଂଲାଦେଶର ଦୁଇ ଓପନର ତମୀମ ଇକବାଲ ଏବଂ ଲିଟନ ଦାସ ଟିମକୁ ସହଜ ବିଜୟ ଦେଇଥିଲେ । ତମୀମ ୪୧ ବଲରୁ ୪୧ ରନ୍ ଏବଂ ଲିଟନ ଦାସ ୩୮ ବଲରେ ୧୦ ଚୌକା ବଳରେ ଅପରାଜିତ ୫୦ ରନ କରିଥିଲେ । ବାଂଲାଦେଶ ଟିମ ୧୩.୧ ଓଭରରେ ୧୦ ୱିକେଟ୍ ହାତରେ ଥାଇ ବିଜୟ ଲକ୍ଷ୍ୟ ହାସଲ କରିଥିଲା । ୧୦ ୱିକେଟରେ ମ୍ୟାଚ୍ ଜିତିବାରେ ବାଂଲାଦେଶ ପାଇଁ ଏହା ହେଉଛି ପ୍ରଥମ ।