ନୂଆଦିଲ୍ଲୀ: ଆସନ୍ତା ଦୁଇ ସପ୍ତାହ ମଧ୍ୟରେ ୨୦ଟି ମିନେରାଲ୍ ବ୍ଲକ ନିଲାମ କରିବାକୁ ଯାଉଛନ୍ତି କେନ୍ଦ୍ର ସରକାର। ଏଥିରେ ଲିଥିୟମ୍ ଏବଂ ଗ୍ରାଫାଇଟ୍ ଖଣି ମଧ୍ୟ ରହିଛି। ଏହି ସୂଚନା ଦେଇଛନ୍ତି ଖଣି ସଚିବ ଭି.ଏଲ୍ କାନ୍ତା ରାଓ। ସେ କହିଛନ୍ତି ଯେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ ଉପରେ ସ୍ୱତନ୍ତ୍ର ନୀତି ପ୍ରସ୍ତୁତ କରିବା ପରେ ବର୍ତ୍ତମାନ ଏହି ଖଣିଜ ପଦାର୍ଥଗୁଡ଼ିକର ପରବର୍ତ୍ତୀ ପର୍ଯ୍ୟାୟରେ ନିଲାମ କରାଯିବ। ସେ କହିଛନ୍ତି ଯେ ନିଲାମ କରିବାକୁ ସରକାର ଏକ ନୋଟିସ୍ ଜାରି କରିବାକୁ ପ୍ରସ୍ତୁତ ଏବଂ ଆସନ୍ତା ଦୁଇ ସପ୍ତାହ ମଧ୍ୟରେ ୨୦ଟି ବ୍ଲକ୍ ପାଇଁ ନିଲାମ କରିବାକୁ ସରକାର ନୋଟିସ୍ ଜାରି କରିବେ।
ଖଣି ସଚିବ କହିଛନ୍ତି ଯେ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥର ଉତ୍ପାଦନ ଏବଂ ପ୍ରକ୍ରିୟାକରଣ ପାଇଁ ୧୦ ରୁ ୧୨ କମ୍ପାନୀ ପାଖରେ ଟେକ୍ନୋଲୋଜି ଉପଲବ୍ଧ ରହିଛି। ସେ କହିଛନ୍ତି ଯେ ଏହି ନିଲାମ ପୂର୍ବରୁ ସମସ୍ତ ଷ୍ଟେକ୍ହୋଲ୍ଡରଙ୍କୁ ନେଇ ଏକ ଓ୍ୱାର୍କସପ୍ ଆୟୋଜନ କରାଯିବ। ଏହି ଖଣିଜ ପଦାର୍ଥର ଖଣି ଏବଂ ପ୍ରକ୍ରିୟାକରଣ ପାଇଁ ଜାତୀୟ ସ୍ତରରେ ରଣନୀତି ପ୍ରସ୍ତୁତ ହେବ।
ଏହାପୂର୍ବରୁ, ୨୦୨୩ ଅକ୍ଟୋବର ୧୧ରେ ଦେଶରେ ପ୍ରଥମ ଥର ପାଇଁ ଲିଥିୟମ, ନିଓବିୟମ ଏବଂ ରେୟାର ଆର୍ଥ ଏଲିମେଣ୍ଟସ୍ (REE) ବ୍ଲକ ନିଲାମ ପାଇଁ ଯୋଜନା ଶେଷ ହୋଇଛି। କ୍ୟାବିନେଟରୁ ନିଲାମ ପାଇଁ ଅନୁମୋଦନ ପାଇବା ପରେ ହିଁ ଏହି ଖଣିଜଗୁଡ଼ିକର ନିଲାମ ପାଇଁ ରାସ୍ତା ସଫା ହୋଇପାରିବ |
କ୍ୟାବିନେଟ୍ ଲିଥିୟମ୍ ରୟାଲଟି ହାରକୁ ୩ ପ୍ରତିଶତରେ ସ୍ଥିରୀକୃତ ହୋଇଛି। ଯାହା ଲଣ୍ଡନ ମେଟାଲ୍ ଏକ୍ସଚେଞ୍ଜରେ ପ୍ରଚଳିତ ଲିଥିୟମ୍ ମୂଲ୍ୟ ଉପରେ ଲାଗୁ ହେବ। ଭାରତରେ ଲିଥିୟମ୍ ପାଇଁ ବହୁତ ଚାହିଦା ରହିଛି। ବୈଦୁତିକ ଯାନ ପାଇଁ ବ୍ୟାଟେରୀ ତିଆରି ପାଇଁ ଲିଥିୟମ୍ ବ୍ୟବହୃତ ହୁଏ। ୨୦୨୩ ଫେବୃଆରୀରେ ଭାରତ ଜାମ୍ମୁ କାଶ୍ମୀରରେ ଲିଥିୟମର ଏକ ବଡ଼ ସଂରକ୍ଷଣ ସ୍ଥାନ ଆବିଷ୍କାର କରିଛି।
