scan steel
web-baneer-728x90
WhatsApp Image 2023-12-06 at 12.52.17
728x90-banner-17.2.24jpg
Untitled-1 copy (1)
previous arrow
next arrow

Prameya News7

Prameya News7, News7 Odia, Odisha Latest News, Odisha Current Headlines, Odisha News Online, Odisha News, khabar odisha,news in oriya

ଦେଶର ୨ନମ୍ବର ଧନୀ ରାଧାକିଶନ୍ ଦମାନି , ୧୮ବର୍ଷରେ ସମ୍ପତ୍ତି ୧.୨ଲକ୍ଷ କୋଟି ଟଙ୍କା

20/02/2020 at 3:34 PM

ନୂଆଦିଲ୍ଲୀ ୨୦/୨: ବ୍ୟବସାୟୀ ରାଧାକିଶନ୍‌ ଦମାନିଙ୍କୁ ନେଇ ଏବେ ଦେଶବ୍ୟାପୀ କାହିଁରେ କେତେ ଚର୍ଚ୍ଚା । ୧୮ ବର୍ଷ ତଳେ ତାଙ୍କୁ କେହି ଚିହ୍ନି ନଥିଲେ । ଏବେ ବ୍ୟବସାୟ ଜଗତ ତାଙ୍କର ଗୁଣଗାନ କରୁଛି । ଆର୍‌ଆଇଏଲ୍‌ ଅଧ୍ୟକ୍ଷ ମୁକେଶ ଅମ୍ବାନିଙ୍କ ପଛକୁ ଭାରତର ଦ୍ୱିତୀୟ ଶ୍ରେଷ୍ଠ ଧନୀ ହେବାର ଗୌରବ ହାସଲ କରିଛନ୍ତି ସେ । ୧୮ ବର୍ଷ ତଳେ ଅର୍ଥାତ୍‌ ୨୦୦୨ରେ ମୁମ୍ବାଇରେ ଗୋଟିଏ କ୍ଷୁଦ୍ର ଷ୍ଟୋର ଖୋଲି ଦେଶର ଖୁଚୁରା ବଜାରରେ ପାଦ ଥାପିଥିଲେ ଦମାନି । ତାଙ୍କର ପରିଶ୍ରମ, ଅଧ୍ୟବସାୟ ଏବଂ ପରିବାର ସଦସ୍ୟଙ୍କ ଅକୁଣ୍ଠ ସହଯୋଗ ତାଙ୍କୁ ଚରମ ସୋପାନରେ ପହଞ୍ଚାଇଛି । ତାଙ୍କର ନିଟ୍‌ ସମ୍ପତ୍ତି ମୂଲ୍ୟ ୧.୨ ଲକ୍ଷ କୋଟି ଟଙ୍କା ଛୁଇଁଛି । ଦେଶରେ ତାଙ୍କର ଖୁଚୁରା ଷ୍ଟୋର ସଂଖ୍ୟା ୨୦୦କୁ ବୃଦ୍ଧି ପାଇଛି । ଷ୍ଟକ୍‌ ମାର୍କେଟ୍‌ରେ ଏବେ ସେ ରାଜ୍‌ କରୁଛନ୍ତି । ତାଙ୍କ କମ୍ପାନିର ସେୟାର କିଣିବା ପାଇଁ ନିବେଶକଙ୍କ ମଧ୍ୟରେ ପ୍ରବଳ ଆଗ୍ରହ ।

ଫୋର୍ବସର ଧନୀ ତାଲିକାରେ ଲମ୍ବା ଲମ୍ଫ ପ୍ରଦାନ କରିଥିବା ଦମାନିଙ୍କ ଆଭିନ୍ୟୁ ସୁପରମାର୍ଟସ (ଡି-ମାର୍ଟ ଷ୍ଟୋର୍‌ ଚଳାଉଥିବା ସଂସ୍ଥା) ୨୦୧୭ରେ ଏହାର ପ୍ରଥମ ଆଇପିଓ ଆରମ୍ଭ କରିଥିଲା । ପ୍ରଥମ ଦିନରେ ଆଭିନ୍ୟୁ ସୁପରମାର୍ଟସର ସେୟାର ମୂଲ୍ୟ ୧୧୪.୩୦% ବଢ଼ିଥିଲା । ଫଳରେ ଏହାର ବଜାର ମୂଲ୍ୟ ୬୧,୭୩୧.୩୨ କୋଟି ଟଙ୍କାରେ ପହଞ୍ଚିଥିଲା । ଏହି ଅଭିବୃଦ୍ଧି ଦମାନିଙ୍କୁ ଦେଶର ଶ୍ରେଷ୍ଠ ୨୦ ଧନୀଙ୍କ ମଧ୍ୟରେ ସ୍ଥାନ ଦେଇଥିଲା ।

ନିକଟରେ ଦମାନିଙ୍କ ଆଭିନ୍ୟୁ ସୁପରମାର୍ଟସର ସେୟାର ମୂଲ୍ୟ ୫%ରୁ ଅଧିକ ବଢ଼ିଛି । ଫଳରେ ଦେଶର ଦ୍ୱିତୀୟ ଧନୀ ଶିବ ନାଦାରଙ୍କୁ ସେ ପଛରେ ପକାଇଛନ୍ତି । ବଜାରରେ ତାଲିକାଭୁକ୍ତ ହେବା ଦିନ କମ୍ପାନିର ସେୟାର ୧୧୪% ବଢ଼ିବା ପଛରେ ଦମାନିଙ୍କ ବ୍ୟବସାୟିକ ସଫଳତା ଲୁଚି ରହିଛି । ୨୦୦୨ରେ ପ୍ରଥମ ଷ୍ଟୋର ଖୋଲିବା ପରେ ଗୋଟିଏ ପରେ ଗୋଟିଏ ସଫଳତାର ଶିଡ଼ି ଚଢ଼ିଥିଲେ ସେ । ଦୀର୍ଘ ୧୫ ବର୍ଷର ରାସ୍ତା ଅତିକ୍ରମ କରିବା ପରେ ନିଜ କମ୍ପାନିକୁ ଷ୍ଟକ୍‌ ମାର୍କେଟ୍‌ରେ ପ୍ରବେଶ କରାଇଥିଲେ ।

୬୫ ବର୍ଷୀୟ ଦମାନି ବହୁ ଆଗରୁ ଭାରତର ଖାଉଟି ବଜାରରେ ରହିଥିବା ସୁଯୋଗକୁ ଭଲ ଭାବେ ଦେଖିପାରିଥିଲେ । ତେଣୁ ଏଥିରେ ନିଜର ପୁଞ୍ଜି ଖଟାଇଥିଲେ । ମୁମ୍ବାଇ ଭିତ୍ତିକ ଡି-ମାର୍ଟ ଏବେ ଖାଦ୍ୟ, ପୋଷାକପତ୍ର ଏବଂ ଅନ୍ୟ ଖାଉଟି ସାମଗ୍ରୀ ଏହାର ୨୦୦ରୁ ଅଧିକ ଷ୍ଟୋରରେ ବିକ୍ରି କରୁଛି । ୨୦୧୯ ମାର୍ଚ୍ଚ ୩୧ରେ ଶେଷ ହୋଇଥିବା ବର୍ଷରେ କମ୍ପାନିର ରାଜସ୍ୱ ୨୦,୭୧୨ କୋଟି ଟଙ୍କା ହୋଇଛି । ବଜାରରେ ତାଲିକାଭୁକ୍ତ ହେବା ଦିନଠାରୁ ତାଙ୍କ କମ୍ପାନିର ସେୟାର ମୂଲ୍ୟ ୨୩୦% ବଢ଼ିଛି ।

ରାଧାକିଶନ୍‌ ଦମାନିଙ୍କୁ ଏତେ ସଫଳତା ମିଳିବା ପଛରେ ତାଙ୍କ ଭାଇ, ପତ୍ନୀ ଏବଂ ସନ୍ତାନ ଅଛନ୍ତି । ଡି-ମାର୍ଟର ଦ୍ରୁତ ଅଭିବୃଦ୍ଧିରେ ଏମାନଙ୍କ ହାତ ରହିଛି । ଆଭିନ୍ୟୁ ସୁପରମାର୍ଟସରେ ତାଙ୍କ ଝିଅ ନିର୍ଦ୍ଦେଶକ ପଦରେ ଅଛନ୍ତି । ଡି-ମାର୍ଟରେ ୫୮% ଅଂଶଧନ ବ୍ରାଇଟ୍‌ ଷ୍ଟାର ପାଖରେ ରହିଛି, ଯାହାର ମାଲିକାନା ଦମାନି, ତାଙ୍କ ପତ୍ନୀ ଏବଂ ପିଲାଙ୍କ ହାତରେ ରହିଛି। ଏବେ ଦେଶର ଦ୍ୱିତୀୟ ଶ୍ରେଷ୍ଠ ଧନୀ ହେବା ପରେ ଦମାନି ପରିବାର ବ୍ୟବସାୟ ଜଗତ ପାଇଁ ଉଦାହରଣ ପାଲଟିଛି ।

   Related Posts