ଢେଙ୍କାନାଳ ୦୧/୦୨: ଆସନ୍ତା ୪ତାରିଖରୁ ବିଶ୍ୱ ପ୍ରସିଦ୍ଧ ଜୋରନ୍ଦା ମେଳା । ଏଥିପାଇଁ ଢେଙ୍କାନାଳର ଜୋରନ୍ଦା ସ୍ଥିତ ମହିମା ଗାଦିରେ ପ୍ରସ୍ତୁତି ଚାଲିଛି । ଏପରିସ୍ଥଳେ ଆଜି ଏହି ଜୋରନ୍ଦାରେ ଏକ ଅଘଟଣ ଘଟିଛି । ଜୋରନ୍ଦା ମେଳାରେ ଯୋଗଦେବା ପାଇଁ ଶ୍ରଦ୍ଧାଳୁ ମାନଙ୍କୁ ନେଇ ମହିମା ଗାଦିକୁ ଯାଉଥିବା ଏକ ଅଟୋ ରିକ୍ସା ଦୁର୍ଘଟଣାର ସମ୍ମୁଖୀନ ହୋଇଛି ।

ଅଟୋ ରିକ୍ସାଟି ଜୋରନ୍ଦା ପ୍ରବେଶ ପଥରେ ଥିବା ମୁଖ୍ୟ ଫାଟକ ନିକଟରେ ଓଲଟି ପଡିଛି । ଫଳରେ ଅଟୋରେ ଥିବା ୯ଜଣା ଯାତ୍ରୀ ଆହତ ହୋଇଛନ୍ତି । ସେମାନଙ୍କ ମଧ୍ୟରେ ୩ଜଣ ଶିଶୁ ଓ ୫ଜଣ ମହିଳା ରହିଥିବା ଜଣାପଡିଛି । ସମସ୍ତେ ରାଉରକେଲା ଅଂଚଳର ବୋଲି ଜଣାପଡିଛି । ଟ୍ରେନରେ ରାଉଳକେଲାରୁ ଆସି ଢେଙ୍କାନାଳ ଷ୍ଟେସନରୁ ଏହି ଅଟୋ ଯୋଗେ ଜୋରନ୍ଦା ମହିମା ଗାଦୀକୁ ଯାଉଥିଲେ ।

ତେବେ ଜୋରନ୍ଦା ମୁଖ୍ୟ ଫାଟକ ନିକଟରେ ଅଟୋଟି ଭାରସାମ୍ୟ ହରାଇ ରାସ୍ତା ପାଶ୍ୱକୁ ଓଲଟି ପଡିଥିଲା । ସ୍ଥାନୀୟ ଲୋକ ମାନେ ଆହତ ଯାତ୍ରୀ ମାନଙ୍କୁ ଉଦ୍ଧାର କରି ସ୍ଥାନୀୟ ଜୋରନ୍ଦା ଡାକ୍ତର ଖାନାରେ ଚିକିତ୍ସା ପାଇଁ ଭର୍ତ୍ତ କରିଥିବା ଜଣାପଡ଼ିଛି । ଆହତ ଯାତ୍ରୀ ମାନେ ସମସ୍ତେ ବିପଦ ମୁକ୍ତ ଥିବା ଡାକ୍ତର ଖାନା ସୂତ୍ରରୁ ଜଣାପଡିଛି ।