ମୁମ୍ବାଇ ୧୪ା୧୧ : ଅଷ୍ଟ୍ରେଲିଆ ବିପକ୍ଷ ଆଗାମୀ ୫ମ୍ୟାଚ୍‌ ବିଶିଷ୍ଟ ଘରୋଇ ଟି-ଟ୍ୱେଣ୍ଟି ସିରିଜ ପାଇଁ ଭାରତୀୟ ଦଳ ଘୋଷଣା କରାଯିବ । ଆହତ ସମସ୍ୟା ଦେଇ ଗତି କରୁଥିବା ଅଲ୍‌ରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଏହି ସିରିଜ ଖେଳିବା ନେଇ ଆଶଙ୍କା ରହିଛି । ତାଙ୍କ ବଦଳରେ ଋତୁରାଜ ଗାଏକୱାଡଙ୍କୁ ମିଳିପାରେ ନେତୃତ୍ୱ ।

ଖବର ଅନୁଯାୟୀ, ଗତ ବାଂଲାଦେଶ ବିପକ୍ଷ ବିଶ୍ୱକପ୍‌ ଲିଗ୍‌ ମୁକାବିଲାରେ ପାଣ୍ଡ୍ୟା ଆହତ ହୋଇଥିଲେ। ବୋଲିଂ କରୁଥିବା ସମୟରେ ତନଜିଦ ହାସାନଙ୍କ ଏକ ସଟ୍‌କୁ ଅଟକାଇବାକୁ ପ୍ରୟାସ କରୁଥିବା ସମୟରେ ପାଣ୍ଡ୍ୟାଙ୍କ ପାଦ ମକଚି ହୋଇଯାଇଥିଲା । ସେ ଏପର୍ଯ୍ୟନ୍ତ ଫିଟ୍‌ ହୋଇନାହାନ୍ତି । ସମ୍ପୂର୍ଣ୍ଣ ଫିଟ୍‌ ହେବା ପାଇଁ ତାଙ୍କୁ ଅତି କମ୍‌ରେ ୭ରୁ ୮ ସପ୍ତାହ ସମୟ ଲାଗିବ ବୋଲି ଜଣାପଡ଼ିଛି । ପାଣ୍ଡ୍ୟା ଭାରତୀୟ ଟି-ଟ୍ୱେଣ୍ଟି ଦଳର ନିୟମିତ ଅଧିନାୟକ । ତେଣୁ ତାଙ୍କ ଅନୁପସ୍ଥିତିରେ ଋତୁରାଜ ଗାଏକୱାଡଙ୍କୁ ନେତୃତ୍ୱ ମିଳିପାରେ ।

ତେବେ ଗାଏକୱାଡଙ୍କ ନେତୃତ୍ୱରେ ଭାରତୀୟ ଦଳ ଗତ ଏସିଆଡ୍‌ରେ ସ୍ୱର୍ଣ୍ଣ ପଦକ ହାସଲ କରିଥିଲା । ଗତ ନେଦରଲାଣ୍ଡ୍‌ସ ବିପକ୍ଷ ଲିଗ୍‌ ମ୍ୟାଚ୍‌ ପୂର୍ବରୁ ପାଣ୍ଡ୍ୟାଙ୍କ ଫିଟ୍‌ନେସ୍‌ ପରୀକ୍ଷା କରାଯାଇଥିଲା । ଦୌଡ଼ିବା ସମୟରେ ସେ ପାଦରେ ଯନ୍ତ୍ରଣା ଅନୁଭବ କରିଥିଲେ । ଫଳରେ ତାଙ୍କୁ ବିଶ୍ୱକପ୍‌ରୁ ବାଦ ଦିଆଯାଇ ପେସ ବୋଲର ପ୍ରସିଦ୍ଧ କ୍ରିଷ୍ଣାଙ୍କୁ ସାମିଲ କରାଯାଇଥିଲା । ଏସିଆଡ଼ ଖେଳିଥିବା ଦଳର ପ୍ରାୟ ସମସ୍ତ ସଦସ୍ୟଙ୍କୁ ଟିଟ୍ୱେଣ୍ଟି ଦଳରେ ସୁଯୋଗ ମିଳିବା ସମ୍ଭାବନା ରହିଛି । କାରଣ ବିଶ୍ୱକପ୍‌ ଦଳର ସମସ୍ତ ଖେଳାଳିଙ୍କୁ ଉକ୍ତ ସିରିଜରୁ ବିଶ୍ରାମ ଦେବାକୁ ଚୟନ କମିଟି ଯୋଜନା କରୁଛି ।

କେଉଁଠି ଓ କେବେ ଖେଳାଯିବ ୫ଟି ଟି-୨୦ ମ୍ୟାଚ୍‌ :

ପ୍ରଥମ ଟି-୨୦ ମ୍ୟାଚ୍‌- ବିଶାଖାପାଟଣା  (ସମୟ- ଅପରାହ୍ନ ୧.୩୦)

ଦ୍ୱିତୀୟ ଟି-୨୦ ମ୍ୟାଚ୍‌-ଥିରୁଅନନ୍ତପୁରମ୍‌   (ସମୟ- ଅପରାହ୍ନ ୧.୩୦)

ତୃତୀୟ ଟି-୨୦ ମ୍ୟାଚ୍‌-ଗୌହ୍ୱାଟୀ   (ସମୟ- ଅପରାହ୍ନ ୧.୩୦)

ଚତୁର୍ଥ ଟି-୨୦ ମ୍ୟାଚ୍‌- ନାଗପୁର   (ସମୟ- ଅପରାହ୍ନ ୧.୩୦)

ପଞ୍ଚମ ଟି-୨୦ ମ୍ୟାଚ୍‌- ହାଇଦ୍ରାବାଦ୍‌  (ସମୟ- ଅପରାହ୍ନ ୧.୩୦)