ଆଠଗଡ଼ ୦୬।୦୨ : ଆଠଗଡ଼ ବଡ଼ମ୍ବା ରେଞ୍ଜରଙ୍କ ହେପାଜତରେ ଅଭିଯୁକ୍ତର ସନ୍ଦେହଜନକ ମୃତ୍ୟୁ ନେଇ ତାତିଲେ ସ୍ଥାନୀୟ ଲୋକ।  ଘଟଣାର ପ୍ରତିବାଦରେ ବଡ଼ମ୍ବା ରେଞ୍ଜ ଅନ୍ତର୍ଗତ ବାଣପୁର ବିଟ୍ ହାଉସ୍ ରେ ଭଙ୍ଗାରୁଜା ସହ ପୋଡାଜଳା କରିଛି ଉତ୍ୟକ୍ତ ଲୋକ ।

ଏପଟେ ହେପାଜତରେ ଅଭିଯୁକ୍ତଙ୍କ ମୃତ୍ୟୁ ଅଭିଯୋଗ ପରେ ଆଠଗଡ ବନଖଣ୍ଡର ଦୁଇ ACFO ଘନଶ୍ୟାମ ମୁଦୁଲି ଏବଂ ହରେକୃଷ୍ଣ ମଲ୍ଲିକଙ୍କ ସହ ବଡ଼ମ୍ବା ରେଞ୍ଜରଙ୍କୁ ଅଟକ ରଖି ପଚରାଉଚରା କରୁଛି ପୋଲିସ । ଏହାସହ ୭ ବନକର୍ମଚାରୀଙ୍କୁ ମଧ୍ୟ ଅଟକ ରଖାଯାଇଛି । ଦୁଇ ଦିନ ତଳେ ବଡ଼ମ୍ବା ରେଞ୍ଜ ଅଞ୍ଚଳରେ ଦନ୍ତାର ମୃତଦେହ ମିଳିଥିଲା । ତାର ଦାନ୍ତ କାଟି ନିଆଯାଇଥିଲା ।

ଦନ୍ତା ହାତୀକୁ ହତ୍ୟା କରିବା ଅଭିଯୋଗରେ ସାତଗୋଛିଆ ଗାଁର ୫୯ ବର୍ଷୀୟ ଧନେଶ୍ବର ବେହେରାଙ୍କୁ ଉଠାଇ ନେଇଥିଲେ ବନ କର୍ମଚାରୀ । ବଡମ୍ବା ରେଞ୍ଜ ଅଫିସରେ ପଚରାଉଚରା କରୁଥିଲେ ।  ସନ୍ଦେହଜନକ ସ୍ଥିତିରେ ଧନେଶ୍ବରଙ୍କ ମୃତ୍ୟୁ ହୋଇଛି । ଏନେଇ ଅଭିଯୋଗ ଆସିବା ପରେ ଆଠଗଡ଼ ଥାନାରେ ବଡମ୍ବା ରେଞ୍ଜରଙ୍କ ସମେତ ୭ବନ କର୍ମଚାରୀ ଅଟକ ରଖିଛି ପୋଲିସ ।

ତେବେ ଘଟଣାର ଗମ୍ଭୀରତାକୁ ଦେଖି ଦୁଇ ACF ଙ୍କୁ ମଧ୍ୟ ପଚରା ଉଚରା କରାଯାଉଛି । ଏପଟେ ୬୫ ନମ୍ବର ଜାତୀୟ ରାଜପଥର ବଡ଼ବାରସିଂହରେ ରାସ୍ତା ଅବରୋଧ କରିଛନ୍ତି ସ୍ଥାନୀୟ ଲୋକ । ଘଟଣାର ଅଧିକ ତଦନ୍ତ ପାଇଁ ଆଠଗଡ଼ ଥାନାରେ ପହଞ୍ଚିଛନ୍ତି ଅତିରିକ୍ତ ଗ୍ରାମାଞ୍ଚଳ ଆରକ୍ଷୀ ଅଧିକ୍ଷକ କୃଷ୍ଣ ପ୍ରସାଦ ପଟ୍ଟନାୟକ।