ନୂଆଦିଲ୍ଲୀ: ପାକିସ୍ତାନ ହାତରୁ ଖସିଲା ଏସିଆ କପ୍ ୨୦୨୩ର ଆୟୋଜନ ଅଧିକାର। ଶନିବାର ଏସିଆ କ୍ରିକେଟ୍ ପରିଷଦ(ଏସିସି) ବୈଠକରେ ଏହି ନିଷ୍ପତ୍ତି ନିଆଯାଇଥିବା ଖବର ସାମ୍ନାକୁ ଆସିଛି। ବିସିସିଆଇ ସଂପାଦକ ଜୟ ଶାହ ଏବଂ ପିସିବି ଅଧ୍ୟକ୍ଷ ନଜମ ସେଠୀଙ୍କ ମଧ୍ୟରେ ଆଜି ବାହାରିନରେ ଅନୁଷ୍ଠିତ ପ୍ରଥମ ଆନୁଷ୍ଠାନିକ ବୈଠକ ପରେ ଏସିସି ଏସିଆ କପ୍‌ ଆୟୋଜନ ପାଇଁ ବିକଳ୍ପ ସ୍ଥାନ ଉପରେ ନିଷ୍ପତ୍ତି ମାର୍ଚ୍ଚରେ ନିଆଯିବ ବୋଲି ନିଷ୍ପତ୍ତି ନିଆଯାଇଛି।

ଏସିଆ କପ୍ ଆୟୋଜନର ଅଧିକାର ପ୍ରଥମରୁ ପାକିସ୍ତାନକୁ ମିଳିଥିଲା। କାର୍ଯ୍ୟସୂଚୀ ଅନୁଯାୟୀ ୨୦୨୩ ସେପ୍ଟେମ୍ବରରେ ପାକିସ୍ତାନରେ ଖେଳାଯିବାର ଥିଲା। ତେବେ ଭାରତ ଏସିଆ କପ୍ ଖେଳିବାକୁ ପାକିସ୍ତାନ ଯିବ ନାହିଁ ବୋଲି ରୋକ୍ ଠୋକ୍ ମନା କରି ଦେଇଛି। ଫଳରେ ଟୁର୍ଣ୍ଣାମେଣ୍ଟ ଅନ୍ୟତ୍ର ଆୟୋଜନ ହେବ। ଏଥିପାଇଁ ଦୌଡରେ ଆଗରେ ରହିଛି  ୟୁଏଇ। ତେବେ ଏହାର ଆନୁଷ୍ଠାନିକ ନିଷ୍ପତ୍ତିକୁ କିଛି ସମୟ ଘୁଞ୍ଚାଇ ଦିଆଯାଇଛି।

ପିସିବି ଅଧ୍ୟକ୍ଷ ନଜମ ସେଠୀଙ୍କ ଅପିଲ୍ କ୍ରମେ ଏସିସି ସଦସ୍ୟ ଦେଶର ସମସ୍ତ ପ୍ରମୁଖ ଏହି ଜରୁରୀକାଳୀନ ବୈଠକରେ ଯୋଗ ଦେଇଥିଲେ। ଆଉ ଏସିସି ଦ୍ଵାରା ଏସିଆରେ ଖେଳାଯିବାକୁ ଥିବା କ୍ରିକେଟ୍‌ ଟୁର୍ଣ୍ଣାମେଣ୍ଟର କାର୍ଯ୍ୟସୂଚୀ ଜାରି କରାଯାଇଛି। ଏଥିରେ ଆୟୋଜନ ତାଲିକାରେ ପାକିସ୍ତାନର ନାମ ନାହିଁ।

ଏହା ଉପରେ ସୂଚନା ଦେଇ ବିସିସିଆଇର ଜୈନକ ବରିଷ୍ଠ ଅଧିକାରୀ କହିଛନ୍ତି, ଏସିସିର ସଦସ୍ୟଙ୍କ ଆଜି ବୈଠକ ହୋଇଛି। ବୈଠକ ବହୁତ ସକରାତ୍ମକ ରହିଛି। ମାତ୍ର ଏସିଆ କପ୍ ପାଇଁ ଆୟୋଜନ ସ୍ଥଳ ଉପରେ ଚୂଡାନ୍ତ ନିଷ୍ପତ୍ତି ମାର୍ଚ୍ଚ ପର୍ଯ୍ୟନ୍ତ ସ୍ଥଗିତ କରାଯାଇଛି। କିନ୍ତୁ ଆଶ୍ଵସ୍ତିର ବିଷୟ ଭାରତର ପାକିସ୍ତାନ ଗସ୍ତ କରିବାର ପ୍ରଶ୍ନ ହିଁ ଉଠୁନି।

ଏ ଖବର ପଢନ୍ତୁ- ଅଷ୍ଟ୍ରେଲିଆ ସିରିଜରେ ଭାରତର ଅସଲ ପରୀକ୍ଷା, ଜିତିଲେ ଦଳକୁ ମିଳିବ ଏହି ସବୁ ସଫଳତା

ପାକିସ୍ତାନ ସଂପ୍ରତି ଦୟନୀୟ ଆର୍ଥିକ ସଙ୍କଟ ଦେଇ ଗତି କରୁଛି। ଏସିଆ କପ୍ ପରି ବଡ ଟୁର୍ଣ୍ଣାମେଣ୍ଟର ଆୟୋଜନ କରିବା ପିସିବି ପାଇଁ କ୍ଷତିକାରକ ହୋଇପାରେ, ଏସିସି ଅନୁଦାନ ଦେଉନା କାହିଁକି।