ନୂଆଦିଲ୍ଲୀ ୨୦/୦୮ ଆଫଗାନିସ୍ତାନରେ ତାଲିବାନ କବଜା ପରେ ମହିଳାମାନେ ନିଜ ଅଧିକାର ଓ ନିଜ ଉପରେ ହେବାକୁଥିବା ନିର୍ଯ୍ୟାତନାକୁ ନେଇ ଭୟରେ ଅଛନ୍ତି। ଭାରତ ସମେତ ବିଶ୍ୱର ଅନେକ ଦେଶ ଆଫଗାନିସ୍ତାନ ସ୍ଥିତି ନେଇ ଚିନ୍ତା ପ୍ରକାଶ କରିଛନ୍ତି। ଅଲ ଇଣ୍ଡିଆ ମଜଲିସ-ଏ-ଇତ୍ତେହାଦୁଲ ମୁସ୍ଲମିନ ମୁଖ୍ୟ ଅସଦୁଦ୍ଦିନ ଓୱେସୀ ଦେଶରେ ମହିଳା ବିରୋଧୀ ଅପରାଧକୁ ନେଇ କେନ୍ଦ୍ରର ମୋଦି ସରକାରଙ୍କୁ ଟାର୍ଗେଟ କରିଛନ୍ତି।
ଓୱେସୀ ହାଇଦ୍ରାବାଦରେ କହିଛନ୍ତି, "ଭାରତରେ ପ୍ରାୟ ୧୦ ପ୍ରତିଶତ ଝିଅଙ୍କ ମୃତ୍ୟୁ ୫ ବର୍ଷରୁ କମ ବୟସରେ ହୋଇଥାଏ। କିନ୍ତୁ ଚିନ୍ତା ଆଫଗାନିସ୍ତାନର। ଭାରତରେ ମହିଳାଙ୍କ ପ୍ରତି ଅନେକ ନିର୍ଯ୍ୟାତନା ହେଉଛି କିନ୍ତୁ କେନ୍ଦ୍ରକୁ ଆଫଗାନିସ୍ତାନ ମହିଳାଙ୍କ ଚିନ୍ତା।"
ତାଲିବାନ ଦ୍ୱାରା ଦ୍ରୁତ ଏବଂ ଅପ୍ରତ୍ୟାଶିତ ଆକ୍ରମଣର ୪ ଦିନ ପରେ ଆଫଗାନିସ୍ତାନ ରାଜଧାନୀ କାବୁଲ ରାସ୍ତାରେ କୌଣସି ମହିଳା ନଜର ଆସିନାହାନ୍ତି। କାବୁଲ ପତନ ପରେ ଅନେକ ବ୍ୟବସାୟୀ ମହିଳାଙ୍କ ସହ ନିଜ ରେସ୍ତୋରାଁ ବନ୍ଦ କରିଦେଇଛି। ତାଲିବାନ କବଜା ପରେ ସମସ୍ତ ଶିକ୍ଷାନୁଷ୍ଠାନ, ସ୍କୁଲ, ବିଶ୍ୱବିଦ୍ୟାଳୟ, ସରକାରୀ ଭବନ ଓ ପ୍ରାଇଭେଟ କ୍ରଯ୍ୟଳୟ ମଧ୍ୟ ବନ୍ଦ କରିଦିଆଯାଇଛି।
୧୯୯୬-୨୦୦୧ର ତାଲିବାନର ବର୍ବର ଶାସନରେ ମହିଳାଙ୍କୁ ଲଗାତାର ମାନବାଧିକାର ଉଲ୍ଲଙ୍ଘନ, ରୋଜଗାର ଓ ଶିକ୍ଷାରୁ ବଞ୍ଚିତ କରାଯାଇଥିଲା। ମହିଳା ଙ୍କୁ ବୁର୍ଖା ପିନ୍ଧିବାକୁ ବାଧ୍ୟ କରାଯାଇଥିଲା। ଜଣେ ସମ୍ପର୍କୀୟ ପୁରୁଷଙ୍କ ବିନା ଘରୁ ବାହାରିବା ଉପରେ ପ୍ରତିବନ୍ଧକ ଲଗାଇ ଦିଆଯାଇଥିଲା।
