ଭୁବନେଶ୍ୱର: ବିଶ୍ଵବିଖ୍ୟାତ ଚିତ୍ରଶିଳ୍ପୀ ଲିଓନାର୍ଡୋ ଦଭିଞ୍ଚିଙ୍କ ଜନ୍ମଦିବସ ଏପ୍ରିଲ ୧୫କୁ ସାରା ବିଶ୍ୱରେ ବିଶ୍ଵ କଳା ଦିବସ ରୂପେ ପାଳନ କରଯାଏ। ଏହି ଅବସରରେ ଧଉଳି ଚାରୁକଳା ମହାବିଦ୍ୟାଳୟର ୨୩ ଜଣ ଛାତ୍ରଛାତ୍ରୀ ଏକ ଚିତ୍ରକଳା ଶିବିର ଓ ପ୍ରଦର୍ଶନୀ ଏବଂ ଇନଷ୍ଟଲେସନ ଆର୍ଟର ଆୟୋଜନ କରିବା ସହିତ ସମସ୍ତ ଛାତ୍ରଛାତ୍ରୀ ଓ ଅଧ୍ୟାପକ ଏବଂ ଅଧ୍ୟାପିକା ମାନେ ଏହାକୁ ଉତ୍ସବ ରୂପେ ପାଳନ କରିଛନ୍ତି।
ଉତ୍ସବ ଅବସରରେ ପଦ୍ମଶ୍ରୀ ପୁରସ୍କାର ପ୍ରାପ୍ତ , ବରିଷ୍ଠ ଚିତ୍ରଶିଳ୍ପୀ ବିନୋଦ ମହାରଣା ମୁଖ୍ୟ ଅତିଥି ରୂପେ ପ୍ରଦର୍ଶନୀକୁ ପ୍ରଦୀପ ପ୍ରଜ୍ବଳନ ପୂର୍ବକ ଉଦ୍ଘାଟନ କରିଥିଲେ। ମୁଖ୍ୟ ବକ୍ତା ଭାବେ ଓଡ଼ିଶା ଲଳିତ କଳା ଏକାଡେ଼ମୀର ସଚିବ ତଥା ବିଶିଷ୍ଟ ଚିତ୍ରଶିଳ୍ପୀ ପଞ୍ଚାନନ ସାମଲ ଯୋଗଦେଇ ଅଂଶଗ୍ରହଣ କରିଥିବା ଚିତ୍ରଶିଳ୍ପୀ ମାନଙ୍କ ଚିତ୍ରର ଭୂୟସୀ ପ୍ରଶଂସା କରିଥିଲେ।
ମହାବିଦ୍ୟାଳୟର ଅଧ୍ୟକ୍ଷ ଚନ୍ଦନ କୁମାର ସାମଲ ପ୍ରାରମ୍ଭରେ ଅତିଥି ମାନଙ୍କୁ ସ୍ବାଗତ କରିବା ସହିତ ବିଶ୍ଵ କଳା ଦିବସର ତାତ୍ପର୍ଯ୍ୟ ସମ୍ପର୍କରେ କହିଥିଲେ। ଉଲ୍ଲେଖଯୋଗ୍ୟ, ୨୦୧୨ ମସିହାରୁ ପ୍ରତିବର୍ଷ ମହାବିଦ୍ୟାଳୟ ତରଫରୁ ବିଭିନ୍ନ କଳାତ୍ମକ କାର୍ଯକ୍ରମ କରାଯାଉଅଛି।
ଚଳିତ ବର୍ଷ ଏପ୍ରିଲ୍ ୧୨ ତାରିଖରୁ ଉତ୍ସବ ଅବସରରେ ଏକ ଚିତ୍ରକଳା ଶିବିର ଆରମ୍ଭ ହୋଇଥିଲା। ବିଶ୍ଵ କଳା ଦିବସ ପାଳନ ଅବସରରେ ସୁଇଜରଲ୍ୟାଣ୍ଡରୁ ବରିଷ୍ଠ ଶିଳ୍ପୀ କରେନ୍ ଭୋନ,ନେପାଳରୁ ଭୀମ ପ୍ରସାଦ ଶର୍ମା,ବଙ୍ଗଳାଦେଶରୁ ନିଖିଲ ଚନ୍ଦ୍ର ଦାସ,କଲିକତାରୁ ରଥିନ କାଞ୍ଜି ଓ ରାଷ୍ଟ୍ରୀୟ ଲଳିତକଳା କେନ୍ଦ୍ରର ସଂପାଦକ ରାମକୃଷ୍ଣ ବେଦାଲ ପ୍ରମୁଖ ଭିଡିଓ ବାର୍ତ୍ତା ଦେଇ ଶିଳ୍ପୀ ମାନଙ୍କୁ ଉତ୍ସାହିତ କରିଥିଲେ। ଏହି ଅବସରରେ ମହାବିଦ୍ୟାଳୟର ସମସ୍ତ ଅଧ୍ୟାପକ ଅଧ୍ୟାପିକା ଓ ସ୍ଥାନୀୟ ଶିଳ୍ପୀ ମାନେ ଉପସ୍ଥିତ ରହି ପ୍ରଦର୍ଶନୀ ବୁଲି ଦେଖିଥିଲେ।