ନୂଆଦିଲ୍ଲୀ, ୨୮|୧୧: ୨ ବର୍ଷ ପୁରୁଣା ଆତ୍ମହତ୍ୟା ମାମଲାରେ ରିପବ୍ଲିକ ଟିଭିର ମୁଖ୍ୟ ସମ୍ପାଦକ ଅର୍ଣ୍ଣବ ଗୋସ୍ୱାମୀ ଓ ଅନ୍ୟ ୨ଜଣଙ୍କ ଅନ୍ତରୀଣ ଜାମିନ ବଳବତ୍ତର ରହିବ ବୋଲି କହିଛନ୍ତି ସୁପ୍ରିମକୋର୍ଟ । ଶୁକ୍ରବାର ସୁପ୍ରିମକୋର୍ଟ କହିଛନ୍ତି ଯେ, ବମ୍ବେ ହାଇକୋର୍ଟ ଆବେଦନର ଶୁଣାଣି ନକରିବା ଯାଏଁ ଏହି ୩ଜଣଙ୍କ ଅନ୍ତରୀଣ ଜାମିନ ବଳବତ୍ତର ରହିବ । ଏହାସହ ଅପରାଧିକ ଆଇନକୁ ଉଦ୍ଦେଶ୍ୟପ୍ରଣୋଦିତ ଭାବେ ନାଗରିକଙ୍କୁ ହଇରାଣ କରିବା ପାଇଁ ବ୍ୟବହାର ନକରିବା ଉଚିତ ବୋଲି କୋର୍ଟ କହିଛନ୍ତି । ଏହାସହ ଅର୍ଣ୍ଣବଙ୍କ ବିରୋଧରେ ଆସିଥିବା ଅଭିଯୋଗ ସତ୍ୟ ପ୍ରମାଣିତ ହୋଇନଥିବା କହିଛନ୍ତି କୋର୍ଟ ।
ମାମଲାର ଶୁଣାଣି କରୁଥିବା ଖଣ୍ଡପୀଠ ଅର୍ଣ୍ଣବଙ୍କୁ ଆଶ୍ୱସ୍ତି ଦେବାର କାରଣ ସମ୍ପର୍କରେ ମଧ୍ୟ କହିଛନ୍ତି । ଖଣ୍ଡପୀଠ କହିଛନ୍ତି ଯେ, ଆତ୍ମହତ୍ୟା ପାଇଁ ଉସକାଇବା ମାମଲାରେ ବମ୍ବେ ହାଇକୋର୍ଟଙ୍କ ନିଷ୍ପତ୍ତି ପରଠୁ ୪ ସପ୍ତାହ ଯାଏଁ ଅର୍ଣ୍ଣବଙ୍କ ଜାମିନ ବଳବତ୍ତର ରହିବ ।
ଖଣ୍ଡପୀଠ ଆହୁରି କହିଛନ୍ତି ଯେ, ସୁପ୍ରମକୋର୍ଟ, ହାଇକୋର୍ଟ ଓ ବିଭିନ୍ନ ତଳକୋର୍ଟ ରାଜ୍ୟ ସରକାରଙ୍କ ଦ୍ୱାରା ଅପରାଧିକ ଆଇନର ଦୂରୁପଯୋଗ ପ୍ରତି ସତର୍କ ରହିବା ଉଚିତ । ଯେଉଁ ନାଗରିକଙ୍କୁ ରାଜ୍ୟ ଜାଣିଶୁଣି ହଇରାଣ କରେ ସେମାନଙ୍କ ପାଇଁ କୋର୍ଟର ଦ୍ୱାର ବନ୍ଦ ହୋଇପାରିବ ନାହିଁ । ଗୋଟିଏ ଦିନ ପାଇଁ ମଧ୍ୟ କାହାରି ମୌଳିକ ଅଧିକାର ଛିନ୍ନ କରିବା ଭୁଲ ବୋଲି କୋର୍ଟ କହିଛନ୍ତି ।
