ମଧ୍ୟପ୍ରଦେଶ ୧୨/୦୯: ମଧ୍ୟପ୍ରଦେଶ ଇନ୍ଦୋରରେ ଅଭାବନୀୟ ଘଟଣା । ସୀମା ଟପିଗଲା ବର୍ବରତା । ବନ୍ଧୁକ ମୁନରେ ଦୁଇଜଣ ଯୁବ ସେନା ଅଧିକାରୀଙ୍କୁ ଲୁଟ୍ ପରେ ସେମାନଙ୍କ ବାନ୍ଧବୀଙ୍କୁ ଗଣଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ଏମିତିକି ସେନା ଅଧିକାରୀଙ୍କୁ ବି ବନ୍ଧକ ରଖିଥିଲେ ଦୁର୍ବୃତ୍ତ ।
ସୂଚନା ଥାଉକି, ଇନ୍ଦୋର ନିକଟସ୍ଥ ମହୋ ଆର୍ମି କଲେଜରେ ଟ୍ରେନିଂ ନେଉଥିବା ଦୁଇ ଅଧିକାରୀ ଦୁଇ ଜଣ ବାନ୍ଧବୀଙ୍କ ସହ ଛୋଟି ଜାମକୁ ପିକିନକ କରିବାକୁ ଯାଇଥିଲେ । ଏହି ସମୟରେ ଆଠ ଜଣ ଦୁର୍ବୃତ୍ତ ସେମାନଙ୍କ ଗାଡ଼ି ଉପରେ ହମଲା କରିବା ସହ ବନ୍ଧୁକ ଏବଂ ଛୁରୀ ଦେଖାଇ ଭୟଭୀତ କରିଥିଲେ । ଏପରିକି ସେମାନଙ୍କୁ ମାଡ଼ ମାରି ଅନ୍ୟ ଏକ ସ୍ଥାନକୁ ନେଇ ଯାଇଥିଲେ । ସେଠାରେ ଟଙ୍କା ଏବଂ ଅନ୍ୟାନ୍ୟ ଜିନିଷ ଦେବାକୁ ବାଧ୍ୟ କରିଥିଲେ ।
ଜଣେ ଯୁବକ ଏବଂ ଯୁବତୀ ୧୦ ଲକ୍ଷ ଟଙ୍କା ଦେବାରୁ ସେମାନଙ୍କୁ ଛାଡ଼ି ଦେଇଥିଲେ । ଉଭୟ ତୁରନ୍ତ ୟୁନିଟକୁ ଫେରି କମାଣ୍ଡିଂ ଅଫିରସଙ୍କୁ ଜଣାଇଥିଲେ। ସେମାନେ ପୁଲିସକୁ ଖବର ଦେବା ପରେ ପୁଲିସ ଘଟଣାସ୍ଥଳରେ ପହଞ୍ଚି ଅନ୍ୟ ଜଣେ ଯୁବକ ଏବଂ ଯୁବତୀଙ୍କୁ ଉଦ୍ଧାର କରିଛି । ସମସ୍ତଙ୍କ ଡାକ୍ତରୀ ପରୀକ୍ଷା କରାଯାଇଥିଲା । ଜଣେ ଯୁବତୀ ଦୁଷ୍କର୍ମର ଶିକାର ହୋଇଥିବା ଜଣାପଡ଼ିଛି ।
ସେପଟେ ପୋଲିସ ଗାଡ଼ି ଦେଖି ଫେରାର୍ ହୋଇ ଯାଇଥିବା ଦୁର୍ବୃତ୍ତଙ୍କ ମଧ୍ୟରୁ ପୁଲିସ ୨ ଜଣଙ୍କୁ ଗିରଫ କରିଛି। ସେମାନଙ୍କ ମଧ୍ୟରେ ଜଣଙ୍କ ନାଁରେ ପୂର୍ବରୁ ଅପରାଧିକ ମାମଲା ଥିବା ଜଣାପଡିଛି। ଏଥିସହ ପୁଲିସ ମଧ୍ୟ ମାମଲା ରୁଜୁ କରି ଅନ୍ୟମାନଙ୍କୁ ଖୋଜାଖୋଜି କରୁଛି।
