ନୂଆଦିଲ୍ଲୀ ୨୯।୦୧ : ଇଜିପ୍ଟରେ ପ୍ରତ୍ନତତ୍ତ୍ୱବିତଙ୍କୁ ମିଳିଲା ସଫଳତା । ମିଳିଲା ୧୮୦୦ ବର୍ଷର ରୋମାନ୍ ଆବାସିକ ସହର । ଏହି ଆବିଷ୍କାର ଇଜିପ୍ଟର ଲକ୍ସୋରରେ ହୋଇଛି । ଏହି ସହର ଦ୍ୱିତୀୟ ଏବଂ ତୃତୀୟ ଶତାବ୍ଦୀର ଅଟେ ବୋଲି ଅନୁମାନ କରାଯାଉଛି ।

ତେବେ ଇଜିପ୍ଟର ପ୍ରତ୍ନତତ୍ତ୍ୱ ମୁଖ୍ୟ ମୁସ୍ତାଫା ୱାଜିରିଙ୍କ ସୂଚନା ଅନୁଯାୟୀ, ଦ୍ୱିତୀୟ ଏବଂ ତୃତୀୟ ଶତାବ୍ଦୀରେ ଲୋକମାନେ ଏଠାରେ ରହୁଥିଲେ । ଏବେବି ଏଠାରେ ଅନେକ ଆବାସିକ ଅଟ୍ଟାଳିକା ସୁରକ୍ଷିତ ରହିଛି । ଏହି ସହରରେ ଲୋକମାନେ କପୋତମାନଙ୍କ ପାଇଁ ଉଚ୍ଚ ଗୃହ ମଧ୍ୟ ନିର୍ମାଣ କରିଥିଲେ । 

ତେବେ ଏହାକୁ ‘ଲକ୍ସୋରର ପୂର୍ବ କୂଳରେ ମିଳୁଥିବା ସର୍ବ ପୁରାତନ ତଥା ଗୁରୁତ୍ୱପୂର୍ଣ୍ଣ ସହର’ ବୋଲି ବର୍ଣ୍ଣନା କରାଯାଇଛି । ଅନୁସନ୍ଧାନକାରୀମାନେ ସହରରେ ଏପରି ଅନେକ ସ୍ଥାନ ଆବିଷ୍କାର କରିଛନ୍ତି ଯେଉଁଠାରୁ ବାସନ, ଉପକରଣ ଏବଂ ପିତ୍ତଳ ରୋମାନ ମୁଦ୍ରା ମିଳିଛି। ଏହି ଆବିଷ୍କାରକୁ ଏକ ବିରଳ ଆବିଷ୍କାର ବୋଲି ଘୋଷଣା କରାଯାଇଛି ।

ଅନୁସନ୍ଧାନକାରୀ ମାନେ ଲକ୍ସୋରର ନୀଳ ନଦୀର ପଶ୍ଚିମ କୂଳରେ ଖନନ କାର୍ଯ୍ୟ ଆରମ୍ଭ କରିଥିଲେ, ପରେ ସେମାନଙ୍କୁ ଏହି ସହରର ସନ୍ଧାନ ମିଳିଛି ।  ପୂର୍ବରୁ ଲକ୍ସୋରର ପଶ୍ଚିମ ଉପକୂଳରେ ଏକ ୩୦୦୦ ବର୍ଷ ପୁରୁଣା ହଜିଯାଇଥିବା ସୁବର୍ଣ୍ଣ ସହର ଆବିଷ୍କାର କରିଥିଲେ।  ଏହି ସହର ଇଜିପ୍ଟରେ ଆବିଷ୍କୃତ ହୋଇଥିବା ସର୍ବ ବୃହତ ପ୍ରାଚୀନ ସହର ଭାବରେ ପରିଗଣିତ ହୋଇଛି ।