ନୂଆଦିଲ୍ଲୀ: ଫିଲ୍ମ ଉପରେ ନେତାଙ୍କ ବିବାଦୀୟ ଟିପ୍ପଣୀକୁ ନେଇ ପ୍ରଧାନମନ୍ତ୍ରୀ ମୋଦୀ କାର୍ଯ୍ୟକାରିଣୀ ବୈଠକରେ ଦଳୀୟ ନେତାଙ୍କୁ ତାଗିଦ୍ କରିଥିଲେ। ଏହାପରେ ପଠାନ ଫିଲ୍ମକୁ ନେଇ ବିଜେପି ନେତାଙ୍କ ଠାରୁ କୌଣସି ମନ୍ତବ୍ୟ ଶୁଣିବାକୁ ମିଳି ନଥିଲା। ଏବେ କେନ୍ଦ୍ର କ୍ରୀଡ଼ା ଓ ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ମଧ୍ୟ ମୋଦୀଙ୍କ କଥା ଦୋହରାଇଛନ୍ତି।

ବୟକଟ୍‌ ସଂସ୍କୃତି ଦ୍ୱାରା ଫିଲ୍ମକୁ ଟାର୍ଗେଟ୍ କରିବାକୁ ନିନ୍ଦା କରିଛନ୍ତି ଅନୁରାଗ। ଏଭଳି କଥାରେ ଦେଶର କ୍ଷତି ହୋଇଥାଏ ଓ ପରିବେଶ ଖରାପ ହୋଇଥାଏ। ତେଣୁ ଏମିତି ହେବା ଉଚିତ ନୁହେଁ ବୋଲି କେନ୍ଦ୍ରମନ୍ତ୍ରୀ କହିଛନ୍ତି। ମୁମ୍ବାଇରେ ଆୟୋଜିତ ସାଙ୍ଘାଇ ସହଯୋଗ ସଂଗଠନ(ଏସ୍‌ସିଓ) ଫିଲ୍ମ ଫେଷ୍ଟିଭାଲ୍‌ର ଉଦ୍‌ଘାଟନୀ ଉତ୍ସବରରେ ଯୋଗ ଦେଇ ଏପରି କହିଛନ୍ତି ମନ୍ତ୍ରୀ।

ପିଟିଆଇର ରିପୋର୍ଟ ଅନୁସାରେ, କେନ୍ଦ୍ରମନ୍ତ୍ରୀ କହିଛନ୍ତି ଯେ ଭାରତ ଏକ ସଫ୍ଟ ପାୱାର ଭାବେ ନିଜର ପ୍ରଭାବ ବଢ଼ାଇବାକୁ ଚେଷ୍ଟା କରୁଛି। ଏଭଳି ସ୍ଥିତିରେ ଏମିତି ସବୁ ଘଟଣା ପରିବେଶ ନଷ୍ଟ କରୁଛି। ଯଦି ଏଥିରେ କାହାକୁ କିଛି ସମସ୍ୟା ଅଛି ତେବେ ସେ ସମ୍ପର୍କିତ ସରକାରୀ ବିଭାଗ ସହ ଆଲୋଚନା କରିବା ଉଚିତ୍। ଅଭିଯୋଗକର୍ତ୍ତାମାନଙ୍କୁ ଫିଲ୍ମ ନିର୍ମାତାଙ୍କ ସହ ଆଲୋଚନା କରିବା ଦରକାର ବୋଲି ମନ୍ତ୍ରୀ କହିଛନ୍ତି।  

ମୁମ୍ବାଇରେ ଆୟୋଜିତ ସାଙ୍ଘାଇ ସହଯୋଗ ସଂଗଠନ(ଏସ୍‌ସିଓ) ଫିଲ୍ମ ଫେଷ୍ଟିଭାଲ୍‌ର ଉଦ୍‌ଘାଟନୀ ଉତ୍ସବରରେ ଯୋଗ ଦେଇଥିଲେ କେନ୍ଦ୍ରମନ୍ତ୍ରୀ ଅନୁରାଗ ଠାକୁର। ଏହି ସମୟରେ ସେ ଓଟିଟି କଣ୍ଟେଣ୍ଟ ଉପରେ ବି ନିଜର ମନ୍ତବ୍ୟ ରଖିଥିଲେ। ମନ୍ତ୍ରୀ କହିଥିଲେ “ ସୃଜନଶୀଳତା ଉପରେ କୌଣସି କଟକଣା ହେବା ଉଚିତ୍ ନୁହେଁ।”

ସେ ଆହୁରି ମଧ୍ୟ କହିଛନ୍ତି ଯେ ଓଟିଟି ଫ୍ଲାଟ୍‌ଫର୍ମ କଣ୍ଟେଣ୍ଟ ବିଷୟରେ ଏମିତି ଅନେକ ଅଭିଯୋଗ ମିଳିଥାଏ। କିନ୍ତୁ ପାଖାପାଖି ୯୫ ପ୍ରତିଶତ ଅଭିଯୋଗ ପ୍ରଯୋଜକଙ୍କୁ ଭେଟି ସମାଧାନ କରାଯାଇଥାଏ।  ବାକି ସମସ୍ୟା ପବ୍ଲିଶର  ଆସୋସିଏସନ୍‌ ସହ ମିଶି ସମାଧାନ କରାଯାଇଥାଏ ବୋଲି ମନ୍ତ୍ରୀ କହିଛନ୍ତି। ସୂଚନା ଥାଉକି ଏହି ଫିଲ୍ମ ଫେଷ୍ଟିଭାଲ୍‌ରେ ୮ୟୁରେଶିଆନ ଦେଶର  ଆଞ୍ଚଳିକ ଗ୍ରୁପ୍‌ରୁ ୫୮ ଟି ଫିଲ୍ମ ପ୍ରଦର୍ଶିତ କରାଯିବ।