ଭୁବନେଶ୍ବର ୩।୧୦: ଭୁବନେଶ୍ବର ସାଲିଆସାହି ନିକଟ ନୂଆ ରାସ୍ତାରେ ମର୍ମନ୍ତୁଦ ସଡକ ଦୁର୍ଘଟଣାରେ ଗୁରୁତର ଅନ୍ୟ ଜଣଙ୍କର ମୃତ୍ୟୁ । ସୋମବାର ଜଣଙ୍କର ମୃତ୍ୟୁ ହୋଇଥିଲା । ସେପଟେ ଦୁର୍ଘଟଣା ଘଟାଇଥିବା କାର୍ ମାଲିକ ରହୁଥିବା କଲୋନୀରେ ଉତ୍ତ୍ୟକ୍ତ ଲୋକେ ଘେରାଉ କରିଛନ୍ତି । ମୃତକଙ୍କ ପରିବାର ସମେତ ଶତାଧିକ ସ୍ଥାନୀୟ ବସ୍ତିବାସିନ୍ଦା କାର୍ ମାଲିକଙ୍କୁ ପୋଲିସ ଲୁଚାଇ ଦେଇଥିବା ସ୍ଥାନୀୟ ଲୋକେ ଅଭିଯୋଗ ଆଣିଛନ୍ତି । ଘଟଣାସ୍ଥଳରେ ଚାପା ଉତ୍ତେଜନା ଦେଖିବାକୁ ମିଳିଛି । ଚନ୍ଦ୍ରଶେଖରପୁର ପୋଲିସ ସମେତ ଗୋଟିଏ ପ୍ଲାଟୁନ୍ ପୋଲିସ ଫୋର୍ସ ମୁତୟନ ଅଛନ୍ତି ।

ସୂଚନାଯୋଗ୍ୟ ଯେ, ସାଲିଆ ସାହି ନୂଆ ରାସ୍ତାରେ ସୋମବାର ମଧ୍ୟାହ୍ନରେ ଏକ ଭୟାନକ ଦୁର୍ଘଟଣା ଘଟିଥିଲା । ଟର୍ଣ୍ଣିଂରେ ଏକ ସ୍କୁଟିକୁ ଧକ୍କା ଦେଇ ପ୍ରାୟ ୧୦୦ ମିଟର ଯାଏଁ ଘୋଷାଡ଼ି ନେଇଥିଲା ଏକ କାର୍ । ଫଳରେ ସ୍କୁଟିରେ ବସିଥିବା ଜଣେ ଯୁବକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଯୁବକ ଗୁରୁତର ହୋଇଥିଲେ । ତେବେ ଗୁରୁତର ଯୁବକଙ୍କର ମଙ୍ଗଳବାର ଦିନ ମୃତ୍ୟୁ ହୋଇଛି । ଉଭୟଙ୍କ ଘର ନୀଳାଦ୍ରି ବିହାର ହରେକୃଷ୍ଣ ବସ୍ତିରେ । ଲୋକେ ସେମାନଙ୍କୁ ଟାଟାଏସିଇ ଏବଂ ଅଟୋ ସାହାଯ୍ୟରେ ଏକ ଘରୋଇ ହସ୍ପିଟାଲକୁ ପଠାଇଥିଲେ । ମୈତ୍ରୀ ବିହାର ଥାନା ପୋଲିସ ପହଞ୍ଚି ଦୁର୍ଘଟଣାଗ୍ରସ୍ତ ୨ ଗାଡ଼ିକୁ ଥାନାକୁ ନେଇଥିଲା ।

ସୋମବାର ଦିନ ୧ଟା ବେଳେ ଉତ୍କଳ ହସ୍ପିଟାଲ ଆଡୁ ଏକ ହୁଣ୍ଡାଇ ଆଇ୧୦ କାର୍ ସାଲିଆ  ସାହି ଆଡ଼କୁ ଯାଉଥିଲା । ଦୁଇ ସ୍କୁଟି ଚାଳକ ସାଲିଆ ସାହି ପଟୁ ଘରକୁ ଫେରୁଥିଲେ । ଉକ୍ତ ରାସ୍ତାର ବୁଦ୍ଧପାର୍କ ପାର୍ଶ୍ବକୁ ଯିବା ରାସ୍ତାର ୟୁଟର୍ଣ୍ଣରେ ସ୍କୁଟି  ବୁଲାଉଥିବା ବେଳେ କାରଟି ଖୁବ୍‌ ଜୋରରେ ଧକ୍କା ଦେଇଥିଲା । ଦୁର୍ଘଟଣା ଏତେ ଭୟାନକ ଥିଲା ଯେ ସ୍କୁଟି ସହ ଉଭୟଙ୍କୁ ପ୍ରାୟ ଶହେ  ମିଟର ଯାଏଁ କାରଟି ଘୋଷାଡ଼ି ନେଇଥିଲା । ରକ୍ତ  ଜୁଡୁବୁଡୁ ଅବସ୍ଥାରେ ୨ ଜଣ ରାସ୍ତା ଉପରେ ପଡ଼ି  ଛଟପଟ ହେଉଥିଲେ । ସେହିବାଟ ଦେଇ ଯାଉଥିବା  କିଛି ଲୋକେ ଏହା ଦେଖି ମୈତ୍ରୀ ବିହାର ଥାନା ଏବଂ  ଆମ୍ବୁଲାନ୍ସକୁ ଫୋନ୍‌ କରି ଜଣାଇଥିଲେ । ହେଲେ  କେହି ଆସିନଥିଲେ । ଲୋକେ ବାଧ୍ୟ ହୋଇ ଏକ  ଟାଟା ଏସିଇ ଏବଂ ଅଟୋରେ ୨ ଗୁରୁତରଙ୍କୁ ପାଖ ଏକ  ହସ୍ପିଟାଲକୁ ପଠାଇଥିଲେ । ହସ୍ପିଟାଲରେ ଜଣଙ୍କୁ ଡାକ୍ତର ମୃତ ଘୋଷଣା କରିଥିଲେ ।  ଏହାକୁ ନେଇ ଉକ୍ତ ରାସ୍ତାରେ ଉତ୍ତେଜନା ପ୍ରକାଶ  ପାଇଥିଲା । ଲୋକେ ପହଞ୍ଚି ହୋହଲ୍ଲା କରିଥିଲେ ।  ପୋଲିସ ଏବଂ ଆମ୍ବୁଲାନ୍ସ ଠିକ୍ ସମୟରେ ପହଞ୍ଚିଥିଲେ ଜୀବନ ବଞ୍ଚି  ଯାଇଥାନ୍ତା ବୋଲି ଲୋକେ କହିଥିଲେ । ପୋଲିସ ପଛରେ ପହଞ୍ଚି ସେମାନଙ୍କୁ ବୁଝାସୁଝା କରିଥିଲା । ଅନ୍ୟପଟେ  କାର୍ ଚାଳକ ମଧ୍ୟ ଆହତ ହୋଇଥିବା ଜଣାପଡ଼ିଥିଲା ।

You Can Read :