ନୂଆଦିଲ୍ଲୀ: ଆଲିଗଡ଼ ମୁସଲିମ୍ ବିଶ୍ବବିଦ୍ୟାଳୟର ସଂଖ୍ୟାଲଘୁ ଷ୍ଟାଟସ୍ ଉପରେ ‘ସୁପ୍ରିମ’ ଫଇସଲା ଆସିଛି । ଶୁକ୍ରବାର ମାମଲାର ଶୁଣାଣି କରି ସୁପ୍ରିମକୋର୍ଟ ସଂଖ୍ୟାଲଘୁ ମାନ୍ୟତାକୁ ବର୍ତ୍ତମାନ ପାଇଁ ବୈଧ ରଖିଛନ୍ତି । ଏଥିସହ ମାମଲାର ବିଚାର ଏକ ୩ଜଣିଆ ଖଣ୍ଡପୀଠ ହେବ ବୋଲି କହିଛନ୍ତି । ପ୍ରଧାନ ବିଚାରପତିଙ୍କ ଅଧ୍ୟକ୍ଷତାରେ ୭ଜଣିଆ ଖଣ୍ଡପୀଠ ମାମଲାର ଶୁଣାଣି କରିଥିଲେ । ମାତ୍ର କୋର୍ଟ କୌଣସି ନିର୍ଯ୍ୟାସ ପହଞ୍ଚିନପାରିବାରୁ ୪-୩ ବହୁମତରେ ରାୟ ଦେଇଛନ୍ତି । ଏଥିରେ ସିଜେଆଇ ଜଷ୍ଟିସ୍ ଡି.ଓ୍ବାଇ ଚନ୍ଦ୍ରଚୂଡ଼, ଜଷ୍ଟିସ୍ ସଞ୍ଜୀବ ଖାନ୍ନା, ଜଷ୍ଟିସ୍ ଜେ,ବି ପରଦିଓ୍ବାଲା ଏବଂ ଜଷ୍ଟିସ୍ ମନୋଜ ମିଶ୍ରା ଏଏମୟୁର ସଂଖ୍ୟାଲଘୁ ମାନ୍ୟତା ସପକ୍ଷରେ ରାୟ ଶୁଣାଇଥିଲେ । କିନ୍ତୁ ଜଷ୍ଟିସ୍ ସୂର୍ଯ୍ୟକାନ୍ତ, ଜଷ୍ଟିସ୍ ଦୀପଙ୍କର ଦତ୍ତା ଏବଂ ଜଷ୍ଟିସ୍ ସତିଶ ଚନ୍ଦ୍ର ଶର୍ମା ଏନେଇ ଅସହମତି ପ୍ରକାଶ କରିଥିଲେ ।

ଶୁଣାଣି ବେଳେ କୋର୍ଟ କହିଛନ୍ତି, AMU ଏକ ସଂଖ୍ୟାଲଘୁ ଅନୁଷ୍ଠାନ କି ନୁହେଁ ୩ ଜଣିଆ ବିଚାରପତିଙ୍କ ବେଞ୍ଚ୍ ତାହା ସ୍ଥିର କରିବେ। ଏଥିସହ ତାହାର ମାନଦଣ୍ଡ ବି ନିର୍ଦ୍ଧାରଣ ମଧ୍ୟ କରାଯିବ । ଏହି ବିବାଦରେ ୭ ଜଣିଆ ଖଣ୍ଡପୀଠରୁ ସିଜେଆଇଙ୍କ ସମେତ ୪ଜଣ ସପକ୍ଷରେ ମତ ଦେଇଥିଲେ । କିନ୍ତୁ ଅନ୍ୟ ୩ ଜଣଙ୍କ ମତ ଭିନ୍ନ ଥିଲା। ତେଣୁ ୪-୩ ବହୁମତରେ କୋର୍ଟ ୧୯୬୭ ମସିହାର ଉକ୍ତ ରାୟକୁ ଖାରଜ କରି ଦେଇଛନ୍ତି । ଏଥିସହ AMUକୁ ସଂଖ୍ୟାଲଘୁଙ୍କ ଦ୍ୱାରା ସ୍ଥାପନ କରାଯାଇଥିଲା ବୋଲି ପ୍ରମାଣିତ କରିବାକୁ ହେବ ବୋଲି ସୁପ୍ରିମକୋର୍ଟ କହିଛନ୍ତି । 

ଏହି ମାମଲାରେ ସୁପ୍ରିମକୋର୍ଟ ପୂର୍ବରୁ ମଧ୍ୟ ରାୟ ଶୁଣାଇଥିଲେ । ୧୯୬୭ରେ ଅଜିଜ୍ ବାସା ବନାମ ଭାରତ ସଂଘ ମାମଲାରେ ୫ ଜଣିଆ ସାମ୍ବିଧାନିକ ଖଣ୍ଡପୀଠ ସଂଖ୍ୟାଲଘୁ ବିରୋଧରେ ରାୟ ଦେଇଥିଲେ । ଅଦାଲତ ବିଚାର କରି ଏହି ନିଷ୍କର୍ସରେ ପହଞ୍ଚିଥିଲେ ଯେ, ଆଲିଗଡ଼ ମୁସଲିମ୍ ବିଶ୍ବବିଦ୍ୟାଳୟ ସଂଖ୍ୟାଲଘୁ ସଂସ୍ଥା ନୁହେଁ । ଆଲିଗଡ଼ ମୁସଲିମ୍ ୟୁନିଭରସିଟି ଅଧିନିୟମ ୧୯୨୦କୁ ଆଧାରରେ ରାୟ ଶୁଣାଇଥିଲେ । ଏହି ଅଧିନିୟମ ଅନୁଯାୟୀ, ବିଶ୍ବବିଦ୍ୟାଳୟର ସ୍ଥାପନା ଏକ ମୁସଲିମ୍ ସମୁଦାୟ ଦ୍ବାରା ହୋଇଛି ଏବଂ ଏହାକୁ ମୁସଲିମ୍ ସମୁଦାୟ ଅଧିନରେ ପରିଚାଲିତ ହେଉଛି । ୧୯୮୧ରେ ଏଏମୟୁ ଅଧିନିୟମକୁ ସଂଶୋଧନ କରି କୁହାଯାଇଥିଲା, ବିଶ୍ବବିଦ୍ୟାଳୟ ଭାରତର ମୁସଲମାନଙ୍କ ଦ୍ବାରା ସ୍ଥାପିତ ହୋଇଥିଲା । ଏହା ପରେ ୨୦୦୫ରେ ସଂଖ୍ୟାଲଘୁ ମାନ୍ୟତା ଦାବି କରି ସ୍ନାତକତ୍ତୋର ଚିକିତ୍ସା ପାଠ୍ୟକ୍ରମରେ ମୁସଲିମ ଛାତ୍ରଛାତ୍ରୀଙ୍କ ପାଇଁ ୫୦ ପ୍ରତିଶତ ସିଟ୍ ସଂରକ୍ଷିତ କରାଗଲା । 

୧୯୬୫ରେ ଏଏମୟୁକୁ ସଂଖ୍ୟାଲଘୁ ମାନ୍ୟତା ନେଇ ବିବାଦ ଆରମ୍ଭ ହୋଇଥିଲା । ତତ୍କାଳୀନ ସରକାର ଆଲିଗଡ଼ ମୁସଲିମ୍ ୟୁନିଭରସିଟି ଅଧିନିୟମକୁ ସଂଶୋଧନ କରି ସ୍ବତନ୍ତ୍ରତାକୁ ଶେଷ କରିଦେଇଥିଲେ । ଏହାକୁ ଚ୍ୟାଲେଞ୍ଜ କରି ୧୯୬୭ରେ ଅଜିଜ୍ ବାସା ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ । ସେତେବେଳେ ୫ଜଣିଆ ସାମ୍ବିଧାନିକ ଖଣ୍ଡପୀଠ ମାମଲାର ଶୁଣାଣି କରି ଆଲିଗଡ଼ ମୁସଲିମ୍ ବିଶ୍ବବିଦ୍ୟାଳୟ ଏକ ସଂଖ୍ୟାଲଘୁ ସଂସ୍ଥା ନୁହେଁ ବୋଲି କହିଥିଲେ ।...