ନୂଆଦିଲ୍ଲୀ: ଯୁଦ୍ଧ ମଧ୍ୟରେ ଆମେରିକା ରାଷ୍ଟ୍ରପତି ଜୋ ବାଇଡେନ ଇସ୍ରାଏଲ ପହଞ୍ଚିଛନ୍ତି। ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ତାଙ୍କୁ ବିମାନ ବନ୍ଦରରେ ସ୍ବାଗତ କରିଥିଲେ। ବିମାନରୁ ଓହ୍ଲାଇବା ପରେ ବେଞ୍ଜାମିନ ନେତନ୍ୟାହୁ ଏବଂ ବାଇଡେନ ପରସ୍ପର ସାକ୍ଷାତ କରିଥିଲେ। ଏହି ସାକ୍ଷାତକାର ପରେ ଆମେରିକା ରାଷ୍ଟ୍ରପତି ହମାସ ବିରୋଧର କଡ଼ା ଟିପ୍ପଣୀ କରିଥିଲେ।
ଅବଶ୍ୟ ଇସ୍ରାଏଲକୁ କ୍ଲିନ୍ ଚିଟ୍ ମଧ୍ୟ ଦେଇଛନ୍ତି ବାଇଡେନ। ବାଇଡେନ କହିଛନ୍ତି ଏଭଳି ଲାଗୁଛି ହସ୍ପିଟାଲ ଉପରେ ଆକ୍ରମଣ ଉପରେ ଗାଜାପଟ୍ଟିର ସକ୍ରିୟ ଉଗ୍ରବାଦୀ ସମୂହର ହାତ ରହିଛି। ଜୋ ବାଇଡେନ କହିଛନ୍ତି ଯୁଦ୍ଧରେ ଇସ୍ରାଏଲ ଏକା ନାହିଁ, ଆମେ ତା’ ସହ ରହିଛୁ। ଇସ୍ରାଏଲକୁ ଏହା ହକ୍ ଅଛି ଯେ, ସେ ନିଜର ରକ୍ଷା କରିପାରିବ।
ଆହୁରି ପଢ଼ନ୍ତୁ: ଗାଜା ହସ୍ପିଟାଲରେ ଏୟାର ଷ୍ଟ୍ରାଇକ୍; ଆରବ ନେତାଙ୍କ ସହ ବୈଠକ ରଦ୍ଦ କଲେ ବାଇଡେନ
ସେ ଆହୁରି କହିଛନ୍ତି ‘ଆମେ ଜାଣିଛୁ ହସ୍ପିଟାଲ ଉପରେ ଇସ୍ରାଏଲ ଆକ୍ରମଣ କରିନାହିଁ ବରଂ ହମାସର ମିସାଇଲରେ ହିଁ ଏହି ଘଟଣା ଘଟଛି। ସେ ସ୍ପଷ୍ଟ କହିଛି ଆକ୍ରମଣ ଇସ୍ରାଏଲ ଉପରେ ହମାସ କରିଛି। ଆଉ ଆମେ ଏହି ଅସୁବିଧା ସମୟରେ ଇସ୍ରାଏଲ ସହ ଅଛୁ। ’ ସେହିଭଳି ନେତନ୍ୟାହୁ ମଧ୍ୟ କହିଛନ୍ତି ଯେ, ଆକ୍ରମଣ ଇସ୍ରାଏଲ କରିନାହିଁ । ଆଉ ଏହା ପଛରେ ହମାସ ହିଁ ରହିଛି।
ସୂଚନାଥାଉକି, ବାଇଡେନ ଖୋଲାଖୋଲି ଭାବରେ ଇସ୍ରାଏଲ ସମର୍ଥନ କରିଛନ୍ତି। ସେହିଭଳି ଆରବ ଦେଶକୁ ଆମେରିକାର ସମର୍ଥନ ପସନ୍ଦ ଆସିନାହିଁ। ମିଶର, ଜୋର୍ଡାନ ଏବଂ ପାଲେଷ୍ଟାଇନ ବାଇଡେନଙ୍କ ସହ ପ୍ରସ୍ତାବିତ ସମ୍ମିଳନୀ ରଦ୍ଦ କରିଛି। ପୂର୍ବରୁ ସାଉଦି ଆରବର ପ୍ରିନ୍ସ ମୋହମ୍ମଦ ବିନ ସଲମାନ ମଧ୍ୟ ଆଣ୍ଟୋନି ବ୍ଲିଙ୍କନଙ୍କୁ ୧୫ ଘଣ୍ଟା ଅପେକ୍ଷା କରାଇଥିଲେ।
ଆହୁରି ପଢ଼ନ୍ତୁ: ଜଳ, ସ୍ଥଳ ଓ ଆକାଶରୁ ଇସ୍ରାଏଲର ଭୀଷଣ ହମ୍ଲା; ଧ୍ୱଂସ ହେଲା ହମାସ୍ ମୁଖ୍ୟାଳୟ
ଉଲ୍ଲେଖଯୋଗ୍ୟ, ମଙ୍ଗଳବାର ବିଳମ୍ବିତ ରାତିରେ ଗାଜାର ଏକ ହସ୍ପିଟାଲରେ ମିସାଇଲ ଆକ୍ରମଣ ହୋଇଥିଲା। ଯେଉଁଥିରେ ୫୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଛି। ପାଲେଷ୍ଟାଇନ ଏହି ଆକ୍ରମଣ ପଛରେ ଇସ୍ରାଏଲ ହାତ ଥିବା କହିଥିବାବେଳେ ଇସ୍ରାଏଲ ଏହାକୁ ଖଣ୍ଡନ କରିଛି। ଏମିତିକି ଇସ୍ରାଏଲ କହିଛି ହମାସ ନିଜେ ଏଭଳି କରିଛି।
ଉଭୟ ଦେଶ ଆରୋପ ପ୍ରତ୍ୟାରୋପ ଜାରି ରଖିଛନ୍ତି। ଇସ୍ରାଏଲ ଅଧିକାରୀ କହିଛନ୍ତି ଯେ, ଗାଜା ପଟ୍ଟିର ହସ୍ପିଟାଲରେ ହୋଇଥିବା ଆକ୍ରମଣ ଇସଲାମିକ ଜିହାଦ ଦ୍ବାରା କରାଯାଇଛି। ଏହି ସଂଗଠନ ଗାଜା ପଟ୍ଟିରୁ ହିଁ ସଞ୍ଚାଳିତ ହେଉଥାଏ।