ଫୁଲବାଣୀ ୧୦/୦୩: ଝିଅର ମୃତ ଦେହକୁ ଘରକୁ ଆଣିବାବେଳେ ଓଲଟି ପଡ଼ିଲା ଆମ୍ବୁଲାନ୍ସ। ଫଳରେ ବାପା ପୁଅ ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଏପରି ଅଘଟଣ କନ୍ଧମାଳ ଜିଲ୍ଲା ଦାରିଙ୍ଗବାଡି ଥାନା ଅନ୍ତର୍ଗତ ମୁଣ୍ଡାନାଯୁ ବୁଲାଣୀରେ ଘଟିଛି। ଆମ୍ବୁଲାନ୍ସଟି ଭାରସାମ୍ୟ ହରାଇବାରୁ ଏପରି ଅଘଟଣ ହୋଇଥିବା ଜଣାପଡ଼ିଛି।

ଖବର ଅନୁସାରେ, ବ୍ରହ୍ମପୁର ବଡ଼ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ଝିଅର ମୃତ୍ୟୁ ହୋଇଥିଲା। ଏହାପରେ ମୃତ ଝିଅକୁ  ବାପା-ପୁଅ ବେସରକାରି ଆମ୍ବୁଲାନ୍ସରେ ବାଲିଗୁଡ଼ା ବ୍ଳକ୍ ଅନ୍ତର୍ଗତ ଖମନଖୋଲ ପଞ୍ଚାୟତ ମୁଠାବାଲି ଗାଁକୁ ଆଣୁଥିଲେ। ଏହି ସମୟରେ ଆମ୍ବୁଲାନ୍ସଟି ଦାରିଙ୍ଗବାଡ଼ି ଥାନା ଅନ୍ତର୍ଗତ ମୁଣ୍ଡାନାଯୁ ବୁଲାଣୀରେ ଭାରସାମ୍ୟ ହରାଇ ଓଲଟିପଡ଼ିଥିଲା।

ଫଳରେ ଆମ୍ୱୁଲାନ୍ସ,ରେ ଥିବା ବାପା ପୁଅ ଆହତ ହୋଇଛନ୍ତି। ସ୍ଥାନୀୟ ସେମାନଙ୍କୁ ଉଦ୍ଧାର କରି ପାଖରେ ଥିବା ବାଲିଗୁଡ଼ା ଡାକ୍ତରଖାନାରେ ଭର୍ତ୍ତି କରିଛନ୍ତି। ଚିକିତ୍ସା ପରେ ସେମାନଙ୍କ ସ୍ୱାସ୍ଥ୍ୟାବସ୍ଥାରେ ଉନ୍ନତି ଆସିଥିବା ଜଣାପଡ଼ିଛି। ଏହା ଜାଣି ପୋଲିସ ଘଟଣାସ୍ଥଳରେ ପହଞ୍ଚି ସ୍ଥିତି ଛାନବିନ୍‌ କରିଛି।