ଭୁବନେଶ୍ୱର,୦୧/୧୧:  ଇ-କମର୍ସ ସାଇଟ୍ ଆମାଜନରେ ହିନ୍ଦୁ ଦେବାଦେବୀଙ୍କୁ ଅପମାନ ଅଭିଯୋଗ । ଆମାଜନ୍ ୟୁକେ ଏମିତି କିଛି ଟି-ସାର୍ଟ ବିକ୍ରି କରୁଛି ଯେଉଁଥିରେ ହିନ୍ଦୁ ଦେବାଦେବୀଙ୍କର ଆପତ୍ତିଜନକ ଫଟୋ ରହିଛି । ଯାହାକୁ ନେଇ ବିବାଦର ସ୍ବର ଉଠିଛି । କାଳୀ ଏବଂ ଶିବଙ୍କର ଆପତ୍ତିଜନକ ଫଟୋ ଥିବା ଟିସାର୍ଟକୁ ନିଜ ୱେବସାଇଟରେ ବିକ୍ରି କରୁଛି ଆମାଜନ ।

କେବଳ ସେତିକି ନୁହେଁ, ହିନ୍ଦୁ ଦେବାଦେବୀଙ୍କୁ ନେଇ ଆପତ୍ତିଜନକ ଟ୍ୟାଗ୍ ଲେଖା ରହିଛି । ଦେବାଦେଦୀଙ୍କ ଫଟୋକୁ ବିକୃତ କରାଯାଇଛି । ଏହା ଧର୍ମୀୟ ଭାବନା ପ୍ରତି କୁଠାରାଘାତ କରୁଥିବା ଅଭିଯୋଗ ହେଉଛି । ଏହି ସମ୍ବେଦନଶୀଳ ପ୍ରସଙ୍ଗରେ ଅନେକ ଲୋକ ଅଭିଯୋଗ ଉଠାଇଛନ୍ତି । ଆଗରୁ ମଧ୍ୟ ଆମାଜନ ନିଜ ପ୍ରଡକ୍ଟରେ ଏପ୍ରକାର ହିନ୍ଦୁ ଦେବାଦେବୀଙ୍କ ଫଟୋକୁ ନେଇ ଆପତ୍ତିଜନକ ଭାବରେ ବ୍ୟବହାର କରିଥିଲା । ଡୋର୍ ମ୍ୟାଟ ଏବଂ ଟଏଲେଟ୍ ମ୍ୟାଟରେ ହିନ୍ଦୁ ଦେବାଦେବୀଙ୍କ  ଫଟୋ ଛାପିଥିଲା । ଯାହାକୁ ବିବାଦ ଉଠିବା ପରେ ଆମାଜନ ଏସବୁ ପ୍ରଡକ୍ଟ ପ୍ରତାହାର କରିଥିଲା ।

ଏବେ ପୁଣି ଥରେ ଆମାଜନ ୟୁକେ ବଦମାସୀ କରିଛି । ବାରମ୍ବାର ଏପ୍ରକାର କରିବା ପଛରେ ଆମାଜନର କଣ ଲକ୍ଷ୍ୟ ରହିଛି ତାହା ତାକୁ ହିଁ ଜଣାଥିବ । କିନ୍ତୁ ଅନ୍ୟ ଧର୍ମ ପ୍ରତି ସମ୍ମାନ ଦେବା ସମସ୍ତଙ୍କ କର୍ତ୍ତବ୍ୟ ଏକଥା ବୋଧହୁଏ ଆମାଜନ ଭୁଲି ଯାଇଛି । ହିନ୍ଦୁ ଧର୍ମର ଦେବାଦେବୀଙ୍କ ଆପତ୍ତିଜନକ ଫଟୋ ବ୍ୟବହାର କରି ଭାରତ କୋଟି କୋଟି ହିନ୍ଦୁ ଧର୍ମାବଲମ୍ବୀଙ୍କ ଧର୍ମୀୟ ଭାବନା ପ୍ରତି କୁଠାରାଘାତ କରିଥିବା ଅଭିଯୋଗ ହୋଇଛି ।