ମୋଦୀଙ୍କ ନୂଆ ମନ୍ତ୍ରିମଣ୍ଡଳରେ ୯୮.୫% ମନ୍ତ୍ରୀ କୋଟିପତି, ADR ରିପୋର୍ଟରେ ଖୁଲାସା

Published By : Prameya-News7 Bureau | June 11, 2024 IST

ନୂଆଦିଲ୍ଲୀ: ମୋଦୀ ୩.୦ର ନୂଆ ମନ୍ତ୍ରିମଣ୍ଡଳରେ ୭୧ ଜଣଙ୍କ ମଧ୍ୟରୁ ୭୦ ଜଣ (୯୮.୫ ପ୍ରତିଶତ) ମନ୍ତ୍ରୀଙ୍କ ପାଖରେ ୧ କୋଟି ଟଙ୍କାରୁ ଅଧିକ ସମ୍ପତ୍ତି ରହିଛି । ମଙ୍ଗଳବାର ଏଡିଆର ଦ୍ୱାରା ଜାରି ଏକ ବିଶ୍ଲେଷଣରେ ଏହି ଖୁଲାସା ହୋଇଛି । ୭୧ ମନ୍ତ୍ରୀଙ୍କ ମଧ୍ୟରୁ ୬ ଜଣ ୧୦୦ କୋଟି ଟଙ୍କାରୁ ଅଧିକ ସମ୍ପତ୍ତି ଥିବା ଘୋଷଣା କରିଛନ୍ତି । 

ବିଶ୍ଲେଷଣ ଅନୁସାରେ ମନ୍ତ୍ରିମଣ୍ଡଳରେ ସାମିଲ ଥିବା ଟିଡିପିର ଚନ୍ଦ୍ରଶେଖର ପେମ୍ମାସାନ ପାଖରେ ସବୁଠୁ ଅଧିକ ଘୋଷିତ ସମ୍ପତ୍ତି ରହିଛି । ତାଙ୍କର ମୋଟ ସମ୍ପତ୍ତି ୫୭୦୫ କୋଟି ଟଙ୍କା । ନୂଆ କେନ୍ଦ୍ର ମନ୍ତ୍ରିମଣ୍ଡଳରେ ତାଙ୍କୁ ଗ୍ରାମୀଣ ବିକାଶ ଏବଂ ଦୂରସଂଚାର ରାଷ୍ଟ୍ର ମନ୍ତ୍ରୀ ଦାୟିତ୍ୱ ଦିଆଯାଇଛି ।

ପେମ୍ମାସାନଙ୍କ ପରେ ବିଜେପିର ଜ୍ୟୋତିରାଦିତ୍ୟ ସିନ୍ଧିଆଙ୍କ ସମ୍ପତ୍ତି ୪୨୪ କୋଟି ଟଙ୍କା ଏବଂ ଜେଡିଏସ୍ ନେତା ଏଚଡି କୁମାରସ୍ୱାମୀଙ୍କ ସମ୍ପତ୍ତି ୨୧୭ କୋଟି ଟଙ୍କା ରହିଛି । ମୋଦୀଙ୍କ ନୂଆ ମନ୍ତ୍ରିମଣ୍ଡଳରେ ସିନ୍ଧିଆଙ୍କୁ ଦୂରସଂଚାର ବିଭାଗ ମିଳିଛି । ଅନ୍ୟପଟେ କୁମାରସ୍ୱାମୀଙ୍କୁ ଭାରି ଉଦ୍ୟୋଗ ଏବଂ ଇସ୍ପାତ ମନ୍ତ୍ରଣାଳୟ ମିଳିଛି ।

ଅନ୍ୟ ମନ୍ତ୍ରୀମାନେ ଯେଉଁମାନଙ୍କ ପାଖରେ ୧୦୦ କୋଟି ଟଙ୍କାରୁ ଅଧିକ ସମ୍ପତ୍ତି ରହିଛି, ସେମାନଙ୍କ ମଧ୍ୟରେ ଅଶ୍ୱିନୀ ବୈଷ୍ଣବ (ରେଲୱେ, ଆଇଟି, ସୂଚନା ଏବଂ ପ୍ରସାରଣ ମନ୍ତ୍ରୀ), ରାଓ ଇନ୍ଦ୍ରଜିତ୍ ସିଂ ଏବଂ ପୀୟୂଷ ଗୋୟଲ (ବାଣିଜ୍ୟ ଏବଂ ଉଦ୍ୟୋଗ ମନ୍ତ୍ରୀ) ସାମିଲ ଅଛନ୍ତି । ଏଡିଆର ବିଶ୍ଲେଷଣରେ ଏହା ମଧ୍ୟ କୁହାଯାଇଛି ଯେ ୭୧ ମନ୍ତ୍ରୀଙ୍କ ମଧ୍ୟରୁ ୨୮ ବା ୩୯ ପ୍ରତିଶତ ନିଜ ବିରୋଧରେ ଅପରାଧିକ ମାମଲା ଘୋଷଣା କରିଛନ୍ତି । 

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.