ସମ୍ବଲପୁର ୨୬।୮: ସହକାରୀ ଅଧ୍ୟାପକଙ୍କ ନାଁରେ ସାଂଘାତିକ ଅଭିଯୋଗ । ମାନସିକ ନିର୍ଯାତନା ଦେଉଥିବା ଅଭିଯୋଗ ଆଣିଲେ ଜଣେ ମହିଳା ଅଧ୍ୟାପିକା । ତଦନ୍ତ ପାଇଁ ୫ଜଣିଆ ଟିମ୍ ଗଠନ ହୋଇଛି ।

ସୂଚନାଯୋଗ୍ୟ ଯେ, ସମ୍ବଲପୁର ବିଶ୍ବବିଦ୍ୟାଳୟର ରାଜନୀତି ବିଜ୍ଞାନ ବିଭାଗର ଜଣେ ସହକାରୀ ଅଧ୍ୟାପକଙ୍କ ନାଁରେ ଆସିଛି ସାଂଘାତିକ ଅଭିଯୋଗ । ମାନସିକ ନିର୍ଯାତନା ଦେଉଥିବା ଅଭିଯୋଗ ଆଣିଲେ ସେହି ବିଭାଗର ଜଣେ ଅଧ୍ୟାପିକା । ଘଟଣାକୁ ଗୁରୁତର ସହ ନେଇଛନ୍ତି ବିଶ୍ବବିଦ୍ୟାଳୟର କୁଳପତି । ଘଟଣାର ତଦନ୍ତ ପାଇଁ ଏକ ୫ ଜଣିଆ କମିଟି ଗଠନ କରାଯାଇଛି । ପୂର୍ବରୁ ଶୃଙ୍ଖଳା ଭଙ୍ଗ ଅଭିଯୋଗରେ ୨ ମାସ ତଳେ ସଂପୃକ୍ତ ସହକାରୀ ଅଧ୍ୟାପକ ନିଲମ୍ବିତ ହୋଇଥିଲେ ।

ଅନ୍ୟପଟେ ଏହି ଘଟଣାକୁ ନେଇ ପୁଣି ଜ୍ୟୋତିବିହାର କ୍ୟାମ୍ପସ୍‌ରେ ଅଶାନ୍ତିର ବାତାବରଣ ସୃଷ୍ଟି ହେବାର ଆଶଙ୍କା ଦେଖାଦେଇଛି । ଅଧ୍ୟାପିକା ଅଭିଯୋଗ ଅନୁସାରେ, ଦୀର୍ଘ ୭ ବର୍ଷ ହେବ ଅଧ୍ୟାପକ ଜଣଙ୍କ ତାଙ୍କୁ ନିର୍ଯାତନା ଦେଇ ଆସୁଛନ୍ତି । ଅଧ୍ୟାପିକା ଜଣଙ୍କ ରାଜନୀତି ବିଜ୍ଞାନ ବିଭାଗର ସଂଯୋଜିକା ଦାୟିତ୍ୱରେ ରହିଛନ୍ତି । ଅଧ୍ୟାପିକାଙ୍କୁ ମେଲ୍‌ କରି ସଂପୃକ୍ତ ଅଧ୍ୟାପକ ବିଭାଗୀୟ ମୁଖ୍ୟ ହେବା ପାଇଁ ଯୋଗ୍ୟ ନୁହନ୍ତି ବୋଲି ଅଭିଯୋଗ କରିଥିଲେ । ଫଳରେ ଉଭୟଙ୍କ ମଧ୍ୟରେ ବିବାଦ ଉଗ୍ର ରୂପ ନେଇଥିଲା ବୋଲି ମହିଳା ଜଣଙ୍କ ଉଲ୍ଲେଖ କରିଛନ୍ତି । ଏପରିକି ନିଶାସକ୍ତ ଅବସ୍ଥାରେ ଅଧ୍ୟାପକ ଆସୁଥିବା ବେଳେ ତାଙ୍କ ପାଇଁ ଶିକ୍ଷାର ବାତାବରଣ ନଷ୍ଟ ହେବାରେ ଲାଗିଛି । ସେ ଆହୁରି ମଧ୍ୟ ଲେଖିଛନ୍ତି ଯେ, ଅଧ୍ୟାପକ ଯେତେବେଳେ  ନିଳମ୍ବିତ ହୋଇଥିଲେ ସେହି ସମୟରେ ବିଭାଗ ବହୁତ ଭଲରେ ଚାଲିଥିଲା । ବର୍ତ୍ତମାନ ବିଭାଗର ଶାନ୍ତି ବ୍ୟାହତ ହେଉଛି ବୋଲି ସେ ଅଭିଯୋଗ କରିଛନ୍ତି । ଏହାଛଡା ୨୦୧୬ ମସିହାରୁ ବିନା କାରଣରେ ସେ ମାନସିକ  ନିର୍ଯାତନା ଦେଇଆସୁଥିବା ନେଇ କୁଳପତିଙ୍କ ନିକଟରେ ଲିଖିତ ଅଭିଯୋଗ କରି ନ୍ୟାୟ ଭିକ୍ଷା କରିଛନ୍ତି ।

ତେବେ କର୍ତ୍ତୃପକ୍ଷ ଏହି ଅଭିଯୋଗକୁ ଗୁରୁତର ସହ ନେଇ ଏହାର ତଦନ୍ତ ପାଇଁ ୫ ଜଣିଆ କମିଟି ଗଠନ କରିଛନ୍ତି । ଏଥିରେ ଜ୍ୟୋତିବିହାରର ଜୀବ ବିଜ୍ଞାନ ବିଭାଗ  ପ୍ରଫେସର ବୀନତା ନାୟକ କମିଟିର ମୁଖ୍ୟ ଅଛନ୍ତି । ଏହି  କମିଟିରେ ବିଶ୍ୱବିଦ୍ୟାଳୟର କିଛି ମହିଳା ପ୍ରଫେସରଙ୍କ ସମେତ  ସମ୍ବଲପୁରର କିଛି ଏନ୍‌ଜିଓରେ କାର୍ଯ୍ୟରତ ମହିଳା ଏବଂ ସମ୍ବଲପୁର ସିଡିପିଓ ଅର୍ବାନ ସଦସ୍ୟା ରହିଥିବା ଜଣାପଡଛି ।

You Can Read :