ମୁମ୍ବାଇ ୦୭।୦୮: ଅଭିନୟ ଦୁନିଆରେ କାମ କରିବାର ୧୦ ବର୍ଷ ବିତିଗଲାଣି । ଟେଲିଭିଜନ୍, ସାଉଥ୍ ଓ ବଲିଉଡ୍ ଫିଲ୍ମ ମଧ୍ୟରେ ନିଜକୁ ନିୟନ୍ତ୍ରଣ କରି ଧୀରେ ଧୀରେ ଆଗକୁ ଯାଉଛନ୍ତି ଅଭିନେତ୍ରୀ ଆକାଂକ୍ଷା ସିଂହ । ସ୍ୱପ୍ନ ପୂରଣ କରିବା ପାଇଁ ଅଣନିଶ୍ୱାସୀ ହୋଇ ଧାଇଁବା ବଦଳରେ ଧୀର ଓ ସ୍ଥିର ଗତିରେ ଆଗକୁ ଯିବାକୁ ପସନ୍ଦ କରନ୍ତି ବୋଲି ସେ କହିଛନ୍ତି । ଜଣେ କଳାକାର ଭାବେ ତାଙ୍କ ପରିଚୟ ବଢୁଛି, ତାକୁ ନେଇ ଆକାଂକ୍ଷା ଖୁସି । ଧୀର ଓ ସ୍ଥିର ବ୍ୟକ୍ତି ରେସ୍ ଜିତନ୍ତି । ଏହି ଉକ୍ତିରେ ଆକାଂକ୍ଷା ମଧ୍ୟ ବିଶ୍ୱାସ କରନ୍ତି । ଏହାକୁ ହିଁ ସେ ଫଲୋ କରନ୍ତି । ଭାବପୂର୍ଣ୍ଣ ଓ ଭଲ ଭୂମିକାରେ ଅଭିନୟ କରିବାକୁ ସେ ସର୍ବଦା ଇଚ୍ଛୁକ।
ଏବେ ସେ ପରଦାରେ ଅଧିକ ନଜର ଆସିବାର ସୁଯୋଗ ଖୋଜୁଛନ୍ତି । କିନ୍ତୁ କେବଳ ପରଦାରେ ନଜର ଆସିବା ପାଇଁ ଯେକୌଣସି ପ୍ରୋଜେକ୍ଟର ଅଂଶ ହେବାକୁ ସେ ଚାହାନ୍ତି ନାହିଁ । ଥିଏଟର ପୃଷ୍ଠଭୂମିରୁ ଆସିଥିବା ଆକାଂକ୍ଷା ଏକ ନିର୍ଦ୍ଦିଷ୍ଟ ମାଧ୍ୟମରେ ନିଜକୁ ସୀମିତ ରଖିବାକୁ କଦାପି ଚାହିଁନାହାନ୍ତି ।
ଟିଭି ଛାଡ଼ିବା ପରେ ସେ ଅଧିକ କାମ ଖୋଜିବା ଆରମ୍ଭ କଲେ ଏବଂ ଦକ୍ଷିଣ ସିନେ ଇଣ୍ଡଷ୍ଟ୍ରିରେ ଭଲ ସୁଯୋଗ ପାଇଲେ । ସିନେ ଇଣ୍ଡଷ୍ଟ୍ରିର ଲୋକେ ତାଙ୍କୁ ଜଣେ ଟେଲିଭିଜନ୍ କଳାକାର ରୂପେ ନ ଦେଖନ୍ତୁ, ସେଥିରୁ ବାହାରିବା ଲାଗି ସେ କିଛି ସମୟ ନେଲେ । ଏବେ ସେମାନେ ତାଙ୍କୁ ବିଭିନ୍ନ ଭୂମିକାରେ ଦେଖିବାକୁ ଭଲପାଉଛନ୍ତି ଏବଂ ତାଙ୍କୁ ମଜାଦାର ଚରିତ୍ର ମଧ୍ୟ ଅଫର୍ କରୁଛନ୍ତି ।
