ଅହମ୍ମଦାବାଦ: ଆସନ୍ତା ୯ ତାରିଖରୁ ବର୍ଡର-ଗାଭାସ୍କର ଟ୍ରଫିର ଚତୁର୍ଥ ତଥା ନିର୍ଣ୍ଣାୟକ ମୁକାବିଲା ଅହମ୍ମଦାବାଦର ନରେନ୍ଦ୍ର ମୋଦୀ କ୍ରିକେଟ୍ ଷ୍ଟାଡିୟମରେ ଖେଳାଯିବ। ତେବେ ଏ ପର୍ଯ୍ୟନ୍ତ ସବୁଠୁ ଅଧିକ ଚର୍ଚ୍ଚା ପିଚ୍‌କୁ ନେଇ  ହେଉଛି। ସେ ନାଗପୁର ହେଉ ଅବା ଦିଲ୍ଲୀ କିମ୍ବା ଇନ୍ଦୋର ସବୁଠି ପିଚ୍‌କୁ ନେଇ ବିତର୍କର ବିଷୟ ପାଲଟିଛି। ମାତ୍ର ଏବେ ଅହମ୍ମଦାବାଦରେ ଏକ ନୂତନ ଡ୍ରାମା ଦେଖିବାକୁ ମିଳିଛି। ମାର୍ଚ୍ଚ ୭ ତାରିଖ ସକାଳେ ଦୁନିଆର ସବୁଠୁ ବଡ କ୍ରିକେଟ୍‌ ଷ୍ଟାଡିୟମରେ ଭିନ୍ନ ଦୃଶ୍ୟ ଦେଖିବାକୁ ମିଳିଛି। ପଡିଆରେ ଦୁଇଟି ପିଚ୍‌ କଭର ହୋଇଥିବା ଦେଖିବାକୁ ମିଳିଛି।

ଉଲ୍ଲେଖଯୋଗ୍ୟ, ଶୃଙ୍ଖଳାର ପ୍ରଥମ ଦୁଇଟି ମ୍ୟାଚ୍‌ ଭାରତ ଜିତିଥିବା ବେଳେ ଇନ୍ଦୋର ମ୍ୟାଚ୍‌ରେ ଅଷ୍ଟ୍ରେଲିଆ ପରାଜିତ ହୋଇଛି। ଇନ୍ଦୋର ପିଚ୍‌କୁ ଆଇସିସି ନିମ୍ନମାନର ଦର୍ଶାଇ ୩ ନକରାତ୍ମକ ପଏଣ୍ଟ ଦେଇଛି। ଆଇସିସିର ଏହି  ରେଟିଂ ଏବଂ ସମାଲୋଚନା ଯୋଗୁଁ ଅହମ୍ମଦାବାଦରେ ଢକା ଯାଇଥିବା ଦୁଇଟି ପିଚ୍‌କୁ ନେଇ ପୁଣି ଥରେ ଚର୍ଚ୍ଚା ଜୋର ଧରିଛି। ସାମାଜିକ ଗଣମାଧ୍ୟମରେ ଭାରତ ବ୍ୟତୀତ ଅଷ୍ଟ୍ରେଲିଆର ସାମ୍ବାଦିକ ଯେଉଁ ଚିତ୍ର ସେୟାର କରିଛନ୍ତି, ସେଥିରେ ଦୁଇଟି ପିଚ୍ ଢକା ଯାଇଥିବା ଦେଖିବାକୁ ମିଳିଛି। ମାତ୍ର କେଉଁ ପିଚ୍‌ରେ ହାଇଭୋଲଟେଜ୍ ମୁକାବିଲା ଖେଳାଯିବ ତାହା ସ୍ପଷ୍ଟ ହୋଇ ନାହିଁ।

ଏ ଖବର ପଢନ୍ତୁ- ଅଶ୍ଵିନଙ୍କ ଟାର୍ଗେଟ୍‌ରେ ଅନିଲ କୁମ୍ବଲେଙ୍କ ମହାରେକର୍ଡ, କ’ଣ ଅହମ୍ମଦାବାଦରେ ରଚିବେ ଇତିହାସ ?

କଣ କ୍ୟୁରେଟର ଦୁଇଟି ପିଚ୍ ପ୍ରସ୍ତୁତ କରିଛନ୍ତି ? କଣ ଏ ପର୍ଯ୍ୟନ୍ତ କେଉଁ ପିଚ୍‌ରେ ଶେଷ ମ୍ୟାଚ୍ ଖେଳାଯିବ ନିଷ୍ପତ୍ତି ହୋଇ ନାହିଁ ? ନିର୍ଣ୍ଣାୟକ ମୁକାବିଲା  ଆରମ୍ଭ ହେବାକୁ ଆଉ ୪୮ ଘଣ୍ଟାରୁ କମ ସମୟ ରହିଛି। ଏମିତିରେ ଦୁଇଟି ପିଚ୍ ତିଆରି କରାଯିବା ଅନେକ ପ୍ରଶ୍ନ ଉଙ୍କି ମାରୁଛି। ଶୃଙ୍ଖଳାର ଶେଷ ମୁକାବିଲା ବହୁତ ଗୁରୁତ୍ଵପୂର୍ଣ୍ଣ ରହିଛି। ଅଷ୍ଟ୍ରେଲିଆ ନିକଟରେ ଶୃଙ୍ଖଳା ବରାବର କରିବାର ସୁଯୋଗ ରହିଥିବା ବେଳେ ଭାରତ ନିକଟରେ ମ୍ୟାଚ୍ ଜିତି ବିଶ୍ଵ ଟେଷ୍ଟ ଚାମ୍ପିଅନସିପ୍‌ର ଫାଇନାଲ୍‌ରେ ପହଞ୍ଚିବାର ସୁବର୍ଣ୍ଣ ସୁଯୋଗ ରହିଛି।