ବାସୁଦେବପୁର ୦୨/୦୨: ଭୟାବହ ଅଗ୍ନିକାଣ୍ଡରେ ୪୬ ବଖରା ଘର ଜଳିପୋଡ଼ି ପାଉଁଶ ହୋଇଯାଇଛି। ଏହା ଫଳରେ ୨୨ଟି ପରିବାର କ୍ଷତିଗ୍ରସ୍ତ ହୋଇଥିବା ଜଣାପଡ଼ିଛି। ଏପରି ଏକ ଅଭାବନୀୟ ଘଟଣା ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ବାଲିମେଦ ପଂଚାୟତ ମହାନ୍ତି ସାହିରେ ଦେଖିବାକୁ ମିଳିଛି।

ଖବର ଅନୁସାରେ, ବୁଧବାର ବିଳମ୍ବିତ ରାତିରେ ପ୍ରଥମେ ହରିହର ସାହୁଙ୍କ ଘରେ ନିଆଁ ଲାଗିଥିଲା।ଏହା ଦେଖି ପାଖ ପଡୋଶୀ ଡାକ ପକାଇଥିଲେ।  ନିଆଁର ପ୍ରକୋପ ଏତେ ତିବ୍ର ଥିଲା ଥିଲା ଯେ ଚାହୁଁ ଚାହୁଁ ସମସ୍ତ ବଖରାରେ ନିଆଁ ଲାଗିଯାଇଥିଲା। ଫଳରେ ଜୀବନ ବିକଳରେ ପରିବାର ଲୋକମାନେ ପଦାକୁ ଦୌଡ଼ି ଥିଲେ। ଆଖିପିଛୁଳାକେ ସେଠାରେ ଥିବା ୪୬ ବଖରା ଘର ପୋଡ଼ି ମାଟିରେ ମିଶିଯାଇଥିଲା।

କିପରି ଏହି ଅଗ୍ନିକାଣ୍ଡ ହୋଇଛି ତାର କାରଣ ସ୍ପଷ୍ଟ ହୋଇନାହିଁ। ନିଆଁ ଲାଗିବା ପରେ ସ୍ଥାନୀୟ ଲୋକ ଅଗ୍ନିଶମ ବିଭାଗକୁ ଖବର ଦେଇଥିଲେ। ଏହାଜାଣି ଘଟଣା ସ୍ଥଳରେ ଅଗ୍ନିଶମ କର୍ମଚାରୀମାନେ ପହଞ୍ଚି ଦୀର୍ଘ ୭ ଘଣ୍ଟାର ଅକ୍ଳାନ୍ତ ଉଦ୍ୟମ ପରେ ନିଆଁକୁ ଆୟତ୍ତ କରିଛନ୍ତି। ଏଥିରେ ଘରେ ଥିବା ଧାନ ଚାଉଳ ଠାରୁ ଆରମ୍ଭ କରି ସମସ୍ତ ଆସବାହ ପତ୍ର ପୋଡି ପାଉଁଶ ହୋଇଯାଇଥିବା ଅଗ୍ନିକାଣ୍ଡରେ କ୍ଷତିଗ୍ରସ୍ତ ହୋଇଥିବା ଜଣେ ବ୍ୟକ୍ତି କହିଛନ୍ତି।