ମୁମ୍ଵାଇ ୦୫।୦୩: କରନ ଜୋହରଙ୍କ ଧର୍ମା ପ୍ରଡକ୍ସନ୍ସ ବ୍ୟାନର ଅଧୀନରେ ନିର୍ମିତ ଫିଲ୍ମ ‘ଏ ୱତନ ମେରେ ୱତନ’ର ଟ୍ରେଲର ରିଲିଜ୍ ହୋଇଛି । ଏଥିରେ ମୁଖ୍ୟ ଭୂମିକାରେ ଅଭିନୟ କରିଛନ୍ତି ସାରା ଅଲି ଖାନ୍ । ଏହି ଫିଲ୍ମରେ ସେ ପ୍ରଥମ ଥର ଇମ୍ରାନ ହାଶମିଙ୍କ ସହ କାମ କରିଛନ୍ତି । ବାସ୍ତବ ଘଟଣା ଉପରେ ପର୍ଯ୍ୟବସିତ ଏହି ଫିଲ୍ମରେ ସ୍ୱାଧୀନତା ସଂଗ୍ରାମୀ ଉଷା ମେହତାଙ୍କ ଜୀବନୀକୁ ପରଦାରେ ଦେଖିବାକୁ ପାଇବେ ସିନେପ୍ରେମୀ । କନନ ଅୟରଙ୍କ ନିର୍ଦ୍ଦେଶିତ ଏହି ଫିଲ୍ମ ଆସନ୍ତା ୨୧ ତାରିଖର ଓଟିଟି ପ୍ଲାଟ୍ଫର୍ମ ପ୍ରାଇମ୍ ଭିଡିଓରେ ମୁକ୍ତିଲାଭ କରିବ । ଫିଲ୍ମର ଟ୍ରେଲର୍ରେ ସ୍ୱାଧୀନତା-ପୂର୍ବର ଝଲକ୍ ଦେଖିବାକୁ ମିଳିଛି । ଏଥିରେ ଆରମ୍ଭରୁ ଶେଷ ପର୍ଯ୍ୟନ୍ତ ସାରା ଛାଇଛନ୍ତି ।
୧୯୪୨ ମସିହା ଭାରତ ଛାଡ଼ ଆନ୍ଦୋଳନ ସମୟର ଘଟଣା ଫିଲ୍ମରେ ଦେଖିବାକୁ ମିଳିବ । ବମ୍ବେର ୨୨ ବର୍ଷୀୟା କଲେଜ ଝିଅ ଉଷା ମେହତା (ସାରା) ଗାନ୍ଧିବାଦୀ ବିଚାର ଦ୍ୱାରା ପ୍ରେରିତ ହୋଇ ଦେଶର ସ୍ୱାଧୀନତା ସଂଗ୍ରାମରେ ଭାଗ ନେଇଛନ୍ତି । ସେ ଗୋପନରେ ଏକ ରେଡିଓ ଷ୍ଟେସନ୍ ଚଳାଇ ଏହି ସଂଗ୍ରାମରେ ନିଜର ଯୋଗଦାନ ଦେଇଛନ୍ତି । ଧୀରେ ଧୀରେ ଏହି ରେଡିଓ ଷ୍ଟେସନ୍ ଭାରତଛାଡ଼ ଆନ୍ଦୋଳନର ବହ୍ନିକୁ ପ୍ରଜ୍ଜ୍ୱଳିତ କରିବାର ସବୁଠୁ ବଡ଼ ମାଧ୍ୟମ ହୋଇଛି । ସାରାଙ୍କ ଉପରେ ଫିଲ୍ମଟି ସମ୍ପୂର୍ଣ୍ଣ ରୂପେ ନିର୍ଭରଶୀଳ । ତାଙ୍କ ସହ ‘ଲାପତା ଲେଡିଜ୍’ ଫେମ୍ ସ୍ପର୍ଶ ଶ୍ରୀବାସ୍ତବଳ ସଚିନ ଖେଡ଼େକର ଓ ଆଲେକ୍ସ ଓ ନୀଲ ଅଭିନୟ କରିଛନ୍ତି ।
ଇମ୍ରାନ ଏଥିରେ ଅତିଥି କଳାକାର ଭାବେ ନଜର ଆସିବେ । ଟ୍ରେଲର୍ରେ ତାଙ୍କ ଭୂମିକା ମଧ୍ୟ ଦେଖିବାକୁ ମିଳିଛି । କିନ୍ତୁ ତାଙ୍କୁ ସହଜରେ ଚିହ୍ନି ହେଉନାହିଁ । ସୂଚନାଯୋଗ୍ୟ, ଉଷା ମେହତା ଜଣେ ସମାଜସେବୀ ଓ ସ୍ୱାଧୀନତା ସଂଗ୍ରାମୀ ଥିଲେ । ୧୯୨୦ ମସିହା, ମାର୍ଚ୍ଚ ୨୫ ତାରିଖରେ ଗୁଜରାଟର ସୁରଟରେ ସେ ଜନ୍ମଗ୍ରହଣ କରିଥିଲେ । ୮ ବର୍ଷ ବୟସରେ ସେ ସାଇମନ୍ କମିଶନ ପ୍ରତିବାଦ ଯାତ୍ରାରେ ଭାଗ ନେଇଥିଲେ । ତା’ପରେ ସ୍ୱାଧୀନତା ସଂଗ୍ରାମରେ ସକ୍ରିୟ ଭୂମିକା ନିର୍ବାହ କରିଥିଲେ । ମହାତ୍ମା ଗାନ୍ଧିଙ୍କ ନେତୃତ୍ୱରେ ସେ ରେଡିଓ ପ୍ରସାରଣ ଓ ବାର୍ତ୍ତା ପ୍ରସାର କାମ କରୁଥିଲେ । ତାଙ୍କର ପ୍ରମୁଖ କର୍ମକ୍ଷେତ୍ର ଥିଲା ଆଜାଦ ରେଡିଓ, ଯାହା ୧୯୪୨-୧୯୪୪ ମସିହା ପର୍ଯ୍ୟନ୍ତ ଚାଲିଥିଲା । ବ୍ରିଟିଶ ସରକାର ବିରୋଧରେ ଖବର ପ୍ରସାରଣ ଆୟୋଜନରେ ଉଷା ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ । ୧୯୯୮ ମସିହାରେ ଭାରତ ସରକାର ତାଙ୍କୁ ପଦ୍ମ ବିଭୂଷଣ ଦ୍ୱାରା ସମ୍ମାନିତ କରିଥିଲେ ।
wp:embed {"url":"https://www.prameyanews7.com/anant-radhika-pre-wedding-function-ram-charan-makeup-artist-angry/","type":"wp-embed","providerNameSlug":"prameya-news-7"}