ସାଲେପୁର, ୨୩|୦୮: ଖାଇବାକୁ ନପାଇ ଅନାହାରରେ ୭୦ବର୍ଷୀୟ ଆଦିବାସୀ ବୃଦ୍ଧା ନିକିମା ସିଂହ । ଭୋକର ଜ୍ୱାଳା ସହିନପାରି ଖାଦ୍ୟ ମାଗିବାକୁ ଏଣେତେଣେ ବୁଲୁଥିବା ନିକିମା ହଠାତ ରାସ୍ତା କଡରେ ପଡିଯାଇ ଅଚେତ ହୋଇପଡ଼ିଥିଲେ । ତାଙ୍କୁ କିଛି ସ୍ୱେଚ୍ଛାସେବୀ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଛନ୍ତି ।
ସୂଚନା ଅନୁସାରେ, କଟକ ଜିଲ୍ଲା ସାଲେପୁର ପୁରୁଷୋତ୍ତମପୁର ଗାଁରେ ରୁହନ୍ତି ନିକିମା । ଘର ପରିବାର ନାହିଁ । ଲୁଗା ଟାଙ୍ଗି ରୁହନ୍ତି । ଏଣେତେଣେ ବୁଲି ଯାହା ଖାଇବା ମିଳେ ସେଥିରେ ହିଁ ପେଟ ପୁରେ । ତେବେ ରବିବାର ସେ ରାସ୍ତା କଡରେ ଅଚେତ ହୋଇ ପଡିଯାଇଥିଲେ । ତାଙ୍କୁ ସ୍ଥାନୀୟ କେତେକ ସ୍ୱେଚ୍ଛାସେବୀ ଉଦ୍ଧାର କରି ଦମକଳ ବାହିନୀ ସାହାଯ୍ୟରେ ସାଲେପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କର ଚିକିତ୍ସା କରୁଛନ୍ତି ।
ଅଧିକ ଦିନ ନଖାଇ ନପିଇ ସେ ଦୁର୍ବଳ ହୋଇପଡିଥିବାରୁ ଡାକ୍ତର ସାଲାଇନ ଲଗାଇ ଚିକିତ୍ସା କରୁଛନ୍ତି । କିନ୍ତୁ ନିକିମାଙ୍କ କଥା କହିବାକୁ ବଳ ପାଉନି । ଗତ କିଛି ଦିନ ତଳେ ନିକିମାଙ୍କ ଅସହାୟତା ବାବଦରେ ପ୍ରଶାସନକୁ ଖବର ଦିଆଯାଇଥିଲା । ପ୍ରଶାସନ ମଧ୍ୟ ଘର ଖଣ୍ଡେ ଦେବାକୁ ପ୍ରତିଶ୍ରୁତି ଦେଇଥିଲା । କିନ୍ତୁ ପ୍ରତିଶ୍ରୁତି କେବଳ ପାଣିର ଗାର ଥିଲା ବୋଲି ଧିରେଧିରେ ସ୍ପଷ୍ଟ ହେବାରେ ଲାଗିଛି ।
