ମୁମ୍ବାଇ ୭।୨: ହିଣ୍ଡନବର୍ଗ ରିପୋର୍ଟ ଯୋଗୁ ତଳମୁହାଁ ହୋଇଥିବା ଆଦାନୀ ଗ୍ରୁପ କମ୍ପାନୀଙ୍କ ସେୟାର ମୂଲ୍ୟ ପୁଣି ବଢିବା ଆରମ୍ଭ କରିଛି। ଫଳରେ ଆଦାନୀ ହରାଇଥିବା ସ୍ଥିତି ପୁଣି ଫେରିପାଇବେ ବୋଲି ଆଶା କରାଯାଉଛି। ପ୍ରାୟ ୧୩ ଦିନ ପରେ ଆଦାନୀଙ୍କ ନେଟୱର୍ଥରେ ୩ ବିଲିୟନ ଡଲାର ଅଭିବୃଦ୍ଧି ଦେଖାଯାଇଛି। ଏହି ଅଭିବୃଦ୍ଧି ସହ ଫୋର୍ବସ୍ ରିୟଲ ଟାଇମ୍ ବିଲେନିୟର ଲିଷ୍ଟରେ ଆଦାନୀ ଏକା ଥରେ ୪ଟି ସ୍ଥାନ ଉପରକୁ ଉଠି ସପ୍ତଦଶ ସ୍ଥାନରେ ପହଞ୍ଚିଛନ୍ତି।

ମଙ୍ଗଳବାର ସେୟାର ବଜାରରେ ଆଦାନୀ ଗ୍ରୁପ ସେୟାରରେ ମିଶ୍ରିତ ପ୍ରଭାବ ଦେଖିବାକୁ ମିଳିଛି। ଆଦାନୀ ଗ୍ରୁପର ଅଧିକାଂଶ ଷ୍ଟକ୍‌ ମଙ୍ଗଳବାର ସବୁଜ ସଂକେତରେ ଥିବା ଦେଖାଯାଇଛନ୍ତି। ଆଦାନୀ ଏଣ୍ଟରପ୍ରାଇଜେସ୍ ୨୦ ପ୍ରତିଶତର ଅପର ସର୍କିଟ୍ ସହିତ ୧୮୮୭.୨୦ ଟଙ୍କାରେ ପହଞ୍ଚି ଯାଇଛି। ସେହିପରି ଆଦାନୀ ପୋର୍ଟସ୍ ୯.୮୯ ପ୍ରତିଶତ, ଅମ୍ବୁଜା ସିମେଣ୍ଟ ୬.୨୧ ପ୍ରତିଶତ,ଆଦାନୀ ଡ୍ରାନ୍ସମିସନ ୫ ପ୍ରତିଶତ ଅପର ସର୍କିଟ୍ ସହିତ କାରବାର କରୁଛି।

ଆଦାନୀ ୱିଲମରରେ ମଧ୍ୟ ଅପର ସର୍କିଟ୍ ଲାଗିଛି। ଷ୍ଟକ୍‌ରେ ହୋଇଥିବା ବୃଦ୍ଧି ଯୋଗୁ ଆଦାନୀଙ୍କ ନେଟୱର୍ଥରେ ବୃଦ୍ଧି ଦେଖାଯାଇଛି। ତେବେ ଫୋର୍ବସ୍ ରିୟଲ ଟାଇମ୍ ବିଲେନିୟର ଲିଷ୍ଟର ପ୍ରଥମ ସ୍ଥାନରେ ବର୍ରନାର୍ଡ ଅର୍ନଲ୍ଟ ଥିବା ବେଳେ ତାଙ୍କର ମୋଟ ନେଟୱର୍ଥ ୨୧୭.୫ ବିଲିୟନ ଡଲାର ରହିଛି। ସେହିପରି ତାଙ୍କ ପଛକୁ ୧୮୭.୩ ବିଲିୟନ ନେଟୱର୍ଥ ସହ ଏଲନ ମସ୍କ ଥିବା ବେଳେ ତୃତୀୟ ସ୍ଥାନରେ ୧୨୫.୩ ବିଲିୟନ ନେଟୱର୍ଥ ସହ ଜେଫ ବେଜୋସ ଅଛନ୍ତି।

ସେହିପରି ୧୧୩ ବିଲିୟନ ନେଟୱର୍ଥ ସହ ଲ୍ୟାରି ଏଲିସନ ଚତୁର୍ଥ ସ୍ଥାନରେ ଥିବା ବେଳେ ୱାରେନ ବଫେଟ୍ ପଞ୍ଚମ, ବିଲ ଗେଟସ୍‌ ଷଷ୍ଠ, କାର୍ଲୋସ୍ ସ୍ଲିମ ହେଲୁ ଏଣ୍ଡ ଫ୍ୟାମିଲି ସପ୍ତମ, ଲ୍ୟାରି ପେଜ୍ ଅଷ୍ଟମ, ସର୍ଗେଇ ବ୍ରିନ ନବମ ଓ ଫ୍ରେଙ୍କୋଇସ୍ ବେଟେନକୋର୍ଟ ଏଣ୍ଡ ଫ୍ୟାମିଲି ସୂଚୀର ୧୦ମ ସ୍ଥାନରେ ଅଛନ୍ତି।