ନୂଆଦିଲ୍ଲୀ: ପ୍ରେମ ସମ୍ପର୍କକୁ ନେଇ ଦିଲ୍ଲୀ ହାଇକୋର୍ଟ ଏକ ବଡ଼ ଟିପ୍ପଣୀ କରିଛନ୍ତି। ଏକ ମାମଲାର ଶୁଣାଣି ସମୟରେ ହାଇକୋର୍ଟ କହିଛନ୍ତି, ପ୍ରେମରେ ବିଫଳ ହୋଇ ଯଦି ଜଣେ ଯୁବକ ଆତ୍ମହତ୍ୟା କରୁଛନ୍ତି, ତେବେ ଏଥିପାଇଁ ମହିଳାଙ୍କୁ ଦୋଷୀ କୁହାଯାଇପାରିବନାହିଁ। ଏହା ସହ କୋର୍ଟ ମାମଲାରେ ଜଣେ ମହିଳା ଏବଂ ଅନ୍ୟ ଜଣେ ପୁରୁଷଙ୍କୁ ଆତ୍ମହତ୍ୟା ପାଇଁ ଉସ୍କେଇବା ମାମଲାରେ ଆଗୁଆ ଜାମିନ ମଞ୍ଜୁର କରିଛନ୍ତି।
ସୂଚନା ଅନୁଯାୟୀ, ଜଣେ ଯୁବକଙ୍କ ମୃତ୍ୟୁ ପରେ ତାଙ୍କ ବାପା ଅଭିଯୋଗ ଆଣିଥିଲେ। ଯେଉଁଥିରେ ସେ କହିଥିଲେ ପୁଅର ପ୍ରେମିକା ଏବଂ ଆଉ ଜଣେ ଯୁବକ ମୃତ୍ୟୁ ପାଇଁ ଦାୟୀ। ମୃତକ ସୁଇସାଇଡ ନୋଟ ମଧ୍ୟ ଛାଡ଼ିଥିଲା, ଯେଉଁଥିରେ ସେ ସେମାନଙ୍କ ନାଁ ମଧ୍ୟ ଲେଖିଥିଲେ। ଅଭିଯୋଗ ହୋଇଥିଲା ଯେ, ସେମାନେ ସେମାନଙ୍କ ମଧ୍ୟରେ ଶାରୀରିକ ସମ୍ପର୍କ ଥିବା ଏବଂ ଉଭୟ ଖୁବ୍ଶୀଘ୍ର ବିବାହ କରିବା କଥା କହି ଯୁବକଙ୍କୁ ଭ୍ରମିତ କରିଥିଲେ। ଆଉ ଆତ୍ମହତ୍ୟା କରିବାକୁ ଉସ୍କେଇଥିଲେ। ତେବେ ଏହି ମାମଲାରେ ଯୁବତୀ ଏବଂ ଆଉ ଜଣେ ଯୁବକ କୋର୍ଟ ଆବେଦନ କରିଥିଲେ। ହେଲେ କୋର୍ଟ ଉଭୟଙ୍କ ସପକ୍ଷରେ ବିଚାର କରି ସେମାନଙ୍କ ଆଗୁଆ ଜାମିନ୍ ଦେଇଛନ୍ତି।
ଆହୁରି ପଢ଼ନ୍ତୁ:
ସୀମା-ସଚିନ୍ଙ୍କର ବଢିଲା ଅଡୁଆ, ବିବାହ କରାଇଥିବା ପଣ୍ଡିତଙ୍କୁ ନୋଟିସ୍ ପଠାଇଲେ କୋର୍ଟ
ଲାଇଭ ଲ’ର ରିପୋର୍ଟ ଅନୁଯାୟୀ, ହାଇକୋର୍ଟରେ ଶୁଣାଣି କରୁଥିବା ବିଚାରପତି ଅମିତ ମହାଜନ କହିଛନ୍ତି ‘‘ଯଦି କେହି ଦୁର୍ବଳ ମାନସିକତା ଥିବା ବ୍ୟକ୍ତି ଏଭଳି ପଦକ୍ଷେପ ନେଉଛନ୍ତି, ତେବେ ଏଥିପାଇଁ ଅନ୍ୟ କାହାକୁ ଦୋଷୀ ବୋଲି କୁହାଯାଇପାରିବନାହିଁ।’’ କୋର୍ଟ ଆହୁରି କହିଛନ୍ତି ‘‘ଯଦି କେହି ଛାତ୍ର ପରୀକ୍ଷାରେ ଖରାପ ପ୍ରଦର୍ଶନ ଯୋଗୁଁ ଆତ୍ମହତ୍ୟା କରୁଛି ତେବେ ଏଥିପାଇଁ ପର୍ଯ୍ୟବେକ୍ଷକଙ୍କୁ, କେସ୍ ଖାରଜ ହେବା ପରେ ଯଦି କେହି କ୍ଲାଏଣ୍ଟ ଆତ୍ମହତ୍ୟା କରୁଛନ୍ତି ତେବେ ଓକିଲଙ୍କୁ ଆତ୍ମହତ୍ୟା ପାଇଁ ଉସ୍କେଇବାକୁ ଦାୟୀ ବୋଲି କୁହାଯାଇପାରିବନାହିଁ।’’କୋର୍ଟ କହିଛନ୍ତି ‘‘ଦୁର୍ବଳ ମାନସିକତାର ବ୍ୟକ୍ତିଙ୍କ ନିଷ୍ପତ୍ତି ପାଇଁ ଅନ୍ୟ କାହାକୁ ଆତ୍ମହତ୍ୟା ପାଇଁ ଉସ୍କେଇଥବା ବୋଲି କହି ଦାୟୀ କୁହାଯାଇପାରିବନାହିଁ।’’
କୋର୍ଟ କହିଛନ୍ତି ହ୍ବାଟ୍ସଆପ୍ ଚାଟ୍ରୁ ପ୍ରାଥମିକ ଭାବରେ ଜଣାପଡ଼ୁଛି ମୃତକ ସମ୍ବେଦନଶୀଳ ସ୍ବଭାବର ବ୍ୟକ୍ତି ଥିଲେ। ଯେତେବେଳେବି ମହିଳା କଥା ହେବାକୁ ମନା କରୁଥିଲେ ସେ ଆତ୍ମହତ୍ୟା କରିବାକୁ ଧମକ ଦେଇ ଡରାଉଥିଲା।କୋର୍ଟ ଏହା ମଧ୍ୟ କହିଛନ୍ତି ଯେ, ସୁଇସାଇଡ ନୋଟ୍ ତଥ୍ୟକୁ ଟ୍ରାଏଲ ସମୟରେ ଦେଖାଯିବ। ଏହା ମଧ୍ୟ ଦେଖାଯିବ ଯେ, ଆବେଦକଙ୍କ ତରଫରୁ କୌଣସି ଉସ୍କେଇବା ଭଳି କାମ ହୋଇଥିଲା କି ନାହିଁ ?
