ନୂଆଦିଲ୍ଲୀ: ଯୌନ କେଳେଙ୍କାରୀ ମାମଲାରେ ଫସିଥିବା କର୍ଣ୍ଣାଟକର ପୂର୍ବତନ ମନ୍ତ୍ରୀ ଏଚ୍ଡି ରେଭନ୍ନାଙ୍କ ବିରୋଧରେ ପୁଣି ଏକ ସାଂଘାତିକ ଅଭିଯୋଗ। ମହିଳାଙ୍କୁ ଅପହରଣ ଅଭିଯୋଗରେ ଥାନାରେ ମାମଲା ରୁଜୁ ହୋଇଛି। ୨୦ ବର୍ଷୀୟ ରାଜୁ ଏଚ୍ଡି ନାମକ ଜଣେ ଯୁବକ ରେଭନ୍ନାଙ୍କ ବିରୋଧରେ ଏହି ଅଭିଯୋଗ ଆଣିଛନ୍ତି। ରାଜୁ କହିଛନ୍ତି ଯେ ସେ ଓ ତାଙ୍କ ମାଆ ରେଭନ୍ନାଙ୍କ ଫାର୍ମହାସ୍ରେ କାମ କରୁଥିଲେ। ହେଲେ ତାଙ୍କ ମାଆଙ୍କୁ ଅପହରଣ କରାଯାଇଛି। ଏଥିପାଇଁ ରେଭନ୍ନାଙ୍କୁ ସେ ଦାୟୀ କରି ଥାନାରେ ମାମଲା କରିଛନ୍ତି।
ସୂଚନା ଥାଉକି, ଯୌନ କେଳେଙ୍କାରୀରେ ଯେଉଁ ମହିଳାମାନେ ଫସିଛନ୍ତି ରାଜୁଙ୍କ ମାଆ ମଧ୍ୟ ସେମାନଙ୍କ ମଧ୍ୟରୁ ଜଣେ। ଘଟଣାରେ ପୁଲିସ ଏଚ୍ଡି ରେଭନ୍ନା ଓ ସତୀଶ ବବାନାଙ୍କ ବିରୋଧରେ ମାମଲା ରୁଜୁ କରିଛି। ଅନ୍ୟପଟେ ଏହି ମାମଲାରେ ରେଭନ୍ନା ଆଣ୍ଟିସିପେଟୋରୀ ବେଲ୍ ଆବେଦନ କରିଛନ୍ତି। ସୂଚନା ଥାଉକି ଏଚ୍ଡି ରେଭନ୍ନା ଓ ତାଙ୍କ ପୁଅ ପ୍ରଜ୍ଜ୍ୱଳ ରେଭନ୍ନା ଯୌନ କେଳେଙ୍କରୀ ମାମଲାରେ ଫସିଛନ୍ତି। ଘରୋଇ ସହାୟିକା ଅଭିଯୋଗରେ ମାମଲା ହୋଇଥିବା ବେଳେ ପ୍ରଜ୍ଜ୍ୱଳ ବର୍ତ୍ତମାନ ଫେରାର୍ ହୋଇଯାଇଥିବା ବେଳେ ଏଚ୍ଡିଙ୍କୁ ଏପର୍ଯ୍ୟନ୍ତ ଗିରଫ କରାଯାଇ ନାହିଁ।
ଫିଲ୍ମର ଭୟାନକ କାହାଣୀ ପରି ହୋଇଛି ଅପହରଣ
ମେ ୨ ତାରିଖରେ ରାଜୁ ଏଚ୍ଡି ମହୀଶୂର ଜିଲ୍ଲା କେଆର୍ ନଗର ଥାନାରେ ଅପହରଣ ମାମଲା କରିଥିଲେ। ତାଙ୍କ ମାଆ ଏପ୍ରିଲ ୨୯ ତାରିଖରୁ ନିଖୋଜ ଅଛନ୍ତି। ଏହାପରେ ତାଙ୍କର ଯୌନ ନିର୍ଜାତନାର ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହୋଇଛି। ରାଜୁ ଓ ତାଙ୍କ ମାଆ ରେଭନ୍ନାଙ୍କ ହୋଲେନରସିଂହପୁରରେ ଥିବା ଫାର୍ମ ହାଉସ୍ରେ ୬ ବର୍ଷ ଧରି କାମ କରିଥିଲେ। ୩ ବର୍ଷ ପୂର୍ବେ ମାଆ କାମ ଛାଡ଼ିଦେଇଥିଲେ।
ଏପ୍ରିଲ ୨୬ ତାରିଖ ଦ୍ୱିତୀୟ ପର୍ଯ୍ୟାୟ ଲୋକସଭା ନିର୍ବାଚନର ୩-୪ ଦିନ ପୂର୍ବରୁ ରାଜୁଙ୍କ ପରିବାରକୁ ଜାଣିଥିବା ସତୀଶ ନାମକ ଜଣେ ବ୍ୟକ୍ତି ରାଜୁଙ୍କ ଘରକୁ ଆସିଥିଲେ। ରେଭନ୍ନାଙ୍କ ପତ୍ନୀ ଭବାନୀ ତାଙ୍କ ମାଆଙ୍କୁ କୌଣସି କାମ ପାଇଁ ଡକାଇଛନ୍ତି ବୋଲି କହି ନେଇଯାଇଥିଲେ। ଏହାପରେ ଏପ୍ରିଲ ୨୬ ତାରିଖର ଶତୀଶ ତାଙ୍କ ମାଆଙ୍କୁ ଆଣି ଘରେ ଛାଡ଼ିଦେଇଥିଲା। ତେବେ ଯଦି ପୁଲିସ ଘରକୁ ଆସିବ ତେବେ ମାଆ ସହ ଫେରାର୍ ହୋଇଯିବାକୁ ସତୀଶ ରାଜୁକୁ କହିଥିଲା। ପୁଲିସ ଆସିଲେ ତୁମେ ମୋତେ ଫୋନ୍ କରିବ, ମୁଁ ତୁମାନଙ୍କୁ ନେଇଯିବି ବୋଲି ସତୀଶ କହିଥିବା ରାଜୁ ଥାନାରେ ଅଭିଯୋଗ କରିଛନ୍ତି।
ଏହାର ୩ ଦନ ପରେ ଏପ୍ରିଲ ୨୯ ତାରିଖ ରାତି ପ୍ରାୟ ୯ଟା ବେଳେ ରାଜୁ ସତୀଶ ପୁଣିଥରେ ତାଙ୍କ ଘରକୁ ଆସିଥିଲା ଓ ଘରୁ ତାଙ୍କ ମାଆଙ୍କୁ ଜବରଦସ୍ତ ଉଠାଇ ନେଇଥିଲା। ରେଭନ୍ନାଙ୍କ ତାଙ୍କ ମାଆଙ୍କୁ ନେବାକୁ ଅର୍ଡର ଦେଇଛନ୍ତି ବୋଲି ସତୀଶ କହିଥିଲା। ସତୀଶ କହିଥିଲା ତାଙ୍କ ମାଆଙ୍କୁ କୁଆଡ଼େ ପୁଲିସ ଗିରଫ କରିଛି। ମାଆ ପୁଅ ବିରୋଧରେ ଏକ ମାମଲା ରୁଜୁ ହେବ। ସମସ୍ତେ ଗିରଫ ହେବ ବୋଲି ସତୀଶ ଧମକାଇଥିବା ରାଜୁ ଦାଖଲ କରିଥିବା ଅଭିଯୋଗରେ ଦର୍ଶାଇଛି।
ମେ ୧ ତାରିଖରେ ରାଜୁ ତାଙ୍କ ସାଙ୍ଗମାନଙ୍କ ଠାରୁ ଜାଣିବାକୁ ପାଇଥିଲା ଯେ ତାଙ୍କ ମାଆଙ୍କର ଯୌନ ନିର୍ଯାତନା ଭିଡିଓ ଭାଇରାଲ୍ ହୋଇଛି। ଏହାପରେ ତାଙ୍କ ପରିବାର ଲୋକେ ମଧ୍ୟ କହିଥିଲେ ଯେ ତାଙ୍କ ମାଆଙ୍କ ଗୋଡ଼ ବାନ୍ଧି ତାଙ୍କୁ ନିର୍ଯାତନା ଦିଆଯାଉଥିବାର ଭିଡିଓ ଭାଇରାଲ୍ ହୋଇଛି। ଏହାପରେ ସେହି ଦିନ ରାଜୁ ସତୀଶକୁ ଫୋନ୍ କରି ମାଆ ବିଷୟରେ ପଚାରିଥିଲେ। ହେଲେ ସତୀଶ କହିଥିଲା ଯେ ତାଙ୍କ ମାଆଙ୍କ ବିରୋଧରେ ଥାନାରେ ମାମଲା ହୋଇଛି। ତାଙ୍କ ମାଆ ପ୍ରଜ୍ଜ୍ୱଳଙ୍କ ସହ ମାର୍ପିଟ୍ କରିଥିବାର ଏକ ପୁରୁଣା ମାମଲମାରେ ଥାନାରେ ମାମଲା ହୋଇଛି। ତାଙ୍କୁ ଜାମିନ ନେବାକୁ ହେବ। ସତୀଶ ଠାରୁ କଥା ଶୁଣିବା ପରେ ମାଆକୁ ଅପହରଣ କରାଯାଇଥିବା ସନ୍ଦେହ କରି ରାଜୁ ଥାନାରେ ଅଭିଯୋଗ କରିଛି।
ରାଜୁ ଅଭିଯୋଗରେ କହିଛି ଯେ ମୁଁ ଜାଣିନି ମୋ ମାଆକୁ ସେମାନେ କେଉଁଠି ରଖିଛନ୍ତି। ତା ଜୀବନ ପ୍ରତି ବିପଦ ଥାଇପାରେ ବୋଲି ମୋତେ ଡର ଲାଗୁଛି। ମୁଁ ଆପଣଙ୍କୁ ଅନୁରୋଧ କରୁଛି ତୁରନ୍ତ ମୋ ମାଆଙ୍କୁ ଖୋଜି ଆଣି ଦିଅନ୍ତୁ।