Showcase2022
Showcase2022
previous arrow
next arrow

Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ସ୍ୱାଭିମାନ ଆଗରେ ହାର ମାନିଛି ଗରିବୀ, ବୟସର ଅପରାହ୍ନରେ ବି ନିଜେ ପୋଷୁଛନ୍ତି ନିଜ ପେଟ

3/11/2022 at 10:12 AM

ଯାଜପୁର(୦୩/୧୧): ଦୁଲୁକୁଛି ଭାଇଚାରାର ସହର ଯାଜପୁର । ସଞ୍ଜ ନଇଁଲେ ସହରକୁ ଛୁଟି ଆସୁଛନ୍ତି ହଜାର ହଜାର ଲୋକ । ପରିବାର, ବନ୍ଧୁ ଏବଂ ପରିଜନଙ୍କୁ ସହ ନେଉଛନ୍ତି ପୂଜାର ଆନନ୍ଦ। ଯାଜପୁର କୁସୁମା ନିକଟରେ ଆୟୋଜିତ ହୋଇଥିବା ବାଣିଜ୍ୟ ମେଳାରେ ଲାଗିଛି ଲୋକଙ୍କ ଭିଡ଼। ମେଳାରେ ଆୟୋଜିତ ହେଉଛି ମିନାବଜାର । ସାଜସଜ୍ଜା ଓ ଝିଲିମିଲି ଆଲୁଅରେ ନିଜକୁ ହଜାଇ ଦେଉଛନ୍ତି ହଜାହଜାର ଲୋକ । ବିଭିନ୍ନ ଘର କରଣା ଜିନିଷପତ୍ର ଓ ପିଲାଙ୍କ ପାଇଁ ଖେଳଣା କିଣିବାକୁ ସମସ୍ତେ ତତ୍ପର ।

ତେବେ ଏହି ମେଳାର ଚାକଚକ୍ୟ ମଧ୍ୟରେ ଦେଖିବାକୁ ମିଳିଥିଲା କିଛି ଭିନ୍ନ ଦୃଶ୍ୟ। ମେଳାର ଗୋଟିଏ ଦ୍ୱାର ସମ୍ମୁଖରେ ବସିଛନ୍ତି ଜଣେ ଵୃଦ୍ଧ । ରୁଗ୍ଣ ଶରୀର, ଛିଣ୍ଡା ବସ୍ତ୍ର, ଆଖିରେ ଚଷମା, ମୁଣ୍ଡରେ ଟୋପି । ବାମ ହାତରେ ଗୁଡା ହୋଇଛି କପଡା । କଥା କହୁ ନାହାନ୍ତି । କେବଳ ଗୁଣୁ ଗୁଣୁ ହୋଇ କଣ ଗାଉଛନ୍ତି । ହେଲେ ତାଙ୍କୁ ଦେଖି ବାଟ ଭାଙ୍ଗି ଚାଲି ଯାଉଛନ୍ତି ଲୋକମାନେ । ଯେଉଁମାନେ ଚାଲି ଯାଉଛନ୍ତି ସେମାନଙ୍କ ଆଖି ନିଶ୍ଚିତ ଧୋକା ଦେଉଛି ସେମାନଙ୍କୁ । ଟିକେ ନିରିଖେଇ ତାଙ୍କୁ ଦେଖିଲେ ତାଙ୍କ ଭିତରେ ଥିବା ପ୍ରଚଣ୍ଡ ସ୍ୱାଭିମାନକୁ ଜାଣିହେବ । ଭାବୁଥିବେ ପରିଣତ ବୟସରେ ତାଙ୍କୁ ଭିକ ମାଗୁଛନ୍ତି। କିନ୍ତୁ ଏହି ଧାରଣା ଭୁଲ୍ । ବୃଦ୍ଧ ଜଣକ ନିଜ ନିକଟରେ ସେ ରଖିଛନ୍ତି ପେନ୍ । ଯାହାକୁ ବିକ୍ରି କରି ନିଜ ପେଟ ପୋଷୁଛନ୍ତି।

ମୂଲ୍ୟ ପଚାରିବାରୁ କିଛି ନକହି ପାଖରେ ଥିବା ଟଙ୍କା ଦେଖାଇ ଗୋଟିଏ ପେନକୁ ୧୦ ଟଙ୍କା ବୋଲି ଇଶାରା ଦେଉଛନ୍ତି । କିଏ ନେଉଛି ତ କିଏ ନେଉ ନାହିଁ । ତାଙ୍କୁ ତାଙ୍କ ନାଁ ଓ ଠିକଣା ବିଷୟ ରେ ପଚାରିଲେ ବି କିଛି କହୁ ନାହାନ୍ତି । ହେଲେ ଏଭଳି ଅବସ୍ଥାରେ ବସି ପେନ ବିକ୍ରି କରିବା ତାଙ୍କ ଆର୍ଥିକ ଅବସ୍ଥାକୁ ସୂଚାଉଛି । ସରକାରଙ୍କ ମାଳମାଳ ଯୋଜନା ନିଶ୍ଚିତ ତାଙ୍କ ନିକଟରେ ପହଂଚି ନଥିବ । ତାଙ୍କ ଗରିବୀ ତାଙ୍କୁ ନିଶ୍ଚିତ ଏହି ଅବସ୍ଥାକୁ ଟାଣି ଆଣିଛି । ସେ କିଏ, ତାଙ୍କ ପରିଚୟ କଣ ? କାହିଁକି ଏ ବୟସରେ ସେ ଏହି କାମ କରୁଛନ୍ତି ।

ଏମିତି ଅନେକ ଅସମାହିତ ପ୍ରଶ୍ନ ତାଙ୍କୁ ଦେଖିଲେ ମନରେ ଉଙ୍କି ମାରିବା ସ୍ୱାଭାବିକ । ଜିଲ୍ଲା ପ୍ରଶାସନ ତାଙ୍କ ବିଷୟରେ ଖବର ନେଇ ତାଙ୍କୁ ସହାୟତା ପ୍ରଦାନ କରିବା ଜରୁରୀ ହୋଇଛି । ତାଙ୍କୁ ସହାୟତା ପ୍ରଦାନ କଲେ ହୁଏତ ପରିଣତ ବୟସରେ ଟିକିଏ ଖୁସି ପାଇବାରେ ସକ୍ଷମ ହୁଅନ୍ତେ । ହୁଏତ ଏହି ପ୍ରଚଣ୍ଡ ସ୍ୱାଭିମାନୀ ମଣିଷ ଜଣକୁ କେହି ଭିକାରୀ ବୋଲି ଭାଵନ୍ତେ ନାହିଁ । ପ୍ରଶାସନ କଣ ସତରେ ତାଙ୍କ ପ୍ରତି ସଦୟ ହେବ, ତାଙ୍କୁ ସହାୟତା ର ହାତ ବଢ଼ାଇବ । କେଜାଣି ?

   Related Posts