Hari omm 2
hari om films
AKK 2023
AKK2023
HARI-OMM_728X90_B
Showcase2022
hari om films
WEB_F-8
WEB_F-9
previous arrow
next arrow

Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ପଦ୍ମପୁର ଉପନିର୍ବାଚନରେ ବମ୍ପର ଭୋଟିଂ, ସନ୍ଧ୍ୟା ୬ଟା ସୁଦ୍ଧା ୮୦.୦୫ ପ୍ରତିଶତ ମତଦାନ, ଇଭିଏମରେ ସିଲ୍ ହେଲା ୧୦ ପ୍ରାର୍ଥୀଙ୍କ ଭାଗ୍ୟ

5/12/2022 at 8:37 PM

ପଦ୍ମପୁର/ଭୁବନେଶ୍ଵର:  ଶାନ୍ତି ଶୃଙ୍ଖଳାର ସହ ପଦ୍ମପୁରରେ ସରିଲା ଭୋଟ୍ । ଇଭିଏମରେ ସିଲ୍ ହୋଇଛି ୧୦ ପ୍ରାର୍ଥୀଙ୍କ ଭାଗ୍ୟ । ଉପ ନିର୍ବାଚନରେ ଉତ୍ସାହର ସହ ଭୋଟ୍ ଦେଇଛନ୍ତି ପଦ୍ମପୁରବାସୀ । ଏଥର ରେକର୍ଡ ସଂଖ୍ୟାରେ ମତଦାତା ନିଜର ମତାଧିକାର ସାବ୍ୟସ୍ତ କରିଛନ୍ତି। ସନ୍ଧ୍ୟା ୬ଟା  ସୁଦ୍ଧା ୮୦.୦୫ ପ୍ରତିଶତ ମତଦାନ ହୋଇଛି । ଭୋଟ୍ ସମୟରେ ଲୋକଙ୍କ ମଧ୍ୟରେ ବେଶ ଉତ୍ସାହ ଦେଖିବାକୁ ମିଳିଛି। ଅନ୍ୟପଟେ ନିଜ ନିଜ ଅଂଚଳରେ ହୋଇଥିବା ବୁଥରେ ଯାଇ ଭୋଟ୍ ଦେଇଛନ୍ତି ପ୍ରମୁଖ ୩ ରାଜନୈତିକ ଦଳର ପ୍ରାର୍ଥୀ ।

ପଦ୍ମପୁରରେ କାଁ ଭାଁ ଉତ୍ତେଜନାକୁ ଛାଡ଼ିଦେଲେ ଶାନ୍ତି ଶୃଙ୍ଖଳାର ସହ ସରିଛି ମତଦାନ ପ୍ରକ୍ରିୟା । ୩୧୯ ବୁଥରେ ମତଦାନ କରିଥିଲେ ଭୋଟର । ୪ଟି ବୁଥରେ ଇଭିଏମ ଅଚଳ ହୋଇଥିବାରୁ ମତଦାନ ସାମାନ୍ୟ ବିଳମ୍ବ ହୋଇଥିଲା। ସେସବୁ ବୁଥରେ ସଙ୍ଗେ ସଙ୍ଗେ ଇଭିଏମ ପରିବର୍ତ୍ତନ କରାଯାଇ ଭୋଟିଂ କରାଯାଇଥିଲା । ଅପରାହ୍ଣ ୪ରେ ମତଦାନ ପ୍ରକ୍ରିୟା ସରିବ ବୋଲି ପୂର୍ବରୁ ଘୋଷଣା ହୋଇଥିଲେ ମଧ୍ୟ ୮୯ଟି ବୁଥରେ ଅନେକ ଲୋକ ଭୋଟ୍ ଦେବା ପାଇଁ ଧାଡ଼ିରେ ରହିଥିବାରୁ ସେସବୁ ବୁଥରେ  ସଂଧ୍ୟା ସାଢ଼େ ୬ଟା ଯାଏଁ ଭୋଟିଂ କରାଯାଇଥିଲା ।  ଏବେ ୩୧୯ ବୁଥରୁ ଇଭିଏମ ମେସିନଗୁଡ଼ିକୁ କଡ଼ା ସୁରକ୍ଷା ବ୍ୟବସ୍ଥା ଭିତରେ ନିଆଯାଇ ପଦ୍ମପୁର ଆରଏମସିରେ ରଖାଯାଇଛି । ଷ୍ଟ୍ରଙ୍ଗରୁମ୍କୁ ସିସିଟିଭି ନଜରରେ ରଖାଯିବା ସହ ଦ୍ବି-ସ୍ତରୀୟ ସୁରକ୍ଷା ବ୍ୟବସ୍ଥା କରାଯାଇଛି ।

ପଦ୍ମପୁରରେ ସକାଳ ୭ଟାରୁ ଆରମ୍ଭ ହୋଇଯାଇଥିଲା ମତଦାନ ପ୍ରକ୍ରିୟା । ଭୋଟ୍ ଦେବାକୁ ଲମ୍ବା ଧାଡ଼ି ଲଗାଇଥିଲେ ଭୋଟର । ପ୍ରଥମ ଭାଗରେ ବୁଥ ଗୁଡ଼ିକରେ ଅଧିକ ଥିଲା ମହିଳା ଭୋଟରଙ୍କ ଭିଡ଼ ।  ଏହାରି ଭିତରେ ସକାଳୁ ସକାଳୁ ନିଜ ନିଜ ବୁଥରେ ଭୋଟ ଦେବାକୁ ହାଜର ହୋଇଯାଇଥିଲେ ପ୍ରମୁଖ ୩ ରାଜନୈତିକ ଦଳର ପ୍ରାର୍ଥୀ । ବିଜେଡି ପ୍ରାର୍ଥୀ ବର୍ଷା ସିଂ ବରିହା ରାଜାପଡ଼ା ସ୍କୁଲରେ ହୋଇଥିବା ୨୧୩ ନମ୍ବର ବୁଥରେ ନିଜର ଭୋଟ୍ ଦେଇଥିଲେ । ଲୋକଙ୍କ ସହ ଧାଡ଼ିରେ ଠିଆ ହୋଇ ନିଜ ସମୟକୁ ଅପେକ୍ଷା କରିଥିଲେ ବର୍ଷା । ଭୋଟ୍ ଦେଇ ବାହାରିବା ପରେ ଗଣମାଧ୍ୟମ ସାମ୍ନାରେ ଅଧିକରୁ ଅଧିକ ସଂଖ୍ୟାରେ ଲୋକଙ୍କୁ ଭୋଟ୍ ଦେବାକୁ ଅପିଲ କରିଥିଲେ ବିଜେଡି ବିଧାୟକ ପ୍ରାର୍ଥୀ ବର୍ଷା ସିଂ ବରିହା ।

ବିଜେପି ପ୍ରାର୍ଥୀ ପ୍ରଦୀପ ପୁରୋହିତ ମଧ୍ୟ ନିଜ ମତାଧିକାର ସାବ୍ୟସ୍ତ କରିବାକୁ ପାଇକମାଳସ୍ଥିତ ସରକାରୀ ସ୍କୁଲରେ ହୋଇଥିବା ୧୨୮ ନମ୍ବର ବୁଥରେ ପହଞ୍ଚିଥିଲେ । ସାଙ୍ଗରେ ଥିଲେ ପ୍ରଦୀପଙ୍କ ମାଆ ଓ ପତ୍ନୀ । ଖୁବ୍ ଉତ୍ସାହର ସହ ଭୋଟ୍ ଦେଇ ବାହାରିବା ପରେ ନିଜ ପ୍ରତିକ୍ରିୟାରେ ପ୍ରଦୀପ କହିଥିଲେ ଗଣତନ୍ତ୍ରର ମହାନ ପର୍ବରେ ସମସ୍ତେ ସାମିଲ ହୋଇ ନିଜ ବିବେକ୍ ଅନୁସାରେ ଭୋଟ୍ ଦିଅନ୍ତୁ ।

୩ବର୍ଷ ପରେ ପୁଣି ଗୋଟେ ଉପନିର୍ବାଚନକୁ ସାମ୍ନା କରିଥିବା ପଦ୍ମପୁରବାସୀଙ୍କ ଭିତରେ ମତଦାନକୁ ନେଇ ଦେଖିବାକୁ ମିଳିଥିଲା ଅପୂର୍ବ ଉତ୍ସାହ । ଯାହା ଭୋଟିଂ ପର୍ସେଣ୍ଡେଜ୍ରୁ ସ୍ପଷ୍ଟ ବାରି ହୋଇପଡ଼ୁଥିଲା । ସକାଳୁ ସକାଳୁ ବହୁ ସଂଖ୍ୟାରେ ମହିଳାମାନେ ଭୋଟ୍ ଦେବାକୁ ବୁଥ ଗୁଡ଼ିକରେ ଲମ୍ବା ଧାଡ଼ିରେ ଠିଆ ହୋଇଥିଲେ । ଘରକାମକୁ ପଛରେ ପକାଇ ପ୍ରଥମେ ନିଜ ମତାଧିକାର ସାବ୍ୟସ୍ତ କରିବାକୁ ଆସିଥିଲେ । ବାଡ଼ି ଧରି ନିଜ ସମ୍ପର୍କୀୟଙ୍କ ସହ ଭୋଟ୍ ଦେବାକୁ ଆସିଥିଲେ ବୟସ୍କ । କେବଳ ବୟସ୍କ କାହିଁକି, ଭିନ୍ନକ୍ଷମମାନେ ବି ହ୍ବିଲ୍ ଚେୟାରରେ ଆସି ସେମାନଙ୍କ ମତାଧିକାର ସାବ୍ୟସ୍ତ କରିଥିଲେ । ସ୍କୁଲ ପିଲାମାନେ ସ୍ବେଚ୍ଛାସେବୀ ସାଜି ବୟସ୍କ ଓ ଭିନ୍ନକ୍ଷମଙ୍କୁ ହ୍ବିଲ୍ ଚେୟାରେ ବସାଇ କିମ୍ବା ଧରି ଧରି ବୁଥ ଭିତରକୁ ନେଇ ଯାଉଥିବାର ଦେଖିବାକୁ ମିଳିଥିଲା। ନିର୍ବାଚନ କମିଶନଙ୍କ ପକ୍ଷରୁ ଭିନ୍ନକ୍ଷମ ଓ ବୟସ୍କଙ୍କୁ ଘରୁ ଆସିବା ଲାଗି ଗାଡ଼ିର ବ୍ୟବସ୍ଥା ମଧ୍ୟ କରାଯାଇଥିଲା ।

ସମସ୍ତଙ୍କ ପାଇଁ ଆକର୍ଷଣ ସାଜିଥିଲା ୬ଟି ପିଙ୍କ୍ ବୁଥ, ୧୫ଟି ମଡେଲ ବୁଥ । ଦେଖନ୍ତୁ କିଭିଳି ପିଙ୍କ୍ ବେଲୁନରେ  ସଜା ହୋଇଥିଲା ଏସବୁ ପିଙ୍କ୍ ବୁଥ ଗୁଡ଼ିକୁ । ବୁଥରେ ନିୟୋଜିତ ମହିଳା ଅଧିକାରୀମାନେ ମଧ୍ୟ ସମ୍ବଲପୁରୀ ଶାଢ଼ୀ ପିନ୍ଧି ମତଗ୍ରହଣ ପ୍ରକ୍ରିୟାକୁ ଆଗକୁ ବଢ଼ାଉଥିଲେ । ଯାହା ଗଣତନ୍ତ୍ରର ଉତ୍ସବରେ ସାମିଲ ହେବାକୁ ଭୋଟରଙ୍କୁ ଅଧିକ ଉତ୍ସାହିତ କରୁଥିଲା ।    ଏବେ ନିଜର ନୂଆ ବିଧାୟକ ବାଛି ସାରିଛନ୍ତି ପଦ୍ମପୁର ଭୋଟର ।  ଇଭିଏମ୍ରେ ସିଲ୍ ହୋଇସାରିଛି ୧୦ ପ୍ରାର୍ଥୀଙ୍କ ଭାଗ୍ୟ । ୮ ତାରିଖରେ ଗଣତି ପରେ ଜଣାପଡ଼ିବ କାହା ମୁଣ୍ଡରେ ସୁନା କଳସି ଢ଼ାଳିଛନ୍ତି ପଦ୍ମପୁରବାସୀ ।

   Related Posts