ନୂଆଦିଲ୍ଲୀ: ଦକ୍ଷିଣ କୋରିଆ ଏବଂ ଜାପାନ ମଧ୍ୟରେ ସମୁଦ୍ରରେ ବୁଧବାର ଏକ ମାଲବାହୀ ଜାହାଜ ବୁଡ଼ିବା ମାମଲା ସାମନାକୁ ଆସିଥିଲା । ଏହି ଦୁର୍ଘଟଣାରେ ଚାଳକ ଦଳ ସହ ଆଠ ସଦସ୍ୟଙ୍କ ମୃତ୍ୟୁ ହୋଇଛି । ଚାଳକ ଦଳର ମୃତ ସଦସ୍ୟଙ୍କ ମଧ୍ୟରୁ ଛଅ ଜଣ ଚୀନ ନାଗରିକ ହୋଇଥିବା ଜଣାପଡିଛି । ଜାପାନ ମିଡିଆ ରିପୋର୍ଟ ଅନୁସାରେ,ଏହି ଦୁର୍ଘଟଣା ଜାପାନର ନାଗାଶାକି ପ୍ରାନ୍ତରୁ ଦୂରରେ ଥିବା ପୂର୍ବ ଚୀନ ସାଗରରେ ହୋଇଛି । ଏହା ପୂର୍ବରୁ ମିଳିଥିବା ସୂଚନା ଅନୁସାରେ ଦୁର୍ଘଟଣାର ଶିକାର ହୋଇଥିବା କାର୍ଗୋ ଜାହାଜରେ ୨୨ ଜଣ ଥିଲେ ଏବଂ ୧୪ ଜଣଙ୍କୁ ବାହାର କରାଯାଇଥିଲା । ଏଥିରୁ ଦୁଇ ଜଣଙ୍କ ମୃତ୍ୟୁ ହୋଇଥିଲା ।
ରିପୋର୍ଟ ଅନୁସାରେ, ୬୫୫୧ ଟନ ଓଜନର ମାଲବାହୀ ଜାହାଜ ଜିନ ତିୟାନ ହଂକଂରେ ପଞ୍ଜିକୃତ ଥିଲା । ଏହି ଜାହାଜରେ ଯାତ୍ରା କରୁଥିବା ୨୨ ଜଣଙ୍କ ମଧ୍ୟରୁ ୧୪ ଜଣ ଚୀନ ନାଗରିକ ଥିଲେ ଅନ୍ୟ ୮ ଜଣ ମିଆଁମାର ହୋଇଥିବା କୁହାଯାଉଛି । ଏହି ଜାହାଜ କାଠ ନେଇ ମାଲେସିଆରୁ ଦ.କୋରିଆର ଇଞ୍ଚିୟୋନ ଯାତ୍ରା କରୁଥିଲା । ତେବେ ବର୍ତ୍ତମାନ ସୁଦ୍ଧା କାହାକୁ ବି ହସ୍ପିଟାଲରେ ଭର୍ତ୍ତି କରାଯାଇ ନାହିଁ, କିନ୍ତୁ ସେମାନଙ୍କ ଦେଶ ସହ ଏ ବିଷୟରେ ଆଲୋଚନା କରାଯାଇଛି ।
କ୍ୱୋଡୋ ନ୍ୟୁଜ ଏଜେନ୍ସି ଆନୁସାରେ, ଜାହାଜ ପୂର୍ବ ଚୀନ ସାଗରରେ ଜାପାନର ଦାଞ୍ଜୋ ଦ୍ୱୀପ ସମୁହରୁ ପ୍ରାୟ ୧୧୦ କିଲୋମିଟର ପଶ୍ଚିମରେ ରାତି ପ୍ରାୟ ୧୧:୧୫ରେ ଜରୁରିକାଳୀନ ସଂକଟର ସୂଚନା ଦେଇଥିଲା । ଜାହାଜ ସହାୟତା ଲୋଡିବା ସମୟରେ ସମ୍ପୃକ୍ତ ଅଞ୍ଚଳରେ ବତ୍ୟା ନେଇ ଚେତାବନୀ ଜାରି କରାଯାଇଥିଲା ।
