ନୂଆଦିଲ୍ଲୀ: ଛତିଶଗଡ଼ର ବିଜାପୁରରୁ ଏକ ବଡ଼ ଖବର ସାମନାକୁ ଆସୁଛି । ଏଠାରେ ପୋଲିସ ଗୁଳିରେ ୮ ଜଣ ନକ୍ସଲ ନିହତ ହୋଇଥିବା ଜଣାପଡ଼ିଛି । ସୂତ୍ର ଅନୁସାରେ ମୃତ ନକ୍ସଲଙ୍କ ସଂଖ୍ୟା ଆହୁରି ଅଧିକ ହୋଇପାରେ । ଘଟଣାସ୍ଥଳରୁ ବିପୁଳ ପରିମାଣର ମାଓ ସାମଗ୍ରୀ ଜବତ କରାଯାଇଛି ।
ରିପୋର୍ଟ ଅନୁସାରେ ଏଠାରେ ତିନି ଜିଲ୍ଲାର ଯବାନ ଆଣ୍ଟି ନକ୍ସଲ ଅପରେସନରେ ସାମିଲ ହୋଇଥିଲେ । ପ୍ରାୟ ୧୧ ଘଣ୍ଟା ଧରି ଏହି ଅପରେସନ ଚାଲିଛି । ବିଜାପୁର, ଦାନ୍ତେୱାଡା ଏବଂ ସୁକମାର ଡିଆରଜି, ଏସଟିଏଫ, କୋବ୍ରା ଏବଂ ସିଆରପିଏଫର ପ୍ରାୟ ୧୨୦୦ ଯବାନ ଆଣ୍ଟି ନକ୍ସଲ ଅପରେସନରେ ସାମିଲ ଅଛନ୍ତି । କୁହାଯାଉଛି ଯେ ନକ୍ସଲଙ୍କ ସହ ଏହି ଏନକାଉଣ୍ଟର ଶୁକ୍ରବାର ସକାଳ ୬ଟାରୁ ଜାରି ରହିଛି ।
ଖବର ଅନୁସାରେ ସୁରକ୍ଷା ବଳଙ୍କ ପାଖରେ ବଡ଼ ନକ୍ସଲ ଲିଡର୍ସଙ୍କ ଉପସ୍ଥିତି ନେଇ ଗୁଇନ୍ଦା ତଥ୍ୟ ମିଳିଥିଲା । ଏହାପରେ ଅପରେସନ ଆରମ୍ଭ କରାଯାଇଥିଲା । ବସ୍ତର ଆଇଜି, ଡିଆରଜିଙ୍କ ସମେତ ତିନି ଜିଲ୍ଲାର ଏସପି ଏହି ଅପରେସନ ଏବଂ ଏନକାଉଣ୍ଟର ଉପରେ ନଜର ରଖିଛନ୍ତି । ତେବେ ବର୍ତ୍ତମାନ ଏହି ଖବର ଉପରେ କୌଣସି ଆନୁଷ୍ଠାନିକ ବୟାନ ଆସି ନାହିଁ ।