ସମ୍ୱଲପୁର ୧୨/୦୭: ତ୍ରୁଟିପୂର୍ଣ୍ଣ ଚିକିତ୍ସା ପାଇଁ ଡାକ୍ତର ଓ ନର୍ସିଂହୋମ କର୍ତ୍ତୃପକ୍ଷଙ୍କୁ ପଡିଛି ମହଙ୍ଗା । ଅଭିଯୋଗ ପରେ ଖାଉଟି ଅଦାଲତ ଏହାର ଶୁଣାଣି କରି ରୋଗୀଙ୍କୁ କ୍ଷତିପୂରଣ ଆକାରରେ ୭୮ ଲକ୍ଷ ଟଂକା ପଇଠ କରିବା ନେଇ ଡାକ୍ତର ଓ ନର୍ସିଂ ହୋମ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି । କ୍ଷତିପୂରଣ ଦେବାରେ ବିଳମ୍ବ କଲେ ବାର୍ଷିକ ୧୨ ପ୍ରତିଶତ ସୁଧ ଦେବାକୁ ରାୟରେ ଉଲ୍ଲେଖ ରହିଛି ।

ସୂଚନାଥାଉକି, ୮ ନଭେମ୍ବର ୨୦୧୭ରେ ମୋଦିପଡାର ସୁମିତ ଦାଶ ସମ୍ବଲପୁରରୁ ବୁର୍ଲା ଯାଉଥିବାବେଳେ ଦୁର୍ଘଟଣାର ଶିକାର ହୋଇଥିଲେ । ତାଙ୍କର ଡାହାଣ ଗୋଡ, ପାଦ, ଡାହାଣ ହାତର ବିଭିନ୍ନ ସ୍ଥାନରେ କ୍ଷତ ହେବା ସହ ବୁର୍ଲା ଭୀମସାରରେ ଭର୍ତ୍ତି ହୋଇଥିଲେ । ସେଠାରେ ଅସ୍ଥିଶୈଲ୍ୟ ବିଶେଷଜ୍ଞ ଡାକ୍ତର ସୁରଜ ଜୈନ ସୁମିତଙ୍କ ସର୍ଜରୀ କରିବା ପାଇଁ ଭୀମସାରରେ ୪ଦିନ ସମୟ ଲାଗିବ ଓ ଯଦି ସମ୍ବଲପୁର ସହର ସ୍ଥିତ ସ୍ପର୍ଶ ସିଟି ଯାଆନ୍ତି ତେବେ ସେହି ଦିନ ହିଁ ସର୍ଜରୀ ହେବ ବୋଲି ସୁମିତଙ୍କ ବଡ ଭାଇ ଅମିତ କୁମାର ଦାଶଙ୍କୁ କହିଥିଲେ ।

ଡାକ୍ତରଙ୍କ କହିବା ମୁତାବକ ତାଙ୍କୁ ପରଦିନ ହିଁ ସ୍ପର୍ଶ ସିଟିକୁ ନିଆଯାଇଥିଲା । ସେଠାରେ ୧୨ଦିନ ଧରି ଚିକିତ୍ସା ଚାଲିଥିଲା । ତେବେ ସେଠାରେ ନର୍ସିଂହୋମର ଦାବି ମୂତାବକ ସୁମିତଙ୍କ ପରିବାର ଲୋକେ ୧ ଲକ୍ଷ ୨୬ ହଜାର ୬୭୬ ଟଂକା ଦେଇଥିଲେ । ତେବେ ସର୍ଜରୀ ସମୟରେ ଆଣ୍ଠୁ ଓ ଅନ୍ୟନ୍ୟା ସ୍ଥାନରେ ଷ୍ଟେନଲେସ ଷ୍ଟିଲ ବଦଳରେ ଟାଇଟେନିୟମ ବ୍ୟବହାର କରିବାକୁ ସୁମିତଙ୍କ ବଡ ଭାଇ ଅମିତ ଲଗାତାର କହି ଆସୁଥିଲେ ।

ହେଲେ ସର୍ଜରୀରେ ତୃଟି ଯୋଗୁଁ ତାହା ବାରମ୍ବାର ପାଚିବା ସହ ରାଜ୍ୟ ବାହାରକୁ ଯାଇ ଚିକିତ୍ସା କରିବାକୁ ପଡିଥିଲା । ଏଥିରେ ଖର୍ଚ୍ଚାନ୍ତ ହେବା ସହ ସୁମିତ ଦୀର୍ଘ ଦିନ କର୍ମ ସଂସ୍ଥାନରେ ଯୋଗ ଦେଇ ପାରିନଥିଲେ । ଫଳରେ ଇନଫୋସିସ ଭଳି ନାମୀ ସଂସ୍ଥା ସୁମିତଙ୍କୁ ଚାକିରୀରୁ ବିଦା କରିଥିଲା । ଫଳରେ ଡାକ୍ତର ଜୈନ ଏବଂ ସ୍ପର୍ଶ ସିଟି ହସପିଟାଲ କର୍ତ୍ତୃପକ୍ଷ ଅନନ୍ୟା ଅନୁସୟା ନାୟକ, ଡାକ୍ତର ସଂଜୟ ଭୋଇ, ସ୍ପର୍ଶ ନର୍ସିଂ ହୋମ ବିରୁଦ୍ଧରେ ସୁମିତ ଦାସ ଓ ତାଙ୍କ ବାପା ଅରବିନ୍ଦ ଦାସ ଖାଉଟି ଅଦାଲତଙ୍କ ଦ୍ବାରସ୍ଥ ହୋଇଥିଲେ ।

ଅଦାଲତ ଏହାର ଶୁଣାଣି କରି ଡାକ୍ତର ଜୈନ, ସ୍ପର୍ଶ ସିଟି ହସପିଟାଲର ଡାକ୍ତର ସଂଜୟ ଭୋଇ ଏବଂ ହସପିଟାଲ କର୍ତ୍ତୃପକ୍ଷ ଶ୍ରୀମତି ନାୟକଙ୍କୁ ମେଡିକାଲ ଖର୍ଚ୍ଚ ବାବଦକୁ ୨ ଲକ୍ଷ ୪୧ ହଜାର ଟଙ୍କା, ରୋଜଗାର ଶୂନ୍ୟ ଜନିତ କ୍ଷତି ବାବଦକୁ ୧୬ ଲକ୍ଷ ୨୫ ହଜାର ୪୦ ଟଙ୍କା ସମେତ ତିନି ପକ୍ଷ ୨୦ ଲେଖାଏଁ କ୍ଷତିପୂରଣ ଦେବାକୁ ନିର୍ଦ୍ଦଶେ ଦେଇଛନ୍ତି । ଜିଲ୍ଲା ଖାଉଟି ଅଦାଲତ ସଭାପତି ରାଧାକାନ୍ତ ଶତପଥୀ ଏହାର ବିଚାର କରି ଉପରୋକ୍ତ ରାୟ ଶୁଣାଇଛନ୍ତି । ଯଦି ଏହା ବିଳମ୍ବ ହୁଏ ବାର୍ଷିକ ୧୨ ପ୍ରତିଶତ ସୁଧ ଦେବାକୁ ପଡିବ ବୋଲି ରାୟରେ ଉଲ୍ଲେଖ ରହିଛି ।

you can also read..