ନୂଆଦିଲ୍ଲୀ ୩୧।୮: ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କର ସୋମବାର  ଅପରାହ୍ନରେ ପରଲୋକ ହୋଇଛି।  ୮୪ ବର୍ଷ ବୟସ୍କ ମୁଖାର୍ଜୀ ନୂଆଦିଲ୍ଲୀସ୍ଥିତ ସେନା ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ଶେଷ ନିଶ୍ୱାସ ତ୍ୟାଗ କରିଥିବା ତାଙ୍କ ପୁଅ ତଥା ପୂର୍ବତନ ସାଂସଦ ଅଭିଜିତ ମୁଖାର୍ଜୀ ଏକ ଟ୍ୱିଟ୍‌ ବାର୍ତ୍ତାରେ ଘୋଷଣା କରିଛନ୍ତି। ପ୍ରଣବଙ୍କ ପରଲୋକ ଖବର ପ୍ରଚାରିତ ହେବା ପରେ ସାରା ଦେଶରେ ଶୋକର ଛାୟା ଖେଳିଯାଇଛି।

ପ୍ରଣବଙ୍କ ବିୟୋଗରେ କେନ୍ଦ୍ର ସରକାର ୭ ଦିନ ଜାତୀୟ ଶୋକ ଘୋଷଣା କରିଛନ୍ତି। ଦେଶର ସବୁ ସରକାରୀ ଓ ଘରୋଇ ଅନୁଷ୍ଠାନରେ ଜାତୀୟ ପତାକା ଅର୍ଦ୍ଧନମିତ ରଖାଯିବା ସହ ସମସ୍ତ ସରକାରୀ ଉତ୍ସବ ଓ କାର୍ଯ୍ୟକ୍ରମ ବନ୍ଦ ରହିବ। ପ୍ରଣବ ଗତ ଅଗଷ୍ଟ ୧୦ ତାରିଖ ଦିନ ଦିଲ୍ଲୀ କ୍ୟାଣ୍ଟନମେଣ୍ଟସ୍ଥିତ ଆର୍ମି ରିସର୍ଚ୍ଚ ଏଣ୍ଡ ରେଫରାଲ ହସ୍ପିଟାଲରେ ଭର୍ତ୍ତି ହୋଇଥିଲେ। ତାଙ୍କ ମସ୍ତିଷ୍କରେ ଜମାଟ ରକ୍ତ ଅସ୍ତ୍ରୋପଚାର କରାଯାଇଥିଲା।

ତାଙ୍କୁ ଜୀବନ ରକ୍ଷକ ପ୍ରଣାଳୀରେ ରଖି ଚିକିତ୍ସା କରାଯାଉଥିବା ବେଳେ ସେ ଗଭୀର କୋମାକୁ ଚାଲିଯାଇଥିଲେ। ଏଥିରେ ତାଙ୍କର ଫୁସଫୁସ ମଧ୍ୟ ସଂକ୍ରମିତ ହୋଇଥିବାର ଜଣାପଡିଥିଲା। ଏକ ବିଶେଷଜ୍ଞ ଡାକ୍ତରଙ୍କ ଟିମ୍‌ ତାଙ୍କର ଚିକିତ୍ସା କରୁଥିବା ବେଳେ  ସୋମବାର ଅପରାହ୍ନ ୫ଟା ୪୫ ମିନିଟ୍‌ରେ ତାଙ୍କ ପୁତ୍ର ଟ୍ୱିଟରରେ ପ୍ରଣଙ୍କ ପରଲୋକ ହୋଇଥିବାର ଦେଶକୁ ସୂଚନା ଦେଇଥିଲେ।