ନୂଆଦିଲ୍ଲୀ: ବୈଶ୍ୱିକ ସ୍ତରରେ ଦୁର୍ବଳ ଚାହିଦା ଯୋଗୁଁ ଆର୍ଥିକ ବର୍ଷ ୨୪ରେ ଦେଶର ତିନି ସବୁଠୁ ବଡ଼ ସୂଚନା-ପ୍ରଯୁକ୍ତି (ଆଇଟି) କମ୍ପାନି ଟିସିଏସ, ଇନଫୋସିସ୍ ଏବଂ ୱିପ୍ରୋ ୬୪ ହଜାର କର୍ମଚାରୀଙ୍କୁ ବାହାର କରିଛି । ଶୁକ୍ରାବର ମାର୍ଚ୍ଚର ତ୍ରୈମାସ ପରିଣାମ ଘୋଷଣା କରିଥିବା କମ୍ପାନି ୱିପ୍ରୋରେ କର୍ମଚାରୀଙ୍କ ସଂଖ୍ୟା କମି ୨,୩୪,୦୫୪ରେ ରହିଛି, ଯାହା ଗୋଟିଏ ବର୍ଷ ପୂର୍ବେ ସମାନ ଅବଧିରେ ୨,୫୮,୫୭୦ ଥିଲା ।
ଏହିପରି କମ୍ପାନିର କର୍ମଚାରୀଙ୍କ ସଂଖ୍ୟାରେ ୨୪,୫୧୬ କମ ହୋଇଛି । ୱିପ୍ରୋର ମୁଖ୍ୟ ମାନବ ସମ୍ୱଳ ଅଧିକାରୀ ସୌରଭ ଗୌଭିଲ କହିଛନ୍ତି ଯେ କର୍ମଚାରୀ ସଂଖ୍ୟା କମିବା ମୁଖ୍ୟ ରୂପେ ବଜାର ଏବଂ ଚାହିଦାର ସ୍ଥିତି ସହ ଆମ ଦ୍ୱାରା ପରିଚାଳିତ ଦକ୍ଷତା ଯୋଗୁଁ ଆସିଛି ।
ଦୀର୍ଘ ଅବଧିରେ କମ୍ପାନି ଅଧିକ ଆଇପି-ଆଧାରିତ ପ୍ଲାଟଫର୍ମ ଏବଂ ଆର୍ଟିଫିସିଆଲ୍ ଇଣ୍ଟେଲିଜେନ୍ସି ଆଡ଼କୁ ବଢିବ, କର୍ମଚାରୀଙ୍କ ସଂଖ୍ୟାରେ ହେବାକୁ ଥିବା ବୃଦ୍ଧିରେ ବଡ଼ ଅନ୍ତର ଦେଖିବାକୁ ମିଳିବ । ଭାରତର ଆଇଟି ସେବା ଉଦ୍ୟୋଗ ୨୫୪ ବିଲିୟନ ଡଲାର ଏବଂ ଏହା ଆର୍ଥିକ ଅନିଶ୍ଚିତତା ଏବଂ ଭୂ-ରାଜନୀତିକ ଉତ୍ଥାନ-ପତନର ସାମନା କରୁଛି । ଭାରତର ଦ୍ୱିତୀୟ ସବୁଠୁ ବଡ଼ ଆଟି କମ୍ପାନି ଇନଫୋସିସର ମୋଟ କର୍ମଚାରୀଙ୍କ ସଂଖ୍ୟା ୨୦୨୪ ମାର୍ଚ୍ଚରେ କମ ହୋଇ ୩,୧୭,୨୪୦ ହୋଇଛି । ଯାହା ଗତ ବର୍ଷ ସମାନ ଅବଧିରେ ୩,୪୩,୨୩୪ କର୍ମଚାରୀଙ୍କଠାରୁ ୨୫,୯୯୪ କମ ରହିଛି ।
