ନୂଆଦିଲ୍ଲୀ ୨୫।୦୫: ମୋବାଇଲ୍ ଫୋନ୍… ଆଜିର ଟେକ୍ନୋଲୋଜୀ ଯୁଗର ଲାଇଫ ଷ୍ଟାଇଲ୍ରେ ଏକ ଅପରିହାର୍ଯ୍ୟ ଉପକରଣ । ସୂଚନାରୁ ନଲେଜ ଆଉ ଏଣ୍ଟରଟେନ୍ମେଣ୍ଟ ସବୁଥିରେ ମୋବାଇଲ ଫୋନ୍ ଜରୁରି ।ମୋବାଇଲ୍ ହ୍ୟାଣ୍ଡସେଟ୍ ନାହିଁ କିମ୍ବା ନେଟୱର୍କ ନାହିଁ ତ  ତମେ ନୁହଁ ଅପଡେଟ୍ ବା ହୋଇପାରିବନି ଅପଡେଟ୍ ।  

  ମୋବାଇଲ୍ ଫୋନ୍ , ଏହା କେବଳ କଥାବାର୍ତ୍ତାର ମାଧ୍ୟମରେ ସୀମିତ ନୁହେଁ ,ଏହାର ବ୍ୟବହାର ଆହୁରି  ବ୍ୟାପକ । ଭିଡିଓ କଲ୍ରୁ ବ୍ୟାଙ୍କ୍ ଟ୍ରାନଜାକ୍ସନ । ଗୋଟିଏ ଯନ୍ତ୍ରରେ ପରିଚୟରୁ ପରିବାର ଆଉ ବୃତ୍ତି ବେଉସା । ସହଜ, ସୁବିଧା । ଆମ ଜୀବନ- ଜୀବିକାର  ପ୍ରାୟ ସବୁ କଥାରେ ମୋବାଇଲ୍ ଫୋନ୍ ଅତି ଦରକାରୀ। କିନ୍ତୁ କେବେଠୁ, କିପରି ଆସିଲା ଏହି ମୋବାଇଲ୍ ଫୋନ୍ ? ଆଉ ଆରମ୍ଭରେ ଥିଲା କିପରି , ଏବେ କେତେ ନୂଆ ରୂପ ,  କେଉଁଭଳି ଭାବେ ଏହା ମଣିଷର ଜୀବନ ସହ ଏପରି ଜଡିଗଲା ? 

ଅର୍ଦ୍ଧ ଶତାବ୍ଦୀର ଯାତ୍ରା । ହଁ  ଆଜିର ଏହି ମୋବାଇଲ ଫୋନ୍କୁ ଏବେ ୫୦ ବର୍ଷ ପୂରିଲାଣି ।  ୧୯୭୩ ଏପ୍ରିଲ ୩ ତାରିଖରେ ମୋବାଇଲ୍ ଫୋନ୍ ବା ସେଲ୍ ଫୋନ୍ର ଜନ୍ମ । ଅର୍ଥାତ୍ ଉଦ୍ଭାବନ । ମୋଟୋରୋଲା କମ୍ପାନୀରେ ସେତେବେଳେ   ଚାକିରି କରୁଥିବା ମାର୍ଟିନ୍ କୁପର୍ ଙ୍କୁ ମୋବାଇଲ୍ ଫୋନ୍ର ଜନ୍ମଦାତା କୁହାଯାଏ। ସେ ତାଙ୍କ ତିଆରି ମୋବାଇଲ୍ ଫୋନ୍ରୁ ପ୍ରଥମେ ତାଙ୍କ ବନ୍ଧୁ ଜୋଏଲ୍ ଏଞ୍ଜେଲଙ୍କୁ କରିଥିଲେ କଲ୍ ।  ତାଙ୍କର ପ୍ରଥମ ଦୁଇ ଧାଡି କଥା ଥିଲା… ‘ଜୋଏଲ୍, ମୁଁ ମାର୍ଟି କହୁଛି । ମୁଁ, ତୁମକୁ ସେଲ୍ ଫୋନ୍ରୁ କଲ୍ କରିଛି । ଏହା ପ୍ରକୃତରେ ଏକ ପୋର୍ଟେବୁଲ୍ ସେଲ୍ ଫୋନ୍’। ଏହି ଫୋନ୍ କଲ୍ରେ ସ୍ତବ୍ଧ ହୋଇ ଯାଇଥିଲେ ଜୋଏଲ୍ ।

ତେବେ ମାର୍କେଟ୍କୁ ଆସିବାକୁ ମୋଟରଲା ସେଲ୍ ଫୋନ୍କୁ ଲାଗି ଯାଇଥିଲା ୧୦ ବର୍ଷ । ୧୯୮୩ରେ ଏହା ପ୍ରଥମେ ଆମେରିକା ମାର୍କେଟ ଆସିଥିଲା ।କିନ୍ତୁ ତାହାର ଆକାର ଥିଲା ବହୁତ ବଡ । ଏକ ଇଟା ଖଣ୍ଡ ଭଳି ।  ସେହି  ସେଲ୍ ଫୋନ୍ର ମୋଟେଇ ଥିଲା  ୧୩  ସେଣ୍ଟିମିଟର ଆଉ ଚଉଡା  ୪.୪୫  ସେଣ୍ଟିମିଟର । ସେହି ମୋବାଇଲ  ଫୋନ୍ରେ ମାତ୍ର ୨୫ ମିନିଟ୍ କଥାବାର୍ତ୍ତା ହେବାକୁ  ବ୍ୟାଟେରୀକୁ ୧୦ ଘଣ୍ଟା ଚାର୍ଜ କରିବାକୁ ପଡୁଥିଲା । ଓଜନ  ଏତେ ଥିଲା ଯେ, ତାହାକୁ ୨୫ ମିନିଟ୍ ହାତରେ ଧରି କଥା ହେବା କଷ୍ଟକର । ଆଉ ସେତେବେଳେ ତାହାର ଦାମ୍ ଥିଲା ୩, ୯୯୫ ଆମେରିକୀୟ ଡଲାର୍ ।

 ସମୟ ଆଗକୁ ଚାଲିଲା, ବଦଳିଲା ସେଲ୍ ଫୋନ୍ ଫିଚର । ୩ ଡିସେମ୍ବର ୧୯୯୨ରେ ଭୋଡାଫୋନରେ କାମ କରୁଥିବା ରିଚାର୍ଡ ଜାରଭିସଙ୍କୁ ପ୍ରଥମ ମେସେଜ ମିଳିଥିଲା … ମେରି କ୍ରିସମସ୍ ଓ୍ବିସ୍  ।  ନୋକିଆ କମ୍ପାନୀ ମୋବାଇଲ ଫୋନର ପରିସର ବଢାଇବା ପାଇଁ ଆରମ୍ଭ କରିଥିଲା ଅଭିନବ ପ୍ରୟାସ । ୧୯୯୭ରେ ନୋକିଆ ୬୧୧୦ ମୋବାଇଲ ଲଞ୍ଚ କରିଥିଲା । ଯେଉଁଥିରେ ସ୍ନେକ୍ ଗେମ୍ସ ରହିଥିଲା । ଯାହାକି ଖୁବ୍ ଲୋକପ୍ରିୟ ହୋଇଥିଲା ।  ଦୁଇ ବର୍ଷ ପରେ ଆସିଥିଲା ନୋକିଆ ୭୧୧୦ ମଡେଲ୍ । ଏହା ପ୍ରଥମ କରି ବେତାର ନେଟୱାର୍କ ମାଧ୍ୟମରେ ବ୍ରାଉଜିଂ ପ୍ରଦାନ କରୁଥିଲା ।

୨୦୦୧ରେ ଜାପାନ ପ୍ରଥମ ଦେଶ ଭାବରେ 3G ମୋବାଇଲ୍ ନେଟୱାର୍କ  ସୁବିଧା ଉପଲବ୍ଦ କରାଇଥିଲା । ତାହାହିଁ  ଲୋକଙ୍କୁ ହାଇ ସ୍ପିଡ୍ ଇଣ୍ଟରନେଟ୍ ର  ସୁବିଧା ଦେଖାଇଥିଲା । କେବଳ ଏତିକି ନୁହେଁ, ୧୯୯୯ରେ Kyocera VP 210 ଫୋନ୍ ଲଞ୍ଚ କରାଯାଇଥିଲା ଯାହା ଭିଡିଓ କଲିଂ ବୈଶିଷ୍ଟ ସହିତ ଆସିଥିଲା ଏବଂ ଗୋଟିଏ ବର୍ଷ ପରେ ଲଞ୍ଚ କରିଥିବା Sharp SH04 ଫୋନ୍ ରେ ଥିଲା ବ୍ୟାକ୍ କ୍ୟାମେରା । ତେବେ ସେଲ୍ ଫୋନ୍ ବାଦଶାହ  ଆଇଫୋନ୍  ୨୦୦୭ରେ   କରିଥିଲା ବଜାର ପ୍ରବେଶ । ୨୦୦୯ରେ ଆସିଥିଲା ହ୍ବାଟସପ୍, ଯାହାକି ସେଲ୍ ଫୋନ୍ ର ଲୋକ ପ୍ରିୟତାକୁ ରକେଟ୍ ସ୍ପିଡ୍ ଦେଇଥିଲା । ଆଉ ୨୦୧୨ରେ ଅଧିକ ଲୋକପ୍ରିୟ ହୋଇଥିଲା SMS । ୫ ଏପ୍ରିଲ ୨୦୧୯ରେ 5G ଲଞ୍ଚ କଲା ଦକ୍ଷିଣ କୋରିଆ ।  ଏବେ ଫାଇଭ୍ ଜି ମୋବାଇଲ୍ ଫୋନ୍କୁ ଆହୁରି କରିଛି ଆକର୍ଷଣୀୟ । 

ରୂପାନ୍ତରିତ ଏବଂ ବିକଶିତ ଯାତ୍ରା ସହ ୫୦ ଅତିକ୍ରମ କରିଛି ସେଲ୍ ଫୋନ୍ । ଅନେକ ନିର୍ମାତା କମ୍ପାନୀ, ଅନେକ ଅପରେଟର । ଷ୍ଟାଇଲ୍ ଫିଚର ପ୍ରତିଯୋଗୀତାରେ ଦିନୁ ଦିନୁ ଆହୁରି କ୍ୟୁଟ୍ ଆଉ ଆଫର୍ଡେବଲ୍ । ମଣିଷକୁ ପୁରା ଅପଡେଟ୍ ରଖିବାର ସବୁ ଭରସା । ତେବେ ସେଲ୍ ଫୋନ୍ର ସବୁଠୁ ବଡ଼ ବଳ ଇଣ୍ଟରନେଟ୍ । ତେବେ ଏପରି ଜରୁରୀ ଆବଶ୍ୟକତା ଭିତରେ ବି ମୋବାଇଲ୍ ଫୋନ୍ର ବହୁଳ ବ୍ୟବହାର ମଣିଷର ଅନେକ କ୍ଷତି କରୁଛି ।ସ୍ବାସ୍ଥ୍ୟ ବିଶେଷଜ୍ଞ , ବୈଜ୍ଞାନିକ  ସତର୍କ କରିଚାଲିଛନ୍ତି ବାରମ୍ବାର । ମୋବାଇଲ୍ ଫୋନରେ ମାନିଆ ଯେମିତି,  ଆବଶ୍ୟକତାର ସୀମା ଭିତରେ ସବୁ କିଛି ଠିକ୍ ସେମିତି ।