ବେଙ୍ଗାଲୁରୁ, ୧୪/୦୩: ୫ ବର୍ଷ ଧରି ସହମତିରେ ଶାରୀରିକ ସମ୍ପର୍କ ଦୁଷ୍କର୍ମ ନୁହେଁ । ଏହାକୁ ଅପରାଧ କିମ୍ବା ବିଶ୍ୱାସଘାତ ବା କ୍ରିମିନାଲ ବ୍ରିଚ୍‌ ଅଫ୍‌ ଟ୍ରଷ୍ଟ କୁହାଯାଇପାରିବ ନାହିଁ ବୋଲି କହିଛନ୍ତି କର୍ଣ୍ଣାଟକ ହାଇକୋର୍ଟ । ଜଣେ ପୂର୍ବତନ ପ୍ରେମିକା ଆଣିଥିବା ଏପରି ଅଭିଯୋଗରୁ ଉଚ୍ଚ ନ୍ୟାୟଳୟ ଖାରଜ କରି ପ୍ରେମିକ ମଲ୍ଲିକାର୍ଜୁନ ଦେଶାଇଙ୍କୁ ମୁକ୍ତ କରିଛନ୍ତି । ମଲ୍ଲିକାର୍ଜୁନ ନିଜ ପ୍ରେମିକାକୁ ବିବାହର ପ୍ରତିଶ୍ରୁତି ଦେଇ ୫ ବର୍ଷ ଶାରୀରିକ ସମ୍ପର୍କ ରଖିବା ପରେ ପ୍ରତାରିତ କରିଥିବା ନେଇ ଯୁବତୀ ଜଣକ ନ୍ୟାୟ ପାଇଁ କୋର୍ଟଙ୍କ ଦ୍ବାରସ୍ତ ହୋଇଥିଲେ ।

ଜଷ୍ଟିସ୍‌ ଏମ୍‌. ନାଗପ୍ରସନ୍ନ କହିଥିଲେ, ଥରେ କି ଦୁଇ ଥର ନୁହେଁ କିମ୍ବା କିଛି ଦିନ ବି ନୁହେଁ । ଦୀର୍ଘ ୫ ବର୍ଷ ଧରି ଦେଶାଇ ଯୁବତୀଙ୍କ ଇଚ୍ଛା ବିରୋଧରେ ଶାରୀରିକ ସମ୍ପର୍କ ରଖିଥିଲେ ବୋଲି କୁହାଯାଇପାରିବ ନାହିଁ । ତେବେ ଦେଶାଇଙ୍କ ବିରୋଧରେ ଧାରା ୩୨୩ରେ ଆକ୍ରମଣ ଏବଂ ଧାରା ୫୦୬ରେ ଧମକ ଅନୁଯାୟୀ ମାମଲା ଚାଲିବ ହେଲେ ଦୁଷ୍କର୍ମ ଅଭିଯୋଗ ଚାଲିପାରିବ ନାହିଁ ବୋଲି ହାଇକୋର୍ଟ କହିଛନ୍ତି ।

ସୂଚନା ଅନୁସାରେ, ଦେଶାଇ ଓ ସମ୍ପୃକ୍ତା ଯୁବତୀ ୫ ବର୍ଷ ଧରି ରିଲେଶନସିପ୍‌ରେ ଥିଲେ । ଯୁବତୀ ଜଣକ ଦେଶାଇଙ୍କୁ ବିବାହ କରିବାକୁ ଚାହୁଁଥିଲେ । କିନ୍ତୁ ଜାତିଗତ କାରଣରୁ ଉଭୟଙ୍କ ବାହାଘର ହୋଇପାରି ନ ଥିଲା । ପରେ ଯୁବତୀ ଜଣକ ଦେଶାଇଙ୍କ ବିରୋଧରେ ଦୁଷ୍କର୍ମ ଏବଂ ବିଶ୍ୱାସଘାତ ଅଭିଯୋଗ ଆଣିଥିଲେ । ତେବେ ହାଇକୋର୍ଟ ଏହି ଅଭିଯୋଗକୁ ଖାରଜ କରିଛନ୍ତି । ଏପରିକି ଉଭୟଙ୍କ ଭିତରେ ବିତ୍ତୀୟ ନେଣଦେଣ ମଧ୍ୟ ଆଇପିସି ଧାରା ୪୦୬ ଆଧାରରେ ଆପରାଧିକ ବିଶ୍ୱାସଘାତ ନୁହେଁ ବୋଲି ଅଦାଲତ କହିଛନ୍ତି ।