ବଡବିଲ ୨୩|୧୨: ବଡ଼ବିଲ ପୋଲିସକୁ ମିଳିଛି ବଡ଼ ସଫଳତା । ବିଭିନ୍ନ ଡକାୟତି, ଚୋରି ଓ ଲୁଟ୍ ଭଳି ଘଟଣାରେ ସଂପୃକ୍ତ ଏକ ଡକାୟତି ଗ୍ୟାଙ୍ଗର ୫ଜଣଙ୍କୁ ଗିରଫ କରିଛି ପୋଲିସ । ଏମାନଙ୍କ ନିକଟରୁ ୨ଟି ବୋଲରୋ ଗାଡି, ଗୋଟିଏ ମୋଟରସାଇକଲ ସହିତ ୨ଟି ଭୁଜାଲି ଓ ୫ଟି ମୋବାଇଲ ଫୋନ୍ ଜବତ କରିଛି ପୋଲିସ । ଖବର ପାଇ ବଡ଼ବିଲ ପୋଲିସର ଏକ ଟିମ୍ ସୟାବାଲି ଅଂଚଳରେ ଚଢଉ କରି ଏମାନଙ୍କୁ ଗିରଫ କରିଥିଲା।

ଗତ ନଭେମ୍ବର ୧୫ ତାରିଖରେ ବଡ଼ବିଲ ନିକଟରୁ ଟ୍ରକ୍ ଲୁଟ୍ ଘଟଣାରେ ସଂପୃକ୍ତ ଥିବା ପୋଲିସ କହିଛି । ରାୟପୁରରୁ ଝାଡ଼ଖଣ୍ଡ ଯାଉଥିବା ଏକ ଡୋଲୋମାଇଟ୍ ବୋଝେଇ ଟ୍ରକର ଡ୍ରାଇଭରକୁ ମାଡ଼ମାରି ଟ୍ରକଟିକୁ ଲୁଟି ନେଇ ପଳାଇଯିବାକୁ ଚେଷ୍ଟା କରିଥିଲେ ଏମାନେ । ତେବେ ପୋଲିସ ଟ୍ରକଟିକୁ ରିମୁଳି ନିକଟରୁ ଉଦ୍ଧାର କରିଥିବାବେଳେ ଏମାନେ ଫେରାର ହୋଇଯାଇଥିଲେ । ସେହିପରି ବିଭିନ୍ନ ଟ୍ରକରୁ ଡିଜେଲ ଚୋରି କରିବା ସହିତ ମାରଣାସ୍ତ୍ର ଦେଖାଇ ଟ୍ରକ ଡ୍ରାଇଭରଙ୍କ ଠାରୁ ଲୁଟ୍ କରିଥାନ୍ତି ବୋଲି ପୋଲିସ କହିଛି । ଗିରଫ ଅଭିଯୁକ୍ତ ମାନଙ୍କ ମଧ୍ୟରେ ୩ଜଣ ଯୋଡ଼। ଥାନା ଅଂଚଳର ଓ ୨ଜଣ ବଡ଼ବିଲ ଥାନା ଅଂଚଳର ବୋଲି ଜଣାପଡିଛି ।